ಹೊಸದಿಲ್ಲಿ: ರಕ್ಷಣಾ ಸಚಿವ ಅರುಣ್ ಜೇಟ್ಲಿ ಬುಧವಾರದಿಂದ ಮೂರು ದಿನಗಳ ಕಾಲ ಮಾಸ್ಕೋ (ರಷ್ಯಾ ರಾಜಧಾನಿ) ಪ್ರವಾಸ ಕಾರ್ಯಕ್ರಮ ಹಾಕಿಕೊಂಡಿದ್ದು, ಈ ವೇಳೆ ರಕ್ಷಣೆ ಹಾಗೂ ಭದ್ರತೆಗೆ ಸಂಬಂಧಪಟ್ಟಂತೆ ದ್ವಿಪಕ್ಷೀಯ ಸಹಕಾರವನ್ನು ಮೇಲ್ಸ್ತರಕ್ಕೆ ಕೊಂಡೊಯ್ಯುವ ನಿಟ್ಟಿನಲ್ಲಿ ಭಾರತ ಹಾಗೂ ರಷ್ಯಾ ಪರಸ್ಪರ ಸಮಾಲೋಚನೆ ನಡೆಸಲಿವೆ.
ಪ್ರಧಾನಿ ನರೇಂದ್ರ ಮೋದಿ ಹಾಗೂ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ 'ಪೀಟರ್ಸ್ಬರ್ಗ್ ವಾರ್ಷಿಕ ಸಮ್ಮೇಳನ'ದಲ್ಲಿ ಭೇಟಿಯಾಗಿ ಪ್ರಮುಖ ಸೇನಾ ಯಂತ್ರಾಂಶಗಳ ಜಂಟಿ ಉತ್ಪಾದನೆ ಹಾಗೂ ಸಹನಿರ್ಮಾಣದೊಂದಿಗೆ ಉಭಯ ದೇಶಗಳ ನಡುವಣ ಭದ್ರತಾ ಒಪ್ಪಂದಗಳನ್ನು ಮೇಲ್ಸ್ತರಕ್ಕೆ ಕೊಂಡೊಯ್ಯಲು ಹಾಗೂ ಇನ್ನಷ್ಟು ತೀವ್ರಗೊಳಿಸಲು ತೀರ್ಮಾನಿಸಿದ ಮೂರೇ ವಾರಗಳಲ್ಲಿ ರಕ್ಷಣಾ ಸಚಿವರು ರಷ್ಯಾಕ್ಕೆ ಭೇಟಿ ನೀಡುತ್ತಿರುವುದು ಕುತೂಹಲ ಗರಿಗೆದರುವಂತೆ ಮಾಡಿದೆ.
ಜೇಟ್ಲಿ ಅವರು ಜೂನ್ 23ರಂದು ನಡೆಯಲಿರುವ ಮಿಲಿಟರಿ-ತಾಂತ್ರಿಕ ಸಹಕಾರ ಕುರಿತ ಭಾರತ-ರಷ್ಯಾ ಅಂತರ್ ಸರಕಾರಿ ಆಯೋಗದ 17ನೇ ಸಭೆಯಲ್ಲಿ ತಮ್ಮ ರಷ್ಯಾ ಸಹವರ್ತಿ (ರಷ್ಯಾ ರಕ್ಷಣಾ ಸಚಿವ) ಜನರಲ್ ಸರ್ಗೀ ಶೋಗು ಜತೆ ವೇದಿಕೆ ಹಂಚಿಕೊಳ್ಳಲಿದ್ದಾರೆ.
''ದ್ವಿಪಕ್ಷೀಯ ಸಭೆಯು ಭಾರತ ಮತ್ತು ರಷ್ಯಾ ನಡುವೆ ಅಸ್ತಿತ್ವದಲ್ಲಿರುವ ವಿಶೇಷ ಹಾಗೂ ಗೌಪ್ಯ ರಣತಂತ್ರ ಸಹಭಾಗಿತ್ವದ ಚೌಕಟ್ಟಿನೊಳಗೆ ಉಭಯ ರಾಷ್ಟ್ರಗಳ ನಡುವಣ ಮಿಲಿಟರಿ ಹಾಗೂ ಮಿಲಿಟರಿ -ತಾಂತ್ರಿಕ ಸಹಕಾರ ಸಮಸ್ಯೆಗಳನ್ನು ಪೂರ್ಣ ಪ್ರಮಾಣದಲ್ಲಿ ಪುನರ್ವಿಮರ್ಶೆಗೊಳಪಡಿಸಲಿದೆ,'' ಎಂದು ರಕ್ಷಣಾ ಸಚಿವಾಲಯದ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಜೇಟ್ಲಿ ಬುಧವಾರ ಉನ್ನತ ಮಟ್ಟದ ನಿಯೋಗದೊಂದಿಗೆ ಮಾಸ್ಕೋಗೆ ಪಯಣ ಬೆಳೆಸಲಿದ್ದಾರೆ.