ಹೊಸದಿಲ್ಲಿ: ಸೌದಿ ಅರೇಬಿಯಾದಿಂದ ಭಾರತದತ್ತ ಬರುತ್ತಿದ್ದ ಜೆಟ್ ಏರ್ವೇಸ್ ವಿಮಾನದಲ್ಲಿ ಮಾರ್ಗ ಮಧ್ಯೆಯೇ ಅನಿರೀಕ್ಷಿತ ಅತಿಥಿಯೊಬ್ಬರ ಆಗಮನವಾಗಿದೆ.
ಭಾನುವಾರ ಬೆಳಿಗ್ಗೆ 2.55ಕ್ಕೆ ದಮ್ಮಮ್ನಿಂದ ಕೊಚ್ಚಿಗೆ ಹೊರಟಿದ್ದ ಜೆಟ್ ಏರ್ವೇಸ್ನ '9ಡಬ್ಲ್ಯು 569' ವಿಮಾನದಲ್ಲಿ, ಮಾರ್ಗ ಮಧ್ಯೆ ಮಹಿಳೆ ಮಗುವಿಗೆ ಜನ್ಮ ನೀಡಿದ್ದಾರೆ.
ಮಹಿಳೆಗೆ ಹೆರಿಗೆ ನೋವು ಕಾಣಿಸಿಕೊಂಡಿದ್ದು, ವೈದ್ಯಕೀಯ ಚಿಕಿತ್ಸೆ ಅಗತ್ಯವಿದೆ ಎಂದು ವಿಮಾನದ ಸಿಬ್ಬಂದಿ ತುರ್ತು ಘೋಷಣೆ ಮೊಳಗಿಸಿದರು. ತಕ್ಷ ಣ ವಿಮಾನವನ್ನು ಮುಂಬಯಿನತ್ತ ತಿರುಗಿಸಲಾಯಿತು. ವಿಮಾನ ಇನ್ನೂ ಅರಬ್ಬಿ ಸಮುದ್ರದ ಮೇಲ್ಭಾಗದಲ್ಲಿ ಹಾರುತ್ತಿದ್ದಾಗಲೇ ತಾಯಿ ಮಗುವಿಗೆ ಜನ್ಮ ನೀಡಿದ್ದಾರೆ.
ವಿಮಾನದ ಸಿಬ್ಬಂದಿ ಮತ್ತು ಕೇರಳಕ್ಕೆ ಪ್ರಯಾಣಿಸುತ್ತಿದ್ದ ಶುಶ್ರೂಷಕಿಯರು ಮಹಿಳೆಗೆ ಹೆರಿಗೆ ಮಾಡಿಸಲು ನೆರವಾದರು. ವಿಮಾನದಲ್ಲಿಯೇ ಹೊಸ ಅತಿಥಿಯ ಆಗಮನ ಎಲ್ಲರನ್ನು ಪುಳಕಿತಗೊಳಿಸಿತು.
ವಿಮಾನ ಮುಂಬಯಿನಲ್ಲಿ ಲ್ಯಾಂಡ್ ಆಗಿದ್ದು, ತಕ್ಷ ಣ ತಾಯಿ ಮತ್ತು ನವಜಾತ ಶಿಶುವನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ.
ಲೈಫ್ ಟೈಮ್ ಫ್ರೀ ಟಿಕೆಟ್: ವಿಮಾನ ಪ್ರಯಾಣದ ವೇಳೆ ಜನಿಸಿದ ಮಗುವಿಗೆ ಜೆಟ್ ಏರ್ವೇಸ್ ಸಂಸ್ಥೆ ಜೀವನವಿಡೀ ಉಚಿತ ವಿಮಾನಯಾನ ಭಾಗ್ಯ ಕಲ್ಪಿಸಿದೆ. ತಮ್ಮ ವಿಮಾನದಲ್ಲಿ ಜನಿಸಿದ ಮೊದಲ ಮಗುವಿಗೆ ಬರ್ತ್ ಡೇ ಗಿಫ್ಟ್ ಆಗಿ, ಲೈಪ್ ಟೈಮ್ ಫ್ರೀ ಪಾಸ್ ನೀಡುವುದಾಗಿ ಜೆಟ್ ಏರ್ವೇಸ್ ಘೋಷಿಸಿದೆ.