ಬಿಸಿ ಸಾಂಬಾರಲ್ಲಿ ಬಿದ್ದು 18 ತಿಂಗಳ ಮಗು ಸಾವು

ಚೆನ್ನೈ: ಬಿಸಿ ಸಾಂಬಾರಿದ್ದ ಪಾತ್ರೆಯಲ್ಲಿ ಬಿದ್ದು 18 ತಿಂಗಳ ಮಗು ದುರ್ಮರಣವನ್ನಪ್ಪಿದ ಹೃದಯ ಕಲಕುವ ಘಟನೆ ತಮಿಳುನಾಡಿನ ಮನ್ನಾಡಿಯ ಸ್ಟ್ರಿಂಜರ್ಸ್ ರಸ್ತೆಯಲ್ಲಿ ನಡೆದಿದೆ.

ಪತಿಯಿಂದ ದೂರವಾಗಿದ್ದ ತಾಯಿ ಸೂರ್ಯ (25) ಜತೆ ಮಗು ವಾಸಿಸುತ್ತಿತ್ತು ಎಂದು ತಿಳಿದುಬಂದಿದೆ. ಒಂದು ವರ್ಷದ ಹಿಂದೆ ಸೂರ್ಯ ಮೆಕ್ಯಾನಿಕ್ ಆಗಿರುವ ಪತಿ ಮುರುಗನ್‌ನನ್ನು ಬಿಟ್ಟು ಪುಟ್ಟ ಮಗುವಿನೊಂದಿಗೆ ತಾತ್ಕಾಲಿಕ ಟೆಂಟ್‌ನಲ್ಲಿ ವಾಸಿಸುತ್ತಿದ್ದಳು. ಅಡುಗೆ ಮಾಡಿ ಮಾರಿ ಆಕೆ ಜೀವನ ನಿರ್ವಹಣೆ ಮಾಡುತ್ತಿದ್ದಳು.

ಶನಿವಾರ ಬೆಳಗ್ಗೆ 10.30 ರ ಸುಮಾರಿಗೆ ಸೂರ್ಯ ಸಾಂಬಾರು ಮಾಡಿ, ಪಾತ್ರೆಯನ್ನು ನೆಲದ ಮೇಲಿಟ್ಟು ಬೇರೆ ಕೆಲಸದಲ್ಲಿ ವ್ಯಸ್ತಳಾಗಿದ್ದಳು. ಸ್ವಲ್ಪ ಹೊತ್ತಿನಲ್ಲಿ ಆಕೆಗೆ ಮಗು ಅಳುವ ಸದ್ದು ಕೇಳಿಸಿದೆ. ಏನಾಗಿದೆ ಎಂದು ನೋಡಿದಾಗ ಮಗು ಭೂಮಿಕಾ ಮೇಲೆ ಸಂಪೂರ್ಣ ಸಾಂಬಾರು ಚೆಲ್ಲಿತ್ತು. ತಕ್ಷಣ ಮಗುವನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಆದರೆ 51% ರಷ್ಟು ಸುಟ್ಟ ಗಾಯಗಳಿಂದ ಬಳಲುತ್ತಿದ್ದ ಮಗು ಭಾನುವಾರ KMC ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆಯಿತು.

ಕುದಿಯುತ್ತಿದ್ದ ಸಾಂಬಾರನ್ನು ಸೂರ್ಯ ನೆಲದ ಮೇಲಿಟ್ಟಿದ್ದಳು. ಅಲ್ಲೇ ಪಕ್ಕದಲ್ಲಿ ಆಟವಾಡುತ್ತಿದ್ದ ಮಗು ಆಕಸ್ಮಿಕವಾಗಿ ಅದರಲ್ಲಿ ಬಿದ್ದು ಬಿಟ್ಟಿತು, ಎಂದು ಪೊಲೀಸರು ತಿಳಿಸಿದ್ದಾರೆ.

ಅಸಹಜ ಸಾವಿನ ಪ್ರಕರಣ ದಾಖಕಳಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.