ತೇಜಸ್ವಿ ಯಾದವ್‌ ಆಗ್ತಾರಾ ರಾಜ್ಯವೊಂದರ ಅತಿ ಕಿರಿಯ ಮುಖ್ಯಮಂತ್ರಿ?

ಪಟನಾ: ಚುನಾವಣೋತ್ತರ ಸಮೀಕ್ಷೆಗಳು ನಿಜವಾಗಿ ಒಂದೊಮ್ಮೆ ಮಹಾಘಟಬಂಧನ್ ಬಿಹಾರದಲ್ಲಿ‌ ಅಧಿಕಾರಕ್ಕೆ ಏರಿದ್ದೇ ಆದಲ್ಲಿ ಆರ್‌ಜೆಡಿ ನಾಯಕ ತೇಜಸ್ವಿ ಯಾದವ್‌ ಮುಖ್ಯಮಂತ್ರಿಯಾಗಲಿದ್ದಾರೆ. ಅವರು ಸಿಎಂ ಹುದ್ದೆ ಅಲಂಕರಿಸಿದಲ್ಲಿ ದೇಶದ ಪೂರ್ಣ ಪ್ರಮಾಣದ ರಾಜ್ಯದ ಅತ್ಯಂತ ಕಿರಿಯ ವಯಸ್ಸಿನ ಮುಖ್ಯಮಂತ್ರಿ ಎನಿಸಿಕೊಳ್ಳಲಿದ್ದಾರೆ.

ಸೋಮವಾರವಷ್ಟೆ ಲಾಲು ಪ್ರಸಾದ್‌ ಯಾದವ್‌ ಅವರ ಕಿರಿಯ ಪುತ್ರ ತೇಜಸ್ವಿ ಯಾದವ್‌ 31ನೇ ಹುಟ್ಟುಹಬ್ಬ (ಜನನ ನವೆಂಬರ್‌ 9, 1989) ಆಚರಿಸಿಕೊಂಡಿದ್ದು, ಕೇವಲ 31ನೇ ವಯಸ್ಸಿಗೆ ಮುಖ್ಯಮಂತ್ರಿ ಹುದ್ದೆಗೇರಿದ ದಾಖಲೆ ಬರೆಯಲಿದ್ದಾರೆ.

ಕೇಂದ್ರಾಡಳಿತ ಪ್ರದೇಶಗಳನ್ನೂ ಗಣನೆಗೆ ತೆಗೆದುಕೊಂಡರೆ, ಈ ಹಿಂದೆ ಎಂಒಎಚ್‌ ಫಾರೂಕ್‌ ಅವರು 29ನೇ ವರ್ಷಕ್ಕೆ ಪಾಂಡಿಚೇರಿ (1967) ಮುಖ್ಯಮಂತ್ರಿಯಾಗಿದ್ದರು. ಇದು ಬಿಟ್ಟರೆ ಅತಿ ಕಿರಿಯ ವಯಸ್ಸಿಗೆ ಪೂರ್ಣ ಪ್ರಮಾಣದ ರಾಜ್ಯದ ಮುಖ್ಯಮಂತ್ರಿಯಾದ ದಾಖಲೆ ಅಸ್ಸಾಂನ ಪ್ರಫುಲ್ಲ ಕುಮಾರ್‌ ಮಹಾಂತ ಹೆಸರಿನಲ್ಲಿದೆ. ವಿದ್ಯಾರ್ಥಿ ಹೋರಾಟದ ಮೂಲಕ ಪ್ರವರ್ಧಮಾನಕ್ಕೆ ಬಂದಿದ್ದ ಅವರು 1985ರಲ್ಲಿ ಕೇವಲ 33 ವಯಸ್ಸಿಗೆ ಅಸ್ಸಾಂನ ಸಿಎಂ ಗಾದಿ ಏರಿದ್ದರು. ಈ ದಾಖಲೆ ಮುರಿಯುವ ಅವಕಾಶ ಈಗ ತೇಜಸ್ವಿ ಯಾದವ್‌ ಮುಂದಿದೆ.

ಬಿಹಾರದಲ್ಲಿ ಎನ್‌ಡಿಎಗೆ ಶಾಕ್‌, ಮಹಾಘಟಬಂಧನ್‌ಗೆ ಮುನ್ನಡೆ: ಟೈಮ್ಸ್‌ನೌ-ಸಿ ವೋಟರ್‌ ಸಮೀಕ್ಷೆ
1968ರಲ್ಲಿ ಸತೀಶ್‌ ಪ್ರಸಾದ್‌ ಸಿಂಗ್‌ 32ನೇ ವಯಸ್ಸಿಗೆ ಬಿಹಾರದ ಮುಖ್ಯಮಂತ್ರಿಯಾಗಿದ್ದರಾದರೂ ಅವರ ಸಿಎಂ ಗಾದಿಯ ಅವಧಿ ಕೇವಲ ಐದು ದಿನಕ್ಕಷ್ಟೆ ಸೀಮಿತವಾಗಿತ್ತು. ಇನ್ನು ಡಾ. ಜಗನ್ನಾತ್‌ ಮಿಶ್ರಾ 1975ರಲ್ಲಿ 38ನೇ ವಯಸ್ಸಿಗೆ ಬಿಹಾರದ ಅಧಿಕಾರ ಗದ್ದುಗೆ ಏರಿದ್ದರು. ಈ ಎರಡೂ ದಾಖಲೆಗಳನ್ನು ಮುರಿಯುವ ಅವಕಾಶ ಲಾಲು-ರಾಬ್ರಿ ದೇವಿ ಪುತ್ರನಿಗಿದೆ.

ಈಗಾಗಲೇ ‘ಭವಿಷ್ಯದ ಮುಖ್ಯಮಂತ್ರಿ ತೇಜಸ್ವಿ ಯಾದವ್‌’ ಎಂಬ ಪೋಸ್ಟರ್‌ಗಳು ಈಗಾಗಲೇ ಪಟನಾ ಸೇರಿ ರಾಜ್ಯದ ಹಲವು ನಗರಗಳಲ್ಲಿ ರಾರಾಜಿಸುತ್ತಿವೆ. ಇದು ನಿಜವಾಗಲಿದೆಯಾ, ಅತೀ ಕಿರಿಯ ಸಿಎಂ ಎಂಬ ದಾಖಲೆಗೆ ತೇಜಸ್ವಿ ಯಾದವ್‌ ಪಾತ್ರವಾಗಲಿದ್ದಾರಾ ಎಂಬ ಪ್ರಶ್ನೆಗೆ ಮಂಗಳವಾರ ಉತ್ತರ ದೊರೆಯಲಿದೆ.