ಬೈಕ್, ಮೊಬೈಲ್ ಕೊಡಿಸದ್ದಕ್ಕೆ ಹೆತ್ತ ತಾಯಿಗೆ ಬೆಂಕಿ ಹಚ್ಚಿದ ಬಾಲಕ

ಕೋಲ್ಕತಾ: ಹೊಸ ಬೈಕ್ ಮತ್ತು ಮೊಬೈಲ್ ಕೊಡಿಸಲು ನಿರಾಕರಿಸಿದ್ದಕ್ಕೆ ದುರುಳ ಮಗನೊಬ್ಬ ಹೆತ್ತ ತಾಯಿಯನ್ನು ಮನೆಯಲ್ಲಿ ಕೂಡಿ ಹಾಕಿ ಬೆಂಕಿ ಹಚ್ಚಿದ ಬೆಚ್ಚಿಬೀಳಿಸುವ ಘಟನೆ ಸೋಮವಾರ ರಾತ್ರಿ ಪಶ್ಚಿಮ ಬಂಗಾಳದ ಜಗತ್ಪುರದಲ್ಲಿ ನಡೆದಿದೆ.

ಸೋಮಾ ಮನ್ನಾ ( 40) ಮಗನಿಂದಲೇ ದಹನಕ್ಕೊಳಗಾದ ತಾಯಿಯಾಗಿದ್ದು 90% ಸುಟ್ಟ ಗಾಯಗಳಿಂದ ಬಳಲುತ್ತಿರುವ ಆಕೆಯನ್ನು ಆರ್ಜಿಕರ್ ಮೆಡಿಕಲ್ ಕಾಲೇಜಿಗೆ ದಾಖಲಿಸಲಾಗಿದೆ.

ಕಳೆದ 8 ತಿಂಗಳ ಹಿಂದೆ ಪತಿಯಿಂದ ದೂರವಾಗಿದ್ದ ಸೋಮಾ ಕಿರಿಯ ಮಗನೊಂದಿಗೆ ಜಗತ್ಪುರದ ಸುಲುಂಗುರಿ ಪ್ರದೇಶದಲ್ಲಿ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದಳು. ಆಕೆಯ ಪತಿ ಮತ್ತು ಹಿರಿಯ ಮಗ ಅಲ್ಲೇ ಹತ್ತಿರದ ಪ್ರದೇಶದಲ್ಲಿ ವಾಸವಾಗಿದ್ದಾರೆ. ಸೋಮಾ ಚಿಕ್ಕ ಗಾರ್ಮೆಂಟ್ ಶಾಪ್ ನಡೆಸುತ್ತಿದ್ದು, ಮಗ ( ಆರೋಪಿ) ಹತ್ತಿರದ ಶಾಲೆಯಲ್ಲಿ ಓದುತ್ತಿದ್ದ.

ಇತ್ತೀಚಿಗೆ ಮಗ ತಾಯಿಯಲ್ಲಿ ಮೊಬೈಲ್ ಮತ್ತು ಬೈಕ್‌ಗಾಗಿ ಒತ್ತಾಯಿಸುತ್ತಲೇ ಇದ್ದ ಎಂದು ಆಕೆ ವಿಚಾರಣೆ ವೇಳೆ ಹೇಳಿಕೆ ನೀಡಿದ್ದಾಳೆ.

ಸೋಮಾ ಮಗನ ಮೇಲೆ ಅತೀವ ಪ್ರೀತಿ. ಆತ ಆಕೆಯಲ್ಲಿ ಹೊಸ ಬೈಕ್ ಮತ್ತು ದುಬಾರಿ ಮೊಬೈಲ್ ಕೊಡಿಸೆಂದು ಕೇಳಿದ್ದ . ಈ ವಾರ ಪರೀಕ್ಷೆ ಮುಗಿಯಲಿದ್ದು ಬಳಿಕ ಅವನು ಕೇಳಿದ್ದನ್ನೆಲ್ಲ ಕೊಡಿಸುವುದಾಗಿ ಆಕೆ ಹೇಳಿದ್ದಳು. ಆದರೆ ಅದಕ್ಕಾಗಿ ಕಾಯಲು ಇಚ್ಛಿಸದ ಆತ ತಾಯಿಯನ್ನು ಮನೆಯೊಳಗೆ ಕೂಡಿ ಹಾಕಿ ಮೈಮೇಲೆ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿ ಪರಾರಿಯಾದ. ಆಕೆಯ ಕಿರುಚಾಟ ಕೇಳಿ ನಾವು ಬಾಗಿಲು ಮುರಿದಾಗ ತಲೆಯಿಂದ ಕಾಲಿನವರೆಗೂ ಬೆಂಕಿ ಹೊತ್ತಿಕೊಂಡ ಸ್ಥಿತಿಯಲ್ಲಾಕೆ ಹೊರಗೋಡಿ ಬಂದಳು, ಸ್ಥಳೀಯರು ಸೇರಿ ಬೆಂಕಿಯನ್ನು ನಂದಿಸಿ ಆಸ್ಪತ್ರೆಗೆ ಸೇರಿಸಿದರು ಎಂದು ಮನೆ ಮಾಲೀಕಳು ಪೊಲೀಸರಿಗೆ ತಿಳಿಸಿದ್ದಾರೆ.

ಯುವಕನನ್ನು ರಿಮ್ಯಾಂಡ್ ಹೋಮ್‌ಗೆ ಕಳುಹಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.