ಬಿಹಾರದ ಪ್ರತಿ ಪದವೀಧರೆಗೆ ಸರಕಾರದಿಂದ 25,000 ರೂ. ಉಡುಗೊರೆ

ಪಟನಾ: ಪ್ರಸಕ್ತ ಸಾಲಿನಿಂದಲೇ ಅನ್ವಯವಾಗುವಂತೆ ಬಿಹಾರ ಸರಕಾರ ಅಲ್ಲಿ ಪದವಿ ಪಡೆಯುವ ಪ್ರತಿ ವಿದ್ಯಾರ್ಥಿನಿಗೆ 25,000 ರೂ. ವಿಶೇಷ ಉಡುಗೊರೆ ನೀಡುವ ಪ್ರಸ್ತಾಪಕ್ಕೆ ಸಂಪುಟ ಸಮ್ಮತಿಸಿದೆ.

ಈ ಯೋಜನೆಗಾಗಿ 300 ಕೋಟಿ ರೂ. ಮೀಸಲಿರಿಸಿದ್ದು, ಈ ವರ್ಷ ಪದವಿ ಪೂರ್ಣಗೊಳಿಸುವ 1.2 ಲಕ್ಷ ವಿದ್ಯಾರ್ಥಿನಿಯರು ಯೋಜನೆಯ ಪ್ರಯೋಜನ ಪಡೆಯಲಿದ್ದಾರೆ.

ಪ್ರಸಕ್ತ ವರ್ಷ ಏಪ್ರಿಲ್ 25ರ ಬಳಿಕ ಪದವಿ ಪಡೆದು ಉತ್ತೀರ್ಣರಾಗಿರುವ ವಿದ್ಯಾರ್ಥಿನಿಯರಿಗೆ ನೇರವಾಗಿ ಒಂದೇ ಬಾರಿಗೆ 25,000 ರೂ. ನಗದು ಲಭಿಸಲಿದೆ. ಯೋಜನೆಯ ಪ್ರಯೋಜನ ಪಡೆಯಲು ಯಾವುದೇ ರೀತಿಯ ಜಾತಿ, ಧರ್ಮದ ನಿರ್ಬಂಧವಿರುವುದಿಲ್ಲ.

ಪದವಿ ಪಡೆದ ಎಲ್ಲ ವಿದ್ಯಾರ್ಥಿನಿಯರು ಬಹುಮಾನದ ಮೊತ್ತ ಪಡೆಯಲು ಅರ್ಹರಾಗಿರುತ್ತಾತೆ ಎಂದು ಸಂಸದೀಯ ಕಾರ್ಯದರ್ಶಿ ಯು ಎನ್ ಪಾಂಡೆ ತಿಳಿಸಿದ್ದಾರೆ.

ಈ ಯೋಜನೆಯು ಪ್ರತಿ ಹೆಣ್ಣು ಮಗುವಿಗೆ ಹುಟ್ಟಿನಿಂದ ಪದವಿಯವರೆಗೆ ದೊರಕುವ ವಿವಿಧ ಸಹಾಯಧನಗಳ ಒಟ್ಟು ಮೊತ್ತ 54,000 ರೂ.ನಲ್ಲಿ ಒಳಗೊಂಡಿರುತ್ತದೆ.