ತಾಲಿಬಾನ್‌ ಉಗ್ರರ ದಾಳಿಗೆ 20 ಪೊಲೀಸರು, 10 ಯೋಧರು ಬಲಿ

ಕಾಬೂಲ್‌: ಪಶ್ಚಿಮ ಅಫಘಾನಿಸ್ತಾನದಲ್ಲಿ ಭಾನುವಾರ ಮತ್ತು ಸೋಮವಾರದಂದು ನಡೆದ ತಾಲಿಬಾನ್ ಉಗ್ರರ ಅಟ್ಟಹಾಸಕ್ಕೆ 20 ಪೊಲೀಸರು ಹಾಗೂ 10 ಯೋಧರು ಬಲಿಯಾಗಿದ್ದಾರೆ.

ಫರಾಹ್‌ ಪ್ರಾಂತ್ಯದಲ್ಲಿ ಪೊಲೀಸರ ವಾಹನದ ಮೇಲೆ ಭಯೋತ್ಪಾದಕರು ಎರಗಿದ್ದು, ಸ್ಥಳದಲ್ಲೇ 20 ಮಂದಿ ಮೃತಪಟ್ಟಿದ್ದಾರೆ. ಕನಿಷ್ಠ ಇಬ್ಬರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ದಾಳಿ ಹೊಣೆ ಹೊತ್ತಿರುವ ತಾಲಿಬಾನ್‌ ಸಂಘಟನೆ ಉಗ್ರರು, 25 ಪೊಲೀಸರನ್ನು ಬಲಿ ಪಡೆದಿರುವುದಾಗಿ ವಾಟ್ಸ್‌ ಆ್ಯಪ್‌ ಸಂದೇಶ ಹರಿಬಿಟ್ಟಿದ್ದಾರೆ. '

'ಪೊಲೀಸರ ನಾಲ್ಕು ವಾಹನಗಳನ್ನು ಧ್ವಂಸ ಮಾಡಲಾಗಿದೆ. ಅಪಾರ ಶಸ್ತ್ರಾಸ್ತ್ರ ವಶಪಡಿಸಿಕೊಂಡಿದ್ದೇವೆ,' ಎಂದು ಉಗ್ರ ಸಂಘಟನೆ ವಕ್ತಾರ ಕ್ವಾರಿ ಯೂಸುಫ್‌ ಅಹ್ಮದಿ ಹೇಳಿಕೊಂಡಿದ್ದಾನೆ.

ಮತ್ತೊಂದೆಡೆ, ಉತ್ತರ ಪರ್ಯಾಬ್‌ ಪ್ರಾಂತ್ಯದಲ್ಲಿ ಸೇನಾ ಚೆಕ್‌ಪೋಸ್ಟ್‌ ಮೇಲೆ ತಾಲಿಬಾನ ಉಗ್ರು ಸೋಮವಾರ ಗುಂಡಿನ ದಾಳಿ ನಡೆಸಿದ್ದು, 10 ಯೋಧರು ಮೃತಪಟ್ಟಿದ್ದಾರೆ. ಸ್ಥಳೀಯ ಉಗ್ರ ಮುಖಂಡ ಅಬ್ದುಲ್‌ ಘನಿ ಅಲಿಪೂರ್‌ ಬಂಧನವನ್ನು ಖಂಡಿಸಿ ರಾಜಧಾನಿ ಕಾಬೂಲ್‌ನಲ್ಲಿ ಸತತ ಎರಡನೇ ದಿನವಾದ ಸೋಮವಾರವೂ ಭಾರಿ ಪ್ರತಿಭಟನೆ ನಡುವೆಯೇ ತಾಲಿಬಾನಿಗಳು ದಾಳಿ ನಡೆಸಿದ್ದಾರೆ.

2015ರಲ್ಲಿ ಅಮೆರಿಕ ಮೂಲದ ನ್ಯಾಟೊ ಪಡೆಗಳು ತಾಲಿಬಾನ್‌ನಿಂದ ನಿರ್ಗಮಿಸಿದ ಬಳಿಕ, ಸ್ಥಳೀಯ ಭದ್ರತಾಪಡೆಗಳ ಮೇಲೆ ಉಗ್ರರ ದಾಳಿ ಗಣನೀಯವಾಗಿ ಹೆಚ್ಚಿದೆ. ಕಳೆದ ಮೂರು ವರ್ಷಗಳಲ್ಲಿ ಈವರೆಗೆ ಉಗ್ರರ ದಾಳಿಗೆ ಬಲಿಯಾದ ಆಫ್ಘನ್‌ ಯೋಧರ ಸಂಖ್ಯೆ 30,000 ದಾಟಿದೆ.