ಉಗ್ರರ ಬೇಟೆಗೆ ರೆಡಿಯಾದ ಇಂಡಿಯನ್ ಆರ್ಮಿ: ಹಿಟ್‌ ಲಿಸ್ಟ್‌ ಸಿದ್ಧ

ಶ್ರೀನಗರ: ಕಣಿವೆ ರಾಜ್ಯದಲ್ಲಿ ಉಗ್ರರ ಉಪಟಳ ಹೆಚ್ಚಾಗಿರುವ ಬೆನ್ನಲ್ಲೇ ಕೆಲವು ಪ್ರಮುಖ ಉಗ್ರರ ಬೇಟೆಗೆ ಸೇನೆ ಸಿದ್ಧವಾಗಿದ್ದು, ಹಿಟ್‌ ಲಿಸ್ಟ್‌ ಸಿದ್ಧಪಡಿಸಿದೆ.

ಉಗ್ರ ಸಂಘಟನೆಗಳ ಕಮಾಂಡರ್‌ಗಳಾಗಿರುವ ಝಾಕಿರ್ ಮೂಸ, ರಿಯಾಜ್‌ ನಾಯ್ಕೂ ಮತ್ತು ಅಬು ಹಂಜಾಲ ಸಹಿತ 15 ಮೋಸ್ಟ್‌ ವಾಂಟೆಡ್‌ ಉಗ್ರರ ಹಿಟ್‌ ಲಿಸ್ಟ್‌ ಅನ್ನು ಆರ್ಮಿ ತಯಾರಿಸಿದ್ದು, ಯಾವುದೇ ಕ್ಷಣದಲ್ಲಿ ಕಾರ್ಯಾಚರಣೆ ಆರಂಭಿಸುವ ಸಾಧ್ಯತೆಯಿದೆ ಎನ್ನಲಾಗಿದೆ.

ರಿಯಾಜ್‌ ನಾಯ್ಕೂ ತಲೆಗೆ 12 ಲಕ್ಷ ರೂ. ಬೆಲೆಕಟ್ಟಿದ್ದು, ಬುರ್ಹಾನ್ ವನಿ ಹತ್ಯೆಯ ಬಳಿಕ ಗುಪ್ತಚರ ಸಂಘಟನೆಗೆ ಬೇಕಾಗಿರುವ ಅತಿ ಪ್ರಮುಖ ಉಗ್ರನಾಗಿದ್ದಾನೆ. ಎ++ ಕೆಟಗರಿಯ ಉಗ್ರನಾಗಿರುವ ರಿಯಾಜ್‌ ಹತ್ಯೆ ಸೇನೆಗೆ ಅತ್ಯಂತ ಪ್ರಮುಖವಾಗಿದ್ದು, ಕಾಶ್ಮೀರದಲ್ಲಿ ಹಿಜ್ಬುಲ್ ಮುಜಾಹಿದೀನ್ ಸಂಘಟನೆಯ ಮುಖ್ಯಸ್ಥನಾಗಿದ್ದಾನೆ. ಹೀಗಾಗಿ ಆತನನ್ನು ಹತ್ಯೆ ಮಾಡುವುದು ಸೇನೆಗೆ ಮುಖ್ಯವಾಗಿದೆ.

ಉಳಿದಂತೆ ಇತರ ಹಲವು ಉಗ್ರರು ಸೇನೆಗೆ ಬೇಕಾಗಿದ್ದು, ಕಣಿವೆ ರಾಜ್ಯದಲ್ಲಿ ತಲೆಮರೆಸಿಕೊಂಡಿದ್ದಾರೆ. ಜತೆಗೆ ಕಾಶ್ಮೀರದಲ್ಲಿ ಮತ್ತೆ ಉಗ್ರ ಚಟುವಟಿಕೆಗಳು ಆರಂಭಗೊಂಡಿದ್ದು, ಹಲವು ಸ್ಥಳೀಯ ಯುವಕರು ಉಗ್ರ ಸಂಘಟನೆ ಸೇರುತ್ತಿದ್ದಾರೆ. ಹೀಗಾಗಿ ಸೇನೆ ತ್ವರಿತ ಕಾರ್ಯಯೋಜನೆ ರೂಪಿಸಿದ್ದು, ಉಗ್ರ ಸಂಘಟನೆಯ ಜಾಲ ವಿಸ್ತರಣೆಗೊಳ್ಳುವುದಕ್ಕೂ ಮೊದಲೇ ಅದನ್ನು ಮಟ್ಟ ಹಾಕಲು ಕ್ರಮ ಕೈಗೊಂಡಿದೆ.