ಅಪಾಯಕ್ಕೆ ಸಿದ್ಧರಾಗಿದ್ದ ವಾಜಪೇಯಿ

ಹೊಸದಿಲ್ಲಿ: ಪೋಖ್ರಣ್‌ನಲ್ಲಿ ಅಣ್ವಸ್ತ್ರ ಪರೀಕ್ಷೆಗೂ ಮುನ್ನ ಬಲಿಷ್ಠ ರಾಷ್ಟ್ರಗಳಿಂದ ಆರ್ಥಿಕ ನಿರ್ಬಂಧದಂತಹ ಪರಿಣಾಮಗಳಿಗೆ ಸಿದ್ಧರಾಗಿರುವಂತೆ ಆಗಿನ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರು ಹಣಕಾಸು ಸಚಿವರಾಗಿದ್ದ ಯಶವಂತ್‌ ಸಿನ್ಹಾ ಅವರಿಗೆ ಕಿವಿಮಾತು ಹೇಳಿದ್ದರು. ಸಿನ್ಹಾ ಅವರು ಸೋಮವಾರ ಲೋಕಾರ್ಪಣೆಗೊಳ್ಳಲಿರುವ ತಮ್ಮ ಆತ್ಮಚರಿತ್ರೆ 'ರಿಲೆಂಟ್‌ಲೆಸ್‌'ನಲ್ಲಿ ವಾಜಪೇಯಿ ಜತೆಗಿನ ಒಡನಾಟವನ್ನು ಮೆಲುಕು ಹಾಕಿದ್ದು, ಆ ಅಧ್ಯಾಯದಲ್ಲಿ ಈ ಘಟನೆಯನ್ನು ವಿವರಿಸಿದ್ದಾರೆ. ''1998ರ ಮೇ ಆರಂಭದಲ್ಲಿ ಒಂದು ದಿನ ಬೆಳಗ್ಗೆಯೇ ವಾಜಪೇಯಿ ಅವರು ತಮ್ಮ ನಿವಾಸಕ್ಕೆ ನನ್ನನ್ನು ತುರ್ತಾಗಿ ಬರಹೇಳಿದ್ದರು. ಅವರ ಖಾಸಗಿ ಕೋಣೆಯಲ್ಲಿದ್ದರು. ಆಗಲೇ ಇದ್ಯಾವುದೋ ರಹಸ್ಯ ವಿಚಾರವೇ ಇರಬೇಕು ಎಂದು ತೀರ್ಮಾನಿಸಿದ್ದೆ. ವಾಜಪೇಯಿ ಅವರು ಅಣ್ವಸ್ತ್ರ ಪರೀಕ್ಷೆ ಬಗ್ಗೆ ಹೇಳಿದ ಮಾತು ಕೇಳಿ ನನಗೆ ಒಂದು ಕಡೆ ನಡುಕ ಮತ್ತೊಂದು ಕಡೆ ಹೆಮ್ಮೆಯಾಗಿತ್ತು,'' ಎಂದು ಸಿನ್ಹಾ ಹೇಳಿದ್ದಾರೆ.