ಸಶಸ್ತ್ರ ಪಡೆಗಳಿಗೆ ಮಾನವ ಹಕ್ಕುಗಳಲ್ಲಿ ಬಲವಾದ ನಂಬಿಕೆ ಇದೆ: ಬಿಪಿನ್‌ ರಾವತ್‌

ಹೊಸದಿಲ್ಲಿ: ಭಾರತೀಯ ಸಶಸ್ತ್ರ ಪಡೆಗಳು ಮಾನವ ಹಕ್ಕುಗಳ ಕಾನೂನುಗಳನ್ನು ಹೆಚ್ಚು ಗೌರವ ಹೊಂದಿವೆ. ಜನಸಾಮಾನ್ಯರಿಗೆ ಮಾನವ ಹಕ್ಕುಗಳನ್ನು ಖಾತರಿಪಡಿಸುವ ಜತೆಗೆ ಮಾನವ ಹಕ್ಕುಗಳಿಗೆ ಎದುರಾಗುವ ಅಡೆತಡೆಗಳನ್ನೂ ನಿವಾರಿಸುತ್ತವೆ ಎಂದು ಸೇನಾ ಮುಖ್ಯಸ್ಥ ಜನರಲ್‌ ಬಿಪಿನ್‌ ರಾವತ್‌ ಶುಕ್ರವಾರ ತಿಳಿಸಿದ್ದಾರೆ.

ದೆಹಲಿಯ ಮಾನವ ಹಕ್ಕುಗಳ ಭವನದಲ್ಲಿ ಶುಕ್ರವಾರ ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ (ಎನ್ಎಚ್‌ಆರ್‌ಸಿ) ಏರ್ಪಡಿಸಿದ್ದ "ಯುದ್ಧಕಾಲದಲ್ಲಿ ಹಾಗೂ ಯುದ್ಧಕೈದಿಗಳಿಗೆ ಮಾನವ ಹಕ್ಕುಗಳ ರಕ್ಷಣೆ" ವಿಷಯದ ಕುರಿತ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಭಾರತೀಯ ಸಶಸ್ತ್ರಪಡೆಗಳು (ಭೂಸೇನೆ, ನೌಕಾಸೇನೆ, ವಾಯುಸೇನೆ) ಶಿಸ್ತಿನಿಂದ ಕೂಡಿವೆ. ಅಲ್ಲದೆ ಮಾನವ ಹಕ್ಕುಗಳ ಕಾನೂನುಗಳ ಮೇಲೆ ಹೆಚ್ಚು ಗೌರವ ಇರಿಸಿಕೊಂಡಿದೆ. ಜಿನೇವಾ ಒಪ್ಪಂದದ ನಿಯಮಗಳಿಗೆ ಅನುಗುಣವಾಗಿಯೇ ಯುದ್ಧಕೈದಿಗಳ ಜತೆ ನಡೆದುಕೊಳ್ಳಲಾಗುತ್ತದೆ ಎಂದು ಹೇಳಿದರು.

ಯಾರಾಗಲಿದ್ದಾರೆ ಮೊದಲ ಸಿಡಿಎಸ್‌

ಬಿಪಿನ್‌ ರಾವತ್‌ ಪ್ರಸ್ತಿತ ಸೇನೆಯಲ್ಲಿರುವ ಹಿರಿಯ ಅಧಿಕಾರಿಯಾಗಿದ್ದಾರೆ. ಭೂಸೇನೆಯ ಮುಖ್ಯಸ್ಥರಾಗಿ (ಜನರಲ್‌) ಅಧಿಕಾರದಲ್ಲಿದ್ದು, ಇದೇ ಡಿ. 31ರಂದು ನಿವೃತ್ತಿಯಾಗಲಿದ್ದಾರೆ. ಇದೀಗ ಸಿಡಿಎಸ್‌ ಹುದ್ದೆಯ ನೇಮಕಾತಿಗೆ ಸಿದ್ಧತೆ ನಡೆಯುತ್ತಿದ್ದು, ಬಿಪಿನ್‌ ರಾವತ್‌ ದೇಶದ ಮೊದಲ ಸಿಡಿಎಸ್‌ ಅಧಿಕಾರಿಯಾಗಿ ನೇಮಕ ಮಾಡುವ ಸಾಧ್ಯತೆಗಳಿವೆ.