ಮೋದಿಗಿಂತ ಮನಮೋಹನ್‌ ಸಾವಿರ ಪಟ್ಟು ಉತ್ತಮ: ಅರವಿಂದ ಕೇಜ್ರಿವಾಲ್‌

ಹೊಸದಿಲ್ಲಿ: ರಾಷ್ಟ್ರದ ಪ್ರಧಾನಿಯಾಗಿ ಮನಮೋಹನ್‌ ಸಿಂಗ್‌ ಸಾವಿರ ಪಟ್ಟು ನರೇಂದ್ರ ಮೋದಿಗಿಂತ ಉತ್ತಮ ಎಂದು ದಿಲ್ಲಿ ಮುಖ್ಯಮಂತ್ರಿ ಮತ್ತು ಎಎಪಿ ಮುಖ್ಯಸ್ಥ ಅರವಿಂದ ಕೇಜ್ರಿವಾಲ್‌ ಹೇಳಿದ್ದಾರೆ.

2008ರಲ್ಲಿ ಜಾಗತಿಕ ಆರ್ಥಿಕ ಹಿಂಜರಿತದ ಸಂದರ್ಭ ಭಾರತದ ವಿತ್ತ ವಲಯಕ್ಕೆ ರಕ್ಷಣಾ ಕವಚದಂತೆ ಮನಮೋಹನ್‌ ಸಿಂಗ್‌ ಕಾರ್ಯ ನಿರ್ವಹಿಸಿದರು. ಮನಮೋಹನ್‌ ಓರ್ವ ಉತ್ತಮ ವ್ಯಕ್ತಿ ಎಂದು ಕೇಜ್ರಿವಾಲ್‌ ಕಾಂಗ್ರೆಸ್‌ ಹಿರಿಯ ನಾಯಕ ಮನಮೋಹನ್‌ ಸಿಂಗ್‌ ಅವರನ್ನು ಕೊಂಡಾಡಿದ್ದಾರೆ.

ಮನಮೋಹನ್‌ ಸಿಂಗ್‌ ಶಿಕ್ಷಣವಂತರು. ವಿತ್ತೀಯ ತಜ್ಞರು. ಆರ್ಥಿಕತೆಯನ್ನು ಚೆನ್ನಾಗಿ ಅರ್ಥ ಮಾಡಿಕೊಂಡಿದ್ದಾರೆ ಎಂದು ಪಿಟಿಐಗೆ ನೀಡಿದ ಸಂದರ್ಶನದಲ್ಲಿ ಅರವಿಂದ ಕೇಜ್ರಿವಾಲ್‌ ಹೇಳಿದ್ದಾರೆ.

ಇದೇ ಅರವಿಂದ ಕೇಜ್ರಿವಾಲ್‌ ಅವರು 2011 ಮತ್ತು 2013ರ ನಡುವಣ ಪ್ರಧಾನಿ ಮನಮೋಹನ್‌ ಸಿಂಗ್‌ ನೇತೃತ್ವದ ಯುಪಿಎ 2ನೇ ಅವಧಿಯ ಆಡಳಿತದ ವಿರುದ್ಧ ಅಣ್ಣಾ ಹಜಾರೆ ಜತೆ ಪ್ರತಿಭಟನೆ ನಡೆಸುತ್ತಿದ್ದರು.