ಕೆಳಗೆ ರಾಷ್ಟ್ರೀಯ ಹೆದ್ದಾರಿ ಅಂಡರ್‌ಪಾಸ್‌, ಮೇಲೆ ವಿಮಾನ ರನ್‌ ವೇ

ವಾರಣಾಸಿ: ವಾರಣಾಸಿಯಿಂದ 26 ಕಿಮೀ ದೂರದಲ್ಲಿರುವ ಲಾಲ್ ಬಹಾದ್ದೂರ್ ಶಾಸ್ತ್ರಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ (ಬಾಬತ್‌ಪುರ) ಇನ್ನು ಕೆಲವೇ ದಿನಗಳಲ್ಲಿ ರನ್ ವೇ ಕೆಳಗೆ ರಾಷ್ಟ್ರೀಯ ಹೆದ್ದಾರಿ ಹಾದುಹೋಗುವ ದೇಶದ ಮೊದಲ ವಿಮಾನ ನಿಲ್ದಾಣವೆಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ.

ಅಂಡರ್ ಪಾಸ್ ನಿರ್ಮಿಸಿ ದೊಡ್ಡ ವಿಮಾನಗಳು ಇಳಿಯಲು ನೆರವಾಗುವಂತೆ ರನ್ ವೇಯನ್ನು ವಿಸ್ತರಿಸಲಾಗುತ್ತಿದೆ ಮತ್ತು ಹೆದ್ದಾರಿಯನ್ನು ಚತುಷ್ಪಥವಾಗಿ ಪರಿವರ್ತಿಸಲಾಗುತ್ತಿದೆ.

ಪ್ರಸ್ತುತ ಇರುವ ರನ್ ವೇ 2,750 ಮೀ ವಿಸ್ತಾರವಾಗಿದ್ದು ಇದನ್ನು 4,075ಮೀ ಗೆ ವಿಸ್ತರಿಸಲಾಗುತ್ತಿದೆ. ದೊಡ್ಡ ದೊಡ್ಡ ಕಾರ್ಗೋ ಮತ್ತು ಬೋಯಿಂಗ್ ವಿಮಾನಗಳು ಇಳಿಯಲು ಅನುಕೂಲವಾಗುವಂತೆ ಮಾಡಲು ರನ್ ವೇಯನ್ನು ವಿಸ್ತರಿಸಲಾಗುತ್ತದೆ. ರನ್ ವೇ ವಿಸ್ತರಣೆ ಮತ್ತು ಅಂಡರ್‌ಪಾಸ್ ನಿರ್ಮಾಣ ಕಾರ್ಯ ಏಕಕಾಲಕ್ಕೆ ಆರಂಭವಾಗಲಿದೆ. ಭಾರತ ವಿಮಾನ ನಿಲ್ದಾಣ ಪ್ರಾಧಿಕಾರ ಇದಕ್ಕೆ ಅನುಮತಿ ನೀಡಿದೆ, ಎಂದು ಅಧಿಕಾರಿಗಳು ಖಚಿತ ಪಡಿಸಿದ್ದಾರೆ.