ಪಾಕ್‌ನಿಂದ ಡ್ರೋನ್‌ ಮೂಲಕ ಶಸ್ತ್ರಾಸ್ತ್ರ ಪೂರೈಕೆ: ಗಡಿ ಭಾಗದಲ್ಲಿ ಹೈ ಅಲರ್ಟ್‌ ಘೋಷಣೆ

ಶ್ರೀನಗರ: ಭಾರತದ ಗಡಿಯೊಳಗೆ ಉಗ್ರರಿಗೆ ನೆರವು ನೀಡಲು ಶಸ್ತಾಸ್ತ್ರ ಹಾಗೂ ಇತರೆ ಉಪಕರಣಗಳ ಪೂರೈಕೆ ಮಾಡಲು ಡ್ರೋನ್‌ಗಳ ಬಳಕೆ ಮಾಡುತ್ತಿರುವ ಪಾಕಿಸ್ತಾನದ ಕುತಂತ್ರ ಬಹಿರಂಗ ಬೆನ್ನಲ್ಲೇ ಸೇನಾ ಪಡೆ, ವಾಯುಪಡೆ ಎಚ್ಚೆತ್ತುಕೊಂಡಿದೆ.

ಜಮ್ಮು ಕಾಶ್ಮೀರದ ಗಡಿ ನಿಯಂತ್ರಣ ರೇಖೆ, ಜಮ್ಮು ಕಾಶ್ಮೀರದ ಗಡಿ ಭಾಗ, ಪಂಜಾಬ್‌ ಹಾಗೂ ಒಳ ನುಸುಳುವಿಕೆ ಹೆಚ್ಚಾಗುವ ಪ್ರದೇಶಗಳಲ್ಲಿ ಹೈ ಅಲರ್ಟ್‌ ಘೋಷಣೆ ಮಾಡಲಾಗಿದೆ.

ಸೇನೆ ಹಾಗೂ ಗಡಿ ಭದ್ರತಾ ಪಡೆ ಈಗಾಗಲೇ ಹೆಚ್ಚುವರಿ ಭದ್ರತೆ ನಿಯೋಜಿಸಿದ್ದು, ಈ ಭಾಗಗಳಲ್ಲಿ ತೀವ್ರ ನಿಗಾ ಇಡಲು ಸೂಚನೆ ನೀಡಲಾಗಿದೆ.

ಡ್ರೋನ್‌ಗಳ ಮೂಲಕ ಪಂಜಾಬ್‌ನ ಗಡಿಯೊಳಗೆ ಎಕೆ-47 ರೈಫಲ್‌, 5 ಸೆಟಲೈಟ್‌ ಫೋನ್‌ಗಳು ಹಾಗೂ ಹ್ಯಾಂಡ್‌ ಗನೇಡ್‌ಗಳನ್ನು ಪಾಕಿಸ್ತಾನ ತಂದು ಹಾಕಿತ್ತು. ಅಮೃತಸರದ ಭಾರತ-ಗಡಿ ಪ್ರದೇಶದಲ್ಲಿ ಕಳೆದ 10 ದಿನಗಳಿಂದ ಡ್ರೋನ್‌ಗಳು ಏಳೆಂಟು ಬಾರಿ ಚಲಿಸಿತ್ತು ಎಂದು ಸೇನಾಧಿಕಾರಿಗಳು ತಿಳಿಸಿದ್ದಾರೆ.

ಚೀನಾ ತಯಾರಿಸಿದ ಈ ಡ್ರೋನ್‌ಗಳು ಗರಿಷ್ಠ 10 ಕೆ.ಜಿ. ತೂಕದ ಭಾರವನ್ನು ಸಾಗಿಸುವ ಸಾಮರ್ಥ್ಯ ಹೊಂದಿವೆ. ಅಲ್ಲದೆ, ಭದ್ರತಾ ಪಡೆಯ ಕಣ್ಣಿಗೆ ಬೀಳದಂತೆ ಅತ್ಯಂತ ವೇಗವಾಗಿ ಮತ್ತು ಕಡಿಮೆ ಎತ್ತರದಲ್ಲಿ ಹಾರಬಲ್ಲವು. ಜಿಪಿಎಸ್‌ ಆಧರಿತ ಈ ಡ್ರೋನ್‌ಗಳು ತಲುಪಬೇಕಾದ ಸ್ಥಳವನ್ನು ಮೊದಲೇ ನಿಗದಿಪಡಿಸಲಾಗಿರುತ್ತದೆ. ಆ ಸ್ಥಳಕ್ಕೆ ಸರಕನ್ನು ಬೀಳಿಸಿ, ಇವು ಮೂಲ ಸ್ಥಾನಕ್ಕೆ ಹಿಂದಿರುಗುತ್ತವೆ ಎಂದು ಮೂಲಗಳು ತಿಳಿಸಿವೆ.