ಜಾಬ್‌ ಪೋರ್ಟಲ್‌ನಿಂದ ಮಾಹಿತಿ: ಮಹಿಳೆಗೆ ವಂಚನೆ

ಅಹಮದಾಬಾದ್‌: ನೀವು ಉದ್ಯೋಗದ ಹುಡುಕಾಟದಲ್ಲಿ ಜಾಬ್‌ ಪೋರ್ಟಲ್‌ಗಳಲ್ಲಿ ನಿಮಗೆ ಸಂಬಂಧಿಸಿದ ಮಾಹಿತಿಗಳನ್ನು ಅಪ್‌ಲೋಡ್‌ ಮಾಡುವಾಗ ಎಚ್ಚರ ವಹಿಸಿ, ಏಕೆಂದರೆ ಈ ಪೋರ್ಟಲ್‌ಗಳಲ್ಲಿ ನಿಮ್ಮ ಮಾಹಿತಿ ಸುರಕ್ಷಿತವಾಗಿ ಇಲ್ಲದಿರಬಹುದು.

ಅಹಮದಾಬಾದ್‌ನ ಘಟ್‌ಲೊಡಿಯಾ ನಿವಾಸಿ ಪಿಂಕಿ ಮೋದಿ ಎಂಬವರು ಜಾಬ್‌ ಪೋರ್ಟಲ್‌ಗೆ ಸೈನ್ಡ್‌ಅಪ್‌ ಆಗುತ್ತಿದ್ದರು. ಇದನ್ನು ಆಧರಿಸಿ ಅವರಿಗೊಂದು ಕರೆ ಬಂದಿತ್ತು.

ಹೀಗೆ ಕೆಲವು ಕರೆಗಳ ಬಳಿಕ ಅವರಿಗೆ ಟ್ರಾವೆಲ್‌ ಏಜೆನ್ಸಿಯಲ್ಲಿ ಉದ್ಯೋಗವಿದ್ದು, ಅದಕ್ಕೆ ಹಣ ಪಾವತಿಸಬೇಕು ಎಂದು ಕರೆ ಮಾಡಿದವರು ಹೇಳಿದ್ದರು. ಕೆಲವು ದಿನಗಳ ಬಳಿಕ ಅವರು 1.24 ಲಕ್ಷ ರೂ.ಪಾವತಿಸಿದ್ದರು. ಅನಂತರ ಆ ಸಂಖ್ಯೆಗೆ ಕರೆ ಮಾಡಿದರೆ ಸ್ವಿಚ್ಡ್‌ಆಫ್‌ ಆಗಿತ್ತು. ಆಗ ಆಕೆಗೆ ಮೋಸ ಹೋಗಿರುವುದು ಅರಿವಿಗೆ ಬಂದು ಸೈಬರ್‌ ಪೊಲೀಸರಿಗೆ ದೂರು ನೀಡಿದ್ದಾರೆ.

ಪೊಲೀಸರು ಕಾಲ್‌ ಡೇಟಾ ರೆಕಾರ್ಡ್‌ ಬೆನ್ನು ಹತ್ತಿ ಆರೋಪಿಗಳ ಪತ್ತೆಗೆ ಕ್ರಮಕೈಗೊಂಡಿದ್ದರು. ಹೀಗಾಗಿ ಮಹಿಳೆಗೆ ನೋಯ್ಡಾದಿಂದ ಕರೆ ಬಂದಿರುವುದನ್ನು ಪೊಲೀಸರು ದೃಢಪಡಿಸಿಕೊಂಡರು. ನೋಯ್ಡಾದ ಕಾಲ್‌ ಸೆಂಟರ್‌ಗೆ ದಾಳಿ ನಡೆಸಿದ ಪೊಲೀಸರು ಆರೋಪಿಗಳಾದ ಶಶಿ ಶ್ರೀ ರಾಂ ಮಿಶ್ರಾ, ಕೈಲಾಶ್ಚಂದ್ರ ಠಾಕೂರ್‌, ರತನ್‌ ಕುಮಾರ್‌ ಮಿಶ್ರಾ ಅವರನ್ನು ಬಂಧಿಸಿದ್ದಾರೆ. ಯುವಜನರನ್ನು ಗುರಿಯಾಗಿಸಿಕೊಂಡು ಉದ್ಯೋಗದ ಆಮಿಷವೊಡ್ಡಿ ವಂಚಿಸುತ್ತಿರುವುದಾಗಿ ಆರೋಪಿಗಳು ಒಪ್ಪಿಕೊಂಡಿದ್ದಾರೆ.