ಚಿಟ್ ಫಂಡ್‌ ಹಗರಣದಲ್ಲಿ ಬಿಹಾರದ ಟಾಪರ್

ಪಾಟ್ನಾ: ದಾಖಲೆ ಪತ್ರಗಳನ್ನು ನಕಲು ಮಾಡಿ ಸಿಕ್ಕಿಬಿದ್ದಿದ್ದ ಬಿಹಾರದ ಕಲಾ ವಿಭಾಗದ ಟಾಪರ್ ಗಣೇಶ್ ಕುಮಾರ್‌ನ ಮತ್ತೊಂದು ಹಗರಣ ಬಹಿರಂಗಗೊಂಡಿದೆ.

ಗಣೇಶ್ ಕುಮಾರ್ ಚಿಟ್ ಫಂಡ್ ಹಗರಣವೊಂದರಲ್ಲಿ 15 ಲಕ್ಷ ರೂಪಾಯಿ ವಂಚನೆ ಎಸಗಿರುವ ಪ್ರಕರಣ ಬೆಳಕಿಗೆ ಬಂದಿದೆ.

ಕೊಲ್ಕತ್ತಾ ಮೂಲದ ಚಿಟ್ ಫಂಡ್ ಒಂದರಲ್ಲಿ ಗಣೇಶ್ ಕುಮಾರ್ 15 ಲಕ್ಷ ರೂಪಾಯಿ ವಂಚಿಸಿದ್ದಾನೆ ಎಂದು ಪ್ರಕರಣದ ವಿಚಾರಣೆ ನಡೆಸುತ್ತಿರುವ ಎಸ್ಎಸ್‌ಪಿ ಮನು ಹೇಳಿದ್ದಾರೆ.

ಜಾರ್ಖಂಡ್‌ನ ಚಿಟ್‌ ಫಂಡ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ ಗಣೇಶ್, ಕಂಪನಿಯ ಹಣವನ್ನು ದುರುಪಯೋಗ ಪಡಿಸಿಕೊಂಡಿದ್ದ. ಈ ವೇಳೆ ತಾವು ನೀಡಿರುವ ಹಣವನ್ನು ಹಿಂದಿರುಗಿ ನೀಡಬೇಕೆಂದು ಚಿಟ್ ಫಂಡ್‌ಗೆ ಹಣ ಕಟ್ಟಿದ ಜನರು ಒತ್ತಾಯಿಸತೊಡಗಿದ್ದ ಹಿನ್ನೆಲೆಯಲ್ಲಿ 2013ರಲ್ಲಿ ಪಾಟ್ನಾಗೆ ಪಲಾಯನ ಮಾಡಿದ್ದ ಎಂದು ಹೇಳಲಾಗುತ್ತಿದೆ.

ಸರಕಾರಿ ಕೆಲಸ ಪಡೆಯುವ ಉದ್ದೇಶದಿಂದ ಗಣೇಶ್ ಕುಮಾರ್ ತನ್ನ ವಯಸ್ಸನ್ನು 18 ವರ್ಷಗಳಷ್ಟು ಕಡಿಮೆ ಮಾಡಿಕೊಂಡಿದ್ದ ಎಂದು ಎಸ್ಎಸ್‌ಪಿ ಮನು ತಿಳಿಸಿದ್ದಾರೆ.

ದಾಖಲೆ ಪತ್ರಗಳನ್ನು ನಕಲು ಮಾಡಿದ ಕಾರಣ ಬಿಹಾರ ಶಾಲಾ ಪರೀಕ್ಷಾ ಮಂಡಳಿ (ಬಿಎಸ್‌ಇಬಿ) ಗಣೇಶ್ ಕುಮಾರ್ ಎಂಬಾತನ ಫಲಿತಾಂಶವನ್ನು ರದ್ದು ಮಾಡಿತ್ತು. ನಂತರ ಆತನನ್ನು ಪೊಲೀಸರು ಬಂಧಿಸಿದ್ದರು.