‘ತ್ಯಾಗಿ’ ಸುಶೀಲ್‌ ಕುಮಾರ್‌ಗೆ ಬಿಜೆಪಿ ರಾಜ್ಯಸಭೆ ಟಿಕೆಟ್..! ‌ಕೇಂದ್ರದಲ್ಲಿ ದೊಡ್ಡ ಜವಾಬ್ದಾರಿ ನಿರೀಕ್ಷೆ

ಪಟನಾ: ಬಿಹಾರದಲ್ಲಿ ಹೊಸ ಸರಕಾರ ರಚನೆ ವೇಳೆ ಉಪ ಮುಖ್ಯಮಂತ್ರಿ ಪದವಿ ತ್ಯಾಗ ಮಾಡಿರುವ ಹಿರಿಯ ನಾಯಕ ಸುಶೀಲ್‌ ಕುಮಾರ್‌ ಮೋದಿ ಅವರಿಗೆ ಬಿಜೆಪಿಯು ರಾಜ್ಯಸಭೆ ಟಿಕೆಟ್‌ ನೀಡಿದೆ.

ಎಲ್‌ಜೆಪಿ ಮುಖಂಡ ರಾಮ್‌ ವಿಲಾಸ್‌ ಪಾಸ್ವಾನ್‌ ನಿಧನದೊಂದಿಗೆ ತೆರವಾಗಿರುವ ರಾಜ್ಯಸಭೆ ಸ್ಥಾನಕ್ಕೆ ಡಿ.14ರಂದು ಉಪ ಚುನಾವಣೆ ನಡೆಯಲಿದೆ. ಬಿಹಾರ ವಿಧಾನಸಭೆಯಲ್ಲಿ ಎನ್‌ಡಿಎ ಮೈತ್ರಿಕೂಟಕ್ಕೆ ಸ್ಪಷ್ಟ ಬಹುಮತ ಇರುವುದರಿಂದ ಮೋದಿ ಆಯ್ಕೆ ಬಹುತೇಕ ಖಚಿತವಾಗಿದೆ.

ಇತ್ತೀಚೆಗೆ ನಡೆದ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಪಿ-ಜೆಡಿಯು ಗೆಲುವು ಸಾಧಿಸಿದರೂ ವರಿಷ್ಠರ ಆದೇಶಕ್ಕೆ ಬೆಲೆಕೊಟ್ಟು ಸುಶೀಲ್‌ ಕುಮಾರ್‌ ಡಿಸಿಎಂ ಸ್ಥಾನ ತ್ಯಜಿಸಿದ್ದರು. ಅವರಿಗೆ ಕೇಂದ್ರದಲ್ಲಿ ದೊಡ್ಡ ಜವಾಬ್ದಾರಿ ನೀಡಲಾಗುತ್ತದೆ ಎನ್ನುವ ಊಹಾಪೋಹಗಳು ಕೇಳಿ ಬಂದಿದ್ದು, ಅದಕ್ಕೆ ಪೂರಕ ಬೆಳವಣಿಗೆಗಳು ಈಗ ರಾಜ್ಯದಲ್ಲಿ ಘಟಿಸಿವೆ.

ಸುಶೀಲ್ ಬೇಸರಗೊಂಡಿಲ್ಲ, ದೊಡ್ಡ ಹುದ್ದೆಗೆ ಸಜ್ಜಾಗುತ್ತಿದ್ದಾರೆ: ದೇವೇಂದ್ರ ಫಡ್ನವೀಸ್!

ತೆರವಾದ ಸ್ಥಾನಕ್ಕೆ ತಮ್ಮ ತಾಯಿ ರೀನಾ ಪಾಸ್ವಾನ್‌ ಅವರನ್ನು ಮೈತ್ರಿಕೂಟದ ಅಭ್ಯರ್ಥಿಯನ್ನಾಗಿ ಪರಿಗಣಿಸಬೇಕೆಂದು ಎಲ್‌ಜೆಪಿ ಅಧ್ಯಕ್ಷ ಚಿರಾಗ್‌ ಪಾಸ್ವಾನ್‌ ಒತ್ತಾಯಿಸಿದ್ದರು. ಆದರೆ, ಅವರ ಬೇಡಿಕೆ ಪರಿಗಣಿಸದ ಬಿಜೆಪಿಯು ಸುಶೀಲ್‌ ಮೋದಿ ಅವರಿಗೆ ಟಿಕೆಟ್‌ ನೀಡಿದೆ. ಈ ಮೊದಲು ಇದೇ ರಾಜ್ಯಸಭೆ ಸ್ಥಾನವನ್ನು ಬಿಜೆಪಿಯ ರವಿಶಂಕರ್‌ ಪ್ರಸಾದ್‌ ಪ್ರತಿನಿಧಿಸಿದ್ದರು.

ಬಿಹಾರದಲ್ಲಿ ಬದಲಾವಣೆ ಪರ್ವ: ಗೃಹ ಖಾತೆ ಉಳಿಸಿಕೊಂಡ ನಿತೀಶ್‌, ಇಬ್ಬರು ಡಿಸಿಎಂಗಳಿಗೆ ಬಲಿಷ್ಠ ಖಾತೆ

ಕಳೆದ ಲೋಕಸಭೆ ಚುನಾವಣೆಯಲ್ಲಿ ಅವರು ಆಯ್ಕೆಯಾದ ನಂತರ ಆ ಸ್ಥಾನವನ್ನು ರಾಮ್‌ ವಿಲಾಸ್‌ ಪಾಸ್ವಾನ್‌ ಅವರಿಗೆ ಬಿಟ್ಟುಕೊಡಲಾಗಿತ್ತು. ಬಿಹಾರದಲ್ಲಿ 2005 ರಿಂದ 2013, 2017 ರಿಂದ 2020ರ ಅವಧಿಯಲ್ಲಿ ಉಪ ಮುಖ್ಯಮಂತ್ರಿಯಾಗಿದ್ದ ಸುಶೀಲ್‌ಕುಮಾರ್‌ ಮೋದಿ ಸದ್ಯ ವಿಧಾನ ಪರಿಷತ್‌ ಸದಸ್ಯರಾಗಿದ್ದಾರೆ.