3ನೇ ಮಗುವಿನಿಂದ ಬ್ಯಾಂಕ್‌ ಅಧ್ಯಕ್ಷ ಸ್ಥಾನಕ್ಕೆ ಕತ್ತರಿ

ಮುಂಬಯಿ: ಮೂರನೇ ಮಗು ಆದ ಕಾರಣಕ್ಕೆ ವಸಾಯ್‌ನಲ್ಲಿರುವ ಕೋ-ಆಪರೇಟಿವ್‌ ಬ್ಯಾಂಕ್‌ನ ಅಧ್ಯಕ್ಷರ ಸ್ಥಾನಕ್ಕೆ ಕುತ್ತು ಬಂದಿದೆ. ಸೆಕ್ಷನ್‌ 73CA ಆಫ್‌ ಮಹಾರಾಷ್ಟ್ರ ಕೋ ಆಪರೇಟಿವ್‌ ಸೊಸೈಟಿಸ್‌ ಆ್ಯಕ್ಟ್‌ ಪ್ರಕಾರ ಸಂಸ್ಥೆಯಲ್ಲಿ ನಿರ್ದೇಶಕ, ಅಧ್ಯಕ್ಷರಾದವರು ಮೂರನೇ ಮಗು ಮಾಡಿಕೊಳ್ಳುವಂತಿಲ್ಲ.

ಸಚಿನ್‌ ಪಿರೇರಾ ಅವರನ್ನು ಬಸೈನ್‌ ಕ್ಯಾಥೊಲಿಕ್‌ ಕೋ ಆಪರೇಟಿವ್‌ ಬ್ಯಾಂಕ್‌ನ ಅಧ್ಯಕ್ಷ ಸ್ಥಾನದಿಂದ ಅನರ್ಹಗೊಳಿಸಿ ಬಾಂಬೆ ಹೈಕೋರ್ಟ್‌ ನ್ಯಾಯಮೂರ್ತಿ ಎಂ.ಎಸ್‌. ಸಂಕ್ಲೇಚ ಆದೇಶ ಪ್ರಕಟಿಸಿದ್ದಾರೆ. ಸಂಸ್ಥೆಯ ಸದಸ್ಯರಾಗಿ ಚುನಾವಣೆಯ ಶಾಸನಬದ್ಧ ನಿಯಮಗಳನ್ನು ಮೀರಿದ್ದರಿಂದ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಕೋರ್ಟ್‌ ನಿರ್ದೇಶಿಸಿದೆ.

ಸಚಿನ್‌ ಪಿರೇರಾ ಅವರು 2015ರ ಜೂನ್‌ನಲ್ಲಿ ಐದು ವರ್ಷಗಳ ಅವಧಿಗೆ ಸೊಸೈಟಿಯ ನಿರ್ದೇಶಕರಾಗಿ ಆಯ್ಕೆಯಾಗಿದ್ದರು. ಬಳಿಕ ಅಧ್ಯಕ್ಷರಾಗಿದ್ದಾರೆ. ಕಳೆದ ವರ್ಷ ಮಾರ್ಚ್‌ನಲ್ಲಿ ಅವರಿಗೆ ಮೂರನೇ ಮಗುವಾಗಿದೆ. ಇದು ಸೊಸೈಟಿ ನಿಯಮಕ್ಕೆ ವಿರುದ್ಧವಾಗಿದೆ. ಹೀಗಾಗಿ ಅವರಿಗೆ ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಷೋಕಾಸ್‌ ನೋಟಿಸ್‌ ನೀಡಲಾಗಿತ್ತು. ಅವರನ್ನು ಸ್ಥಾನದಿಂದ ಅನರ್ಹಗೊಳಿಸುವಂತೆ ಮಾರ್ಚ್‌ನಲ್ಲಿ ಹೈಕೋರ್ಟ್‌ ಸೂಚಿಸಿತ್ತು, ಆದರೆ ಅವರು ಇದನ್ನು ಪ್ರಶ್ನಿಸಿ ಸಹಕಾರ ಸಚಿವರಿಗೆ ಮನವಿ ಸಲ್ಲಿಸಿದ್ದರು. ಆದರೆ ಏನೂ ಪ್ರಯೋಜನವಾಗಿಲ್ಲ.