ಬಾಲಾಕೋಟ್‌ನಲ್ಲಿ 170 ಉಗ್ರರು ಔಟ್‌

ಭಾರತದ ವಾಯುದಾಳಿ ಬಗ್ಗೆ ಇಟಲಿ ಪತ್ರಕರ್ತೆ ಮಹತ್ವದ ವರದಿ

ಹೊಸದಿಲ್ಲಿ: ಭಾರತವು ಫೆಬ್ರವರಿ 26ರಂದು ಬಾಲಾಕೋಟ್‌ ಮೇಲೆ ನಡೆಸಿದ ವಾಯು ದಾಳಿಯಲ್ಲಿ ಯಾರೊಬ್ಬರೂ ಸತ್ತಿಲ್ಲ ಎಂಬ ಪಾಕಿಸ್ತಾನದ ಹೇಳಿಕೆಯನ್ನು ಇಟಲಿಯ ಪತ್ರಕರ್ತೆಯೊಬ್ಬರು ಸುಳ್ಳು ಎಂದು ಸಾಕ್ಷಿ ಸಮೇತ ಬಯಲಿಗೆಳೆದಿದ್ದು, ಆ ದಾಳಿಯಲ್ಲಿ 170ರಷ್ಟು ಜೈಶೆ ಮೊಹಮ್ಮದ್‌ ಉಗ್ರರು ಹತರಾಗಿದ್ದಾರೆ ಎಂದು ವರದಿ ಮಾಡಿದ್ದಾರೆ.

ದಕ್ಷಿಣ ಏಷ್ಯಾ ಭಾಗದ ವರದಿಗಾರಿಕೆಯಲ್ಲಿ ವಿಶೇಷಜ್ಞೆಯಾಗಿರುವ ಪತ್ರಕರ್ತೆ ಫ್ರಾನ್ಸಿಸ್ಕಾ ಮರೀನೋ ಈ ವಿವರ ನೀಡಿದ್ದು, ದಾಳಿ ನಡೆದ ಮುಂಜಾನೆ ಆರು ಗಂಟೆಗೆ ಪಾಕಿಸ್ತಾನಿ ಸೇನೆಯ ಶಿಂಕಿಯಾಗಿ ನೆಲೆಯ ಸೈನಿಕರು ಬಾಲಾಕೋಟ್‌ಗೆ ಬಂದಿದ್ದು, ಶವಗಳು ಮತ್ತು ಗಾಯಾಳುಗಳನ್ನು ಅಲ್ಲಿಂದ ಸಾಗಿಸಿದ್ದಾರೆ. ಸ್ಥಳದಲ್ಲೇ 150 ಮಂದಿ ಮೃತಪಟ್ಟರೆ, 20 ಮಂದಿ ಆಸ್ಪತ್ರೆಯಲ್ಲಿ ಪ್ರಾಣ ಕಳೆದುಕೊಂಡಿದ್ದಾರೆ. ಇನ್ನೂ 45 ಮಂದಿ ಈಗಲೂ ಸೇನಾ ವೈದ್ಯರಿಂದ(ಆಸ್ಪತ್ರೆಯಲ್ಲಿ ಅಲ್ಲ) ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಮೂಲಗಳನ್ನು ಉಲ್ಲೇಖಿಸಿ ಮರೀನೊ ವರದಿ ಮಾಡಿದ್ದಾರೆ.

ಸತ್ತವರಲ್ಲಿ 11 ಮಂದಿ ಬಾಂಬ್‌ ತಯಾರಕರು, ಶಸ್ತ್ರಾಸ್ತ್ರ ತರಬೇತುದಾರರು ಸೇರಿದ್ದಾರೆ ಎನ್ನುತ್ತಾರೆ ಮರೀನೊ.