ಹೊಸದಿಲ್ಲಿ: ಯೋಗ ಆಯ್ತು, ಬ್ಯುಸಿನೆಸ್‌ ಆಯ್ತು, ಟಿವಿ ಶೋ ಕೂಡಾ ಆಯ್ತು. ಇದೀಗ ಚಿತ್ರವೊಂದರಲ್ಲಿ ಅಭಿನಯ ಚಾತುರ್ಯ ಮೆರೆಯಲು ಕೂಡಾ ಬಾಬಾ ರಾಮ್‌ದೇವ್‌ ಸಜ್ಜಾಗುತ್ತಿದ್ದಾರೆ ಎಂಬ ಸುದ್ದಿ ಬಂದಿದೆ. ಸದ್ಯ ರಿಯಾಲಿಟಿ ಶೋ 'ಓಂ ಶಾಂತಿ ಓಂ'ನ ತೀರ್ಪುಗಾರರಾಗಿರುವ ರಾಮ್‌ದೇವ್‌, 'ಏ ಹೈ ಇಂಡಿಯಾ' ಎಂಬ ಚಿತ್ರದಲ್ಲಿ ಅಥಿತಿ ಪಾತ್ರ ಮಾಡುತ್ತಿದ್ದಾರೆ.
ಈಗಾಗಲೇ ತಮ್ಮ ಬೆಂಬಲಿಗರ ನಡುವೆ ಈ ಚಿತ್ರದ ಕುರಿತು ಬಾಬಾ ಪ್ರಚಾರವನ್ನೂ ಆರಂಭಿಸಿದ್ದಾರೆ ಎಂದು ವರದಿಯಾಗಿದೆ. ಲೋಮಹರ್ಷ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಚಿತ್ರದಲ್ಲಿ ಎನ್‌ಆರ್‌ಐಯೊಬ್ಬ ಸ್ವದೇಶಕ್ಕೆ ಮರಳಿ, ಸತ್ಯದರ್ಶನದ ಬಳಿಕ ಭಾರತದ ಕುರಿತು ಪ್ರೀತಿ ಬೆಳೆಸಿಕೊಳ್ಳುವ ಕತೆ ಇದೆ.
ಮಾಹಿತಿ ಹಾಗೂ ಪ್ರಸರಣ ಸಹಾಯಕ ಸಚಿವ ರಾಜವರ್ಧನ್‌ ಸಿಂಗ್‌ ರಾಥೋರ್‌, ಚಿತ್ರದ ಟ್ರೇಲರನ್ನು ಹೊಸದಿಲ್ಲಿಯಲ್ಲಿ ಬಿಡುಗಡೆ ಮಾಡಿದ್ದಾರೆ.