ಬಿಹಾರ ಚುನಾವಣೆ: ಶುಕ್ರವಾರ 3 ರ್‍ಯಾಲಿಯಲ್ಲಿ ಪ್ರಧಾನಿ ಮೋದಿ ಭಾಗಿ, ಎಲ್‌ಜೆಪಿ ವಿರುದ್ಧ ವಾಗ್ದಾಳಿ ಸಾಧ್ಯತೆ!

ಪಟ್ನಾ: ಅಕ್ಟೋಬರ್‌ ತಿಂಗಳ ಅಂತ್ಯಕ್ಕೆ ಬಿಹಾರ ವಿಧಾನಸಭೆ ಚುನಾವಣೆ ನಡೆಯಲಿದ್ದು ಎಲ್ಲಾ ಪಕ್ಷಗಳು ಬಿರುಸಿನ ಪ್ರಚಾರ ನಡೆಸುತ್ತಿದ್ದಾರೆ. ಇದೀಗ ಪ್ರಧಾನಿ ನರೇಂದ್ರ ಮೋದಿ ಕೂಡ ಇಂದು(ಶುಕ್ರವಾರ) ಪ್ರಚಾರದ ಅಖಾಡಕ್ಕೆ ಧುಮಕಲಿದ್ದು, ಮೂರು ಪ್ರಚಾರ ರ್‍ಯಾಲಿಗಳನ್ನು ಉದ್ದೇಶಿಸಿ ಪ್ರಧಾನಿ ಮೋದಿ ಮಾತನಾಡಲಿದ್ದಾರೆ.

ಬಿಹಾರದ ಸಸಾರಾಮ್, ಗಯಾ ಮತ್ತು ಭಗಲ್ಪುರ ವಿಧಾನಸಭಾ ಕ್ಷೇತ್ರಗಳಲ್ಲಿ ಆಯೋಜನೆಗೊಳ್ಳುವ ರ್‍ಯಾಲಿಗಳಲ್ಲಿ ಪ್ರಧಾನಿ ಮೋದಿ ಭಾಗಿಯಾಗಲಿದ್ದಾರೆ. ಅಲ್ಲದೆ ಬಿಹಾರ ಚುನಾವಣಾ ಪ್ರಚಾರದ 12 ಸಮಾವೇಶಗಳನ್ನು ಉದ್ದೇಶಿಸಿ ಪ್ರಧಾನಿ ಮೋದಿ ಭಾಷಣ ಮಾಡಲಿದ್ದಾರೆ. ಭಾರೀ ಹೈವೋಲ್ಟೇಜ್‌ ಚುನಾವಣೆ ಬಿಹಾರದಲ್ಲಿ ಏರ್ಪಟ್ಟಿದ್ದು ಭಾರೀ ಕುತೂಹಲ ಕೆರಳಿಸಿದೆ.

ಎಲ್‌ಜೆಪಿ ವಿರುದ್ಧ ವಾಗ್ಧಾಳಿ!
ಇನ್ನು ಇಂದಿನ ಮೋದಿ ಪ್ರಚಾರದ ರ್‍ಯಾಲಿ ಬಗ್ಗೆ ಭಾರೀ ಚರ್ಚೆಗಳು ನಡೆಯುತ್ತಿದೆ. ಯಾಕೆಂದರೆ ಎಲ್‌ಜೆಪಿಯಿಂದ ಕಂಗೆಟ್ಟಿರುವ ಎನ್‌ಡಿಎ ಮುಖ್ಯಮಂತ್ರಿ ಅಭ್ಯರ್ಥಿ ನಿತೀಶ್‌ ಕುಮಾರ್‌ ಅವರ ಒತ್ತಡದಿಂದಲೇ ಪ್ರಧಾನಿ ಮೋದಿ ಭಾರೀ ಸಂಖ್ಯೆಯ ಪ್ರಚಾರ ರ್‍ಯಾಲಿಯಲ್ಲಿ ಭಾಗಿಯಾಗುತ್ತಿದ್ದಾರೆ ಎನ್ನಲಾಗುತ್ತಿದೆ.

ಬಿಹಾರ ಚುನಾವಣೆ: ಲಾಲೂ ಪುತ್ರರು ಗೆದ್ದರಷ್ಟೇ ಆರ್‌ಜೆಡಿಗೆ ಉಳಿವು, ಮೋದಿ-ರಾಹುಲ್‌ ಪ್ರಚಾರ ಶುರು!

ಹೀಗಾಗಿ ಮೊದಲ ದಿನವೇ ಎಲ್‌ಜೆಪಿ ವಿರುದ್ಧ ಪ್ರಧಾನಿ ಮೋದಿ ಮಾತಿನ ದಾಳಿ ನಡೆಸುವ ಸಾಧ್ಯತೆಗಳಿವೆ ಎನ್ನಲಾಗಿದೆ. ಎನ್‌ಡಿಎಯಿಂದ ಹೊರಬಂದಿರುವ ಚಿರಾಗ್‌ ಪಾಸ್ವಾನ್‌ ನೇತೃತ್ವದ ಎಲ್‌ಜೆಪಿ, ಒಂದು ಕಡೆ ಪ್ರಧಾನಿ ಮೋದಿ ಹೆಸರಿನಲ್ಲಿ ಮತ ಕೇಳುತ್ತಿದ್ದರೆ. ಮತ್ತೊಂದು ಕಡೆ ನಿತೀಶ್‌ ಕುಮಾರ್‌ ವಿರುದ್ಧ ತೊಡೆ ತಟ್ಟಿದೆ. ಹೀಗಾಗಿ ಸುಮ್ಮನಿದ್ದರೆ ಜನರು ಚಿರಾಗ್‌ ಪಾಸ್ವಾನ್‌ ಮಾತು ನಂಬಿ ಅವರಿಗೆ ವೋಟ್‌ ಹಾಕಬಹದು ಹೀಗಾಗಿ ಪ್ರಧಾನಿ ಮೋದಿ ಮೌನ ಮುರಿಯುವ ಸಾಧ್ಯತೆ ಇದೆ ಎನ್ನಲಾಗಿದೆ.