ಸಾಲಕ್ಕಾಗಿ ಅಪರಿಚತರಿಗೆ ದಾಖಲೆ ಪತ್ರ ನೀಡ್ತೀರಾ? ಹುಷಾರ್

ವಡೋದರಾ: ಬ್ಯಾಂಕ್ ಆಫ್ ಬರೋಡಾದಿಂದ 1.45 ಕೋಟಿ ರೂಪಾಯಿ ಸಾಲ ಮರುಪಾವತಿಸಿ ಎಂದು ನೋಟಿಸ್ ಬಂದಾಗ ಕರ್ಜನ್ ಪಟ್ಟಣದಲ್ಲಿ ಬೋಧನಾ ತರಗತಿ ನಡೆಸುತ್ತಿರುವ ಸುರೇಂದ್ರಸೀನ್ ಚಾವ್ಡಾ ಅಕ್ಷರಶಃ ಆಘಾತಕ್ಕೊಳಗಾದರು.

ಬ್ಯಾಂಕ್ ನೀಡಿರುವ ನೋಟಿಸ್‌ನಲ್ಲಿ ಜಾಮೀನುದಾರ ಎಂದು ಉಲ್ಲೇಖಿಸಲಾಗಿದೆ. ಆದರೆ, ಚಾವ್ಡಾ ಅವರು ಯಾವುದೇ ಬ್ಯಾಂಕ್‌ನಲ್ಲಿ ಸಾಲವೂ ಪಡೆದಿಲ್ಲ, ಬೇರೊಬ್ಬರ ಸಾಲಕ್ಕೆ ಜಾಮೀನುದಾರೂ ಆಗಿಲ್ಲ. ಹಾಗಿದ್ದರೇ ಬ್ಯಾಂಕ್ ಅವರಿಗೇಕೆ ನೋಟಿಸ್ ಜಾರಿ ಮಾಡಿದೆ ಎನ್ನುವುದು ಯಕ್ಷಪ್ರಶ್ನೆಯಾಗಿದೆ.

ಚಾವ್ಡಾ ನೋಟಿಸ್ ಪರಿಶೀಲಿಸಿದ್ದು, ವಡೋದರಾ ಮೂಲದ ಎಂ ಟೆಕ್ ಹಾರ್ಡ್‌ವೇರ್ ಪ್ರೈವೇಟ್ ಲಿಮಿಟೆಡ್‌ನ ನಿರ್ದೇಶಕರು ಸಾಲ ಪಡೆದಿರುವುದು ಬೆಳಕಿಗೆ ಬಂದಿದೆ.

2014ರಲ್ಲಿ ಪತ್ರಿಕೆಯ ಜಾಹೀರಾತು ನೋಡಿ ಜಾವ್ಡಾ ಅವರು 15 ಲಕ್ಷ ರೂಪಾಯಿ ಶಿಕ್ಷಣ ಸಾಲಕ್ಕಾಗಿ ಎಂ ಟೆಕ್ ಹಾರ್ಡ್‌ವೇರ್ ಪ್ರೈವೇಟ್ ಲಿಮಿಟೆಡ್‌ನ ನಿರ್ದೇಶಕರನ್ನು ಭೇಟಿ ಮಾಡಿದ್ದರು. ಸಾಲ ಪಡೆಯಲು ರಾಜೇಶ್ ಸೋನಿ ಮತ್ತು ಕೌಮಿಲ್ ಮೋದಿ ಅವರಿಗೆ ಅಧಿಕೃತ ದಾಖಲೆಗಳನ್ನು ನೀಡಿದ್ದರು. ಆದರೆ, ಈ ಇಬ್ಬರು ವಂಚಕರು ಕಂಪನಿಯ ಹೆಸರಿನಲ್ಲಿ ಸಾಲ ಪಡೆದು ಜಾವ್ಡಾ ಅವರನ್ನು ಜಾಮೀನು ಮಾಡಿ ವಂಚಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ನನ್ನ ದಾಖಲೆಗಳನ್ನು ದುರ್ಬಬಳಕೆ ಮಾಡಿಕೊಂಡು ವಂಚಿಸಿದ್ದಾರೆ. ಇದಕ್ಕೂ ನನಗೂ ಯಾವುದೇ ಸಂಬಂಧ ಇಲ್ಲ. ಬೇಕಿದ್ದರೆ ಬ್ಯಾಂಕ್‌ನ ಸಿಸಿಟಿವಿ ಪರಿಶೀಲಿಸಿ ಎಂದು ಚಾವ್ಡಾ ಪೊಲೀಸರ ಬಳಿ ಮನವಿ ಮಾಡಿಕೊಂಡಿದ್ದಾರೆ.