ನಾಮ್‌ದಾರ್‌ಗಳಿಂದ ನೌಕಾ ಪಡೆ ರಜೆ ಕಳೆಯಲು ಬಳಕೆ: ಅರುಣ್‌ ಜೇಟ್ಲಿ

ಹೊಸದಿಲ್ಲಿ: ಐಎನ್‌ಎಸ್‌ ವಿರಾಟ್‌ ನೌಕೆಯನ್ನು ರಾಜೀವ್‌ ಗಾಂಧಿ ಸ್ವಂತ ಪ್ರವಾಸಕ್ಕೆ ಬಳಕೆ ಮಾಡಿದ್ದರು ಎಂದು ಪ್ರಧಾನಿ ನರೇಂದ್ರ ಮೋದಿ ಚುನಾವಣೆ ಪ್ರಚಾರದ ವೇಳೆ ಆರೋಪಿಸಿದ್ದು, ಶಸಸ್ತ್ರ ಪಡೆಯ ನಂತರ ಇದೀಗ ಭಾರತೀಯ ನೌಕಾ ಪಡೆಯು ಚುನಾವಣೆ ವಿಚಾರವಾಗಿ ಪ್ರತಿಧ್ವನಿಸಿತ್ತಿದೆ.

ಕೇಂದ್ರ ಸಚಿವ ಅರುಣ್‌ ಜೇಟ್ಲಿ ಅವರು ಗುರುವಾರ ಪ್ರಧಾನಿ ಮೋದಿ ಆರೋಪಕ್ಕೆ ಬೆಂಬಲಿಸಿದ್ದು, ನಾಮ್‌ದಾರ್‌ಗಳು ಭಾರತೀಯ ನೌಕಾ ಪಡೆಯನ್ನು ರಜೆ ಕಳೆಯಲು ಉಪಯೋಗಿಸುತ್ತಾರೆ ಆದರೆ ಕಾಮ್‌ ದಾರ್‌ಗಳು ಭಯೋತ್ಪಾದಕರ ವಿರುದ್ಧ ಹೋರಾಡಲು ಭಾರತೀಯ ನೌಕಾ ಪಡೆಯನ್ನು ಬಳಕೆ ಮಾಡುತ್ತಾರೆ ಎಂದು ಚಾಟಿ ಬೀಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಹೆಚ್ಚಾಗಿ ರಾಹುಲ್‌ ಗಾಂಧಿ ಕುಟುಂಬದ ವಿರುದ್ಧ ವಾಗ್ದಾಳಿ ನಡೆಸುವಾಗ 'ನಾಮ್‌ದಾರ್' ಎಂದೇ ಜರಿಯುತ್ತಾರೆ. ಮತ್ತು ತಮ್ಮನ್ನು ತಾವು 'ಕಾಮ್‌ದಾರ್‌' ಎಂದು ಕರೆದುಕೊಳ್ಳುತ್ತಾರೆ.

1984-89ರಲ್ಲಿ ರಾಜೀವ್‌ ಗಾಂಧಿ ಅವರು ಪ್ರಧಾನಿಯಾಗಿದ್ದಾಗ ಐಎನ್‌ಎಸ್‌ ವಿರಾಟ್‌ ನೌಕೆಯನ್ನು ತಮ್ಮ ಸ್ವಂತ ಟ್ಯಾಕ್ಸಿಯಂತೆ ಬಳಕೆ ಮಾಡಿದ್ದರು ಎಂದು ಪ್ರಧಾನಿ ಮೋದಿ ಇತ್ತೀಚೆಗೆ ಆರೋಪಿಸಿದ್ದರು.