ಬಿಲ್ಕಿಸ್‌ ಬಾನೊ: 11 ದೋಷಿಗಳ ಜೀವಾವಧಿ ಎತ್ತಿಹಿಡಿದ ಬಾಂಬೆ ಕೋರ್ಟ್‌

ಹೊಸದಿಲ್ಲಿ: ಬಿಲ್ಕಿಸ್‌ ಬಾನೊ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣದ 11 ದೋಷಿಗಳ ಜೀವಾವಧಿ ಶಿಕ್ಷೆಯನ್ನು ಗುರುವಾರ ಎತ್ತಿಹಿಡಿದ ಬಾಂಬೆ ಹೈಕೋರ್ಟ್‌, ಸಿಬಿಐ ಆಗ್ರಹದಂತೆ ಅವರಿಗೆ ಮರಣದಂಡನೆ ವಿಧಿಸಲು ನಿರಾಕರಿಸಿದೆ.

ಪ್ರಕರಣದ ಸಾಕ್ಷಿ ನಾಶದ ಆರೋಪ ಎದುರಿಸುತ್ತಿರುವ ವೈದ್ಯರು, ಪೊಲೀಸರು ಸೇರಿದಂತೆ 7 ಮಂದಿಯ ಖುಲಾಸೆಯನ್ನು ಕೋರ್ಟ್‌ ತಳ್ಳಿ ಹಾಕಿದೆ.

ಪ್ರಕರಣದ ಮೂವರು ದೋಷಿಗಳಾದ ಜಸ್ವಂತ್‌ ನಾಯ್‌, ಗೋವಿಂದ ನಾಯ್‌ ಹಾಗೂ ಮತ್ತೊಬ್ಬನಿಗೆ ಜೀವಾವಧಿ ಬದಲು ಮರಣದಂಡನೆ ವಿಧಿಸಬೇಕು ಎಂಬ ಸಿಬಿಐ ಅರ್ಜಿ ತಿರಸ್ಕೃತಗೊಂಡಿದ್ದು, 7 ಜನರ ಖುಲಾಸೆ ವಿರೋಧಿಸಿ ಸಲ್ಲಿಸಿದ್ದ ಅರ್ಜಿಯನ್ನು ನ್ಯಾಯಾಲಯ ಪುರಸ್ಕರಿಸಿದೆ.

2002 ಮಾರ್ಚ್‌ 3ರಂದು ಗೋಧ್ರಾ ಗಲಭೆ ನಂತರ ಅಹಮದಾಬಾದ್‌ ಸಮೀಪದ ರಾಧಿಕಾಪುರ ಗ್ರಾಮದಲ್ಲಿ ಉದ್ರಿಕ್ತರ ಗುಂಪು ಬಿಲ್ಕಿಸ್‌ ಬಾನೊ ಕುಟುಂಬದ ಮೇಲೆ ದಾಳಿ ನಡೆಸಿತ್ತು.

ಕುಟುಂಬದ ನಾಲ್ವರು ಮಹಿಳೆಯರೂ ಸೇರಿ, 8 ಮಂದಿ ಕೊಲೆಯಾಗಿದ್ದರು. ಇತರ ಆರು ಮಂದಿ ಕಣ್ಮರೆಯಾಗಿದ್ದರು. ಗರ್ಭಿಣಿ ಬಿಲ್ಕಿಸ್‌ ಬಾನೊ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆದಿತ್ತು.

2008 ಜನವರಿ 21ರಂದು ವಿಶೇಷ ವಿಚಾರಣಾ ನ್ಯಾಯಾಲಯ ಪ್ರಕರಣ ಸಂಬಂಧ 11 ಜನರಿಗೆ ಶಿಕ್ಷೆ ಪ್ರಕಟಿಸಿತ್ತು. ಕುಟುಂಬದವರ ಕೊಲೆ ಹಾಗೂ ಅತ್ಯಾಚಾರ ಕುರಿತ ಬಿಲ್ಕಿಸ್‌ ಬಾನೊ ಅವರ ದೂರು ಸ್ವೀಕರಿಸಲು ನಿರಾಕರಿಸಿದ್ದ ಪೇದೆಗೆ ವಿಚಾರಣಾ ನ್ಯಾಯಾಲಯ ಮೂರು ವರ್ಷಗಳ ಸಜೆ ವಿಧಿಸಿತ್ತು.