ಪಾಸ್‌ಪೋರ್ಟ್‌ ಅರ್ಜಿಗೆ ಆ್ಯಪ್‌ !

ಹೊಸದಿಲ್ಲಿ: ಕೇಂದ್ರ ಸರಕಾರ ನೂತನ ಪಾಸ್‌ಪೋರ್ಟ್‌ ಆ್ಯಪ್‌ಗೆ ಚಾಲನೆ ನೀಡಿದ್ದು, ಆಕಾಂಕ್ಷಿಗಳು ಇನ್ನು ಮುಂದೆ ಅತ್ಯಂತ ಸುಲಭದಲ್ಲಿ ಪಾಸ್‌ಪೋರ್ಟ್‌ ಗಿಟ್ಟಿಸಿಕೊಳ್ಳಬಹುದಾಗಿದೆ. ವಿದೇಶಾಂಗ ವ್ಯವಹಾರಗಳ ಸಚಿವೆ ಸುಷ್ಮಾ ಸ್ವರಾಜ್‌ ಅವರು ಮಂಗಳವಾರ 'ಪಾಸ್‌ಪೋರ್ಟ್‌ ಸೇವಾ ದಿವಸ' ಸಮಾರಂಭದಲ್ಲಿ ನೂತನ ಆ್ಯಪ್‌ ಬಿಡುಗಡೆ ಮಾಡಿದ್ದಾರೆ.

ಪ್ರತಿ ಲೋಕಸಭಾ ಕ್ಷೇತ್ರದಲ್ಲಿಯೂ ಪಾಸ್‌ಪೋರ್ಟ್‌ ಕೇಂದ್ರಗಳನ್ನು ಆರಂಭಿಸಲಾಗುವುದು ಎಂದೂ ಇದೇ ಸಂದರ್ಭದಲ್ಲಿ ಘೋಷಿಸಿದ್ದಾರೆ. ಹೊಸ ಆ್ಯಪ್‌ನಿಂದಾಗಿ ಅಭ್ಯರ್ಥಿಗಳು ದೇಶದ ಯಾವುದೇ ಮೂಲೆಯಿಂದಲಾದರೂ ಆ್ಯಪ್‌ ಮೂಲಕವೇ ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಸಬಹುದು. ಆ ನಂತರ, ಆ್ಯಪ್‌ನಲ್ಲಿ ಸೂಚಿಸಲಾದ ವಿಳಾಸದ ಆಧಾರದಲ್ಲಿ ಪೊಲೀಸರಿಂದ ಕೂಲಂಕಶ ಪರಿಶೀಲನೆ ನಡೆಯುತ್ತದೆ. ಒಮ್ಮೆ ದಾಖಲೆಗಳ ಪರಿಶೀಲನೆ ಪೂರ್ಣಗೊಂಡಲ್ಲಿ, ಆ್ಯಪ್‌ನಲ್ಲಿ ಸೂಚಿಸಲಾದ ವಿಳಾಸಕ್ಕೆ ಪಾಸ್‌ಪೋರ್ಟ್‌ ವಿತರಣೆಯಾಗುತ್ತದೆ. ನೂತನ 'ಪಾಸ್‌ಪೋರ್ಟ್‌ ಸೇವಾ ಆ್ಯಪ್‌' ಅನ್ನು 'ಗೂಗಲ್‌ ಪ್ಲೇ ಸ್ಟೋರ್‌' ಮತ್ತು 'ಆ್ಯಪಲ್‌ನ ಆ್ಯಪ್‌ ಸ್ಟೋರ್‌'ಗಳಲ್ಲಿ ಡೌನ್‌ಲೋಡ್‌ ಮಾಡಿಕೊಳ್ಳಬಹುದಾಗಿದೆ.

ಹೀಗೆ ಮಾಡಿ

* ಪಾಸ್‌ಪೋರ್ಟ್‌ ಸೇವಾ ಆ್ಯಪ್‌ ಓಪನ್‌ ಮಾಡಿಕೊಂಡು, ನ್ಯೂ ಯೂಸರ್‌ ರಿಜಿಸ್ಪ್ರೇಷನ್‌ ಆಪ್ಶನ್‌ ಮೇಲೆ ಟ್ಯಾಪ್‌ ಮಾಡಿ.

* ನಿಮ್ಮ ಪಾಸ್‌ಪೋರ್ಟ್‌ ಕಚೇರಿ ಆಯ್ಕೆ ಮಾಡಿಕೊಳ್ಳಿ. ನಂತರ ನಿಮ್ಮ ಹೆಸರು, ಜನ್ಮ ದಿನಾಂಕ, ಇಮೇಲ್‌ ಐಡಿ ಮತ್ತು ನಿಮ್ಮ ಲಾಗಿನ್‌ ಐಡಿ ಟೈಪ್‌ ಮಾಡಿ.

* ಒಮ್ಮೆ ನಿಮ್ಮ ಇಮೇಲ್‌ ಐಡಿ ಮತ್ತು ಲಾಗಿನ್‌ ಐಡಿ ಲಭ್ಯತೆ ಖಾತರಿಯಾದಲ್ಲಿ, ಪಾಸ್‌ವರ್ಡ್‌ ಸೆಟ್‌ ಮಾಡಿಕೊಂಡು ಅರ್ಜಿ ಭರ್ತಿ ಮಾಡಿ.