ಸಿಆರ್‌ಪಿಎಫ್‌ ಪ್ರಧಾನ ಕಚೇರಿ ದಾಳಿಗೆ ಉಗ್ರರ ವಿಫಲ ಯತ್ನ: ಯೋಧ ಹುತಾತ್ಮ

ಹೊಸದಿಲ್ಲಿ: ಶ್ರೀನಗರದ ಕರಣ್‌ ನಗರ ಪ್ರದೇಶದಲ್ಲಿ ಸಿಆರ್‌ಪಿಎಫ್‌ ಪ್ರಧಾನ ಕಚೇರಿಗೆ ಸೋಮವಾರ ಬೆಳಗ್ಗೆ ಉಗ್ರರು ದಾಳಿ ನಡೆಸಿದ್ದು, ಒಬ್ಬ ಯೋಧ ಹುತಾತ್ಮರಾಗಿದ್ದಾರೆ. ತಕ್ಷಣ ಪ್ರತಿದಾಳಿ ನಡೆಸಿದ ಭದ್ರತಾಪಡೆಗಳು ಉಗ್ರರ ಯತ್ನವನ್ನು ಹಿಮ್ಮೆಟ್ಟಿಸಿವೆ.

'ಇಂದು ಬೆಳಗ್ಗೆ ಇಬ್ಬರು ಉಗ್ರರು ಸಿಆರ್‌ಪಿಎಫ್‌ ಪ್ರಧಾನ ಕಚೇರಿಗೆ ನುಸುಳಲು ಯತ್ನಿಸಿದರು. ಪ್ರಧಾನ ಕಚೇರಿ ಪಕ್ಕದ ವಸತಿ ಕಟ್ಟಡಕ್ಕೆ ನುಗ್ಗಿದ ಉಗ್ರರು ಗುಂಡಿನ ದಾಳಿ ನಡೆಸಿದರು. ಕಟ್ಟಡದಲ್ಲಿದ್ದ ಐದು ಕುಟುಂಬಗಳನ್ನು ತೆರವುಗೊಳಿಸಲಾಗಿದೆ. ಕಾರ್ಯಾಚರಣೆ ಪ್ರಗತಿಯಲ್ಲಿದೆ' ಎಂದು ಸಿಆರ್‌ಪಿಎಫ್‌ ಐಜಿ ರವಿದೀಪ್‌ ಸಹಾಯ್ ತಿಳಿಸಿದರು.

ಗುಂಡಿನ ಚಕಮಕಿಯಲ್ಲಿ ಸಿಆರ್‌ಪಿಎಫ್‌ನ 49ನೇ ಬೆಟಾಲಿಯನ್‌ಗೆ ಸೇರಿದ ಪೇದೆ ಗಂಭೀರ ಗಾಯಗೊಂಡು, ನಂತರ ಮೃತಪಟ್ಟನೆಂದು ಮೂಲಗಳು ತಿಳಿಸಿವೆ.

ಎ.ಕೆ-47 ರೈಫಲ್‌ಗಳನ್ನು ಹೊಂದಿದ್ದ ಇಬ್ಬರು ಉಗ್ರರು ಪ್ರಧಾನ ಕಚೇರಿಗೆ ನುಸುಳಲು ಹವಣಿಸುತ್ತಿರುವುದನ್ನು ಸಿಆರ್‌ಪಿಎಫ್‌ ಸಿಬ್ಬಂದಿ ವಿಫಲಗೊಳಿಸಿದರು. ಯೋಧರು ಗುಂಡು ಹಾರಿಸಿದಾಗ ಉಗ್ರರು ಅಲ್ಲಿಂದ ತಪ್ಪಿಸಿಕೊಂಡರು.

'ಬೆಳಗ್ಗೆ 4:30ರ ವೇಳೆಗೆ ಇಬ್ಬರು ಸಶಸ್ತ್ರ ಉಗ್ರರು ಒಳ ನುಸುಳಲು ಹೊಂಚು ಹಾಕುತ್ತಿರುವುದನ್ನು ಗಮನಿಸಿದ ಕಾವಲು ಯೋಧ, ಅವರತ್ತ ಗುಂಡು ಹಾರಿಸಿದರು' ಎಂದು ಸಿಆರ್‌ಪಿಎಫ್‌ ವಕ್ತಾರ ತಿಳಿಸಿದರು.

ಕೂಡಲೇ ಸ್ಥಳದಲ್ಲಿ ಶೋಧ ಕಾರ್ಯಾಚರಣೆ ನಡೆಸಲಾಗಿದ್ದು, ಉಗ್ರರ ಜತೆ ಸಂಪರ್ಕ ಸಾಧಿಸಲಾಗಿದೆ. ಬಳಿಕ ಆಗಾಗ್ಗೆ ಗುಂಡಿನ ಚಕಮಕಿ ನಡೆಯಿತು. ಉಗ್ರರು ತಪ್ಪಿಸಿಕೊಳ್ಳದಂತೆ ಬಿಗಿ ಕಾವಲು ಏರ್ಪಡಿಸಲಾಗಿದ್ದು, ಸ್ಥಳಕ್ಕೆ ಹೆಚ್ಚುವರಿ ಯೋಧರನ್ನು ಕರೆಸಿಕೊಳ್ಳಲಾಗಿದೆ.

ಎರಡು ದಿನಗಳ ಹಿಂದೆ ಜಮ್ಮುವಿನ ಸುಂಜುವಾನ್‌ ಸೇನಾ ಶಿಬಿರದ ಮೇಲೆ ಉಗ್ರರು ದಾಳಿ ನಡೆಸಿ ಐವರು ಯೋಧರನ್ನು ಕೊಂದಿದ್ದರು. ಗುಂಡಿನ ಘರ್ಷಣೆಯಲ್ಲಿ ಆರು ಜವಾನರು ಮತ್ತು ಆರು ನಾಗರಿಕರು ಗಾಯಗೊಂಡಿದ್ದರು. ನಾಳ್ವರು ಉಗ್ರರನ್ನು ಭದ್ರತಾ ಪಡೆಗಳು ಕೊಂದು ಹಾಕಿದ್ದರು.