ಅಯೋಧ್ಯೆಯಲ್ಲಿ ಸಿಕ್ಕ ಗೋಡೆ, ಕಂಬಗಳು ಮಂದಿರದ ಅವಶೇಷ: 'ರಾಮನ ಪರ ವಕೀಲ'ರ ವಾದ

ಹೊಸ ದಿಲ್ಲಿ: ಅಯೋಧ್ಯೆಯ ಶ್ರೀರಾಮ ಜನ್ಮಭೂಮಿ ವಿವಾದ ಪ್ರಕರಣದ ಸಂಬಂಧ ಗುರುವಾರ ನಡೆದ 36ನೇ ದಿನದ ಸರಣಿ ವಿಚಾರಣೆ ವೇಳೆ ರಾಮ್‌ ಲಲ್ಲಾ ಪರ ವಾದಿಸಿದ ವಕೀಲ ವೈದ್ಯನಾಥನ್‌, ಈಗಾಗಲೇ ಉತ್ಖನನ ವೇಳೆ ಸಿಕ್ಕಂತಹ ಕಂಬಗಳು, ಗೋಡೆಗಳ ಅವಶೇಷಗಳಿಂದ ಈ ಮುಂಚೆ ಮಂದಿರ ಇತ್ತು ಎಂಬುದು ಸಾಬೀತಾಗಿದೆ. ಅವಶೇಷಗಳೇ ಮಂದಿರ ಇತ್ತು ಎನ್ನುವುದಕ್ಕೆ ಪುರಾವೆಯಾಗಿದೆ. ಹಾಗಾಗಿ ಮುಸ್ಲಿಂ ಸಂಘಟನೆಗಳ ವಾದದಲ್ಲಿ ಹುರುಳಿಲ್ಲ ಎಂದಿದ್ದಾರೆ.

ಸಿಜೆಐ ರಂಜನ್‌ ಗೊಗೋಯ್‌ ನೇತೃತ್ವದ ಪಂಚ ಸದಸ್ಯ ಸಾಂವಿಧಾನಿಕ ಪೀಠ ನಡೆಸಿದ ವಿಚಾರಣೆ ವೇಳೆ ವಾದ ಮಂಡಿಸಿದ ವೈದ್ಯನಾಥನ್‌, ವಿವಾದಿತ ಸ್ಥಳದಲ್ಲಿ ಈ ಮುನ್ನ ಯಾವುದೇ ಕಟ್ಟಡ ಇರಲಿಲ್ಲ ಎಂದು ಮುಸ್ಲಿಂ ಸಂಘಟನೆಗಳು ವಾದಿಸಿದ್ದವು. ಬಳಿಕ ಅಲ್ಲಿ ಸಿಕ್ಕ ಅವಶೇಷಗಳು ಇಸ್ಲಾಮಿಕ್‌ ಕಟ್ಟಡವೊಂದಕ್ಕೆ ಸೇರಿದ್ದವು ಎಂದು ವಾದಿಸಿವೆ. ಆದರೆ, ಅವಶೇಷಗಳು ಮಂದಿರವನ್ನು ಪ್ರತಿನಿಧಿಸುತ್ತಿವೆ ಎಂದು ನಾವು ಹೇಳುತ್ತಿದ್ದೇವೆ. ಸ್ಪಷ್ಟವಾಗಿ ಮಂದಿರದ್ದೇ ಭಾಗಗಳೆಂದು ನೋಡಿದಾಗ ಹೇಳಬಹುದಾಗಿದೆ. ಮಂದಿರವನ್ನು ಕೆಡವಲಾಗಿತ್ತು. ಭಾರಿ ಗಾತ್ರದ ಗೋಡೆಯೊಂದು ಸಿಕ್ಕಿದ್ದು, ವಿವಾದಿತ ಸ್ಥಳ ಸಾರ್ವಜನಿಕ ಆಸ್ತಿಯಾಗಿತ್ತು ಎಂದು ಸಾಬೀತುಪಡಿಸಿದೆ ಎಂದು ವೈದ್ಯನಾಥನ್ ವಿವರಿಸಿದ್ದಾರೆ.

ಇದಕ್ಕೆ ಪ್ರತಿವಾದ ಮಂಡಿಸಿದ ಮುಸ್ಲಿಂ ಸಂಘಟನೆಗಳ ಪರ ವಕೀಲ ರಾಜೀವ್‌ ಧವನ್‌, ಭಾರತೀಯ ಪುರಾತತ್ವ ಶಾಸ್ತ್ರ ಇಲಾಖೆ ವರದಿಯಂತೆ ವಿವಾದಿತ ಸ್ಥಳದಲ್ಲಿ ಮಂದಿರವನ್ನು ಕೆಡವಲಾದ ಬಗ್ಗೆ ಸಾಕ್ಷ್ಯಗಳು ಲಭ್ಯವಾಗಿಲ್ಲ ಎಂದರು.

ಯುದ್ಧೋನ್ಮಾದಿ ಪಾಕ್ ಸೇನೆಗೇ ತಟ್ಟಿದ ಆರ್ಥಿಕ ಕುಸಿತ!: ನಯಾಪೈಸೆ ಏರಿಕೆ ಕಂಡಿಲ್ಲ ರಕ್ಷಣಾ ಬಜೆಟ್