ಮೆರ್ಸೆಲ್‌ ಚಿತ್ರದಲ್ಲಿ ಡಿಮಾನಿಟೈಸೇಷನ್ ಬೇಡ- ರಾಹುಲ್‌ ಗಾಂಧಿ

ಚೆನ್ನೈ: ತಮಿಳು ಸೂಪರ್ ಸ್ಟಾರ್ ವಿಜಯ್ ಅಭಿನಯದ ಮೆರ್ಸೆಲ್‌ನಲ್ಲಿರುವ ಕೆಲವೊಂದು ಸೀನ್‌ಗೆ ಕತ್ತರಿ ಪ್ರಯೋಗ ಆಗಬೇಕೆಂದು ಬಿಜೆಪಿ ಆಗ್ರಹಿಸಿದ್ದನ್ನು ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ವಿರೋಧಿಸಿದ್ದಾರೆ.

'ಮಿ. ಮೋದಿ ಸಿನಿಮಾವು ತಮಿಳು ಭಾಷೆ ಹಾಗೂ ಸಂಸ್ಕೃತಿಯ ಅಭಿವ್ಯಕ್ತಿಯಾಗಿದೆ. ಮೆರ್ಸೆಲ್‌ನಲ್ಲಿ ಹಸ್ತಕ್ಷೇಪ ಮಾಡುವ ಮೂಲಕ ತಮಿಳರ ಗೌರವವನ್ನು ಡಿಮಾನಿಟೈಸೇಷನ್ ಮಾಡಬೇಡಿ' ಎಂದು ಟ್ವೀಟ್‌ ಮಾಡಿದ್ದಾರೆ.

Mr. Modi, Cinema is a deep expression of Tamil culture and language. Don't try to demon-etise Tamil pride by interfering in Mersal — Office of RG (@OfficeOfRG) October 21, 2017 ಬಿಜೆಪಿ-ಕಾಂಗ್ರೆಸ್‌ ರಾಜಕೀಯ ವಾರ್‌ಗೆ ತಮಿಳು ಚಿತ್ರ ಮೆರ್ಸೆಲ್‌ ದಾಳವಾಗಿದೆ. ಬಿಜೆಪಿ ಈ ಚಿತ್ರದಲ್ಲಿ ಜಿಎಸ್‌ಟಿ ಕುರಿತು ತಪ್ಪು ಮಾಹಿತಿ ನೀಡಿದೆ ಎಂದು ವಿರೋಧ ವ್ಯಕ್ತಪಡಿಸಿದರೆ ಕಾಂಗ್ರೆಸ್‌ ಚಿತ್ರಕ್ಕೆ ಬೆಂಬಲ ಸೂಚಿಸಿದೆ.

ಕಾಲಿವುಡ್‌ನಲ್ಲಿ ದೀಪಾವಳಿಗೆ ಬಿಡುಗಡೆಯಾದ ವಿಜಯ್ ನಟನೆಯ ಮೆರ್ಸೆಲ್‌ ಚಿತ್ರಮಂದಿರಗಳಲ್ಲಿ ಧೂಳೆಬ್ಬಿಸುತ್ತಿದೆ. ಆದರೆ ಈ ಚಿತ್ರ ಬಿಡುಗಡೆಯಾದ ಸ್ವಲ್ಪ ಹೊತ್ತಿನಲ್ಲೇ ರಾಜಕೀಯ ವಿವಾದಕ್ಕೆ ಗುರಿಯಾಗಿದೆ.

ಚಿತ್ರದಲ್ಲಿ ಜಿಎಸ್‌ಟಿ ಹಾಗೂ ಕೇಂದ್ರದ ಡಿಜಿಟಲ್‌ ಇಂಡಿಯಾ ಕ್ಯಾಂಪೇನ್‌ ಬಗ್ಗೆ ಸುಳ್ಳುಗಳನ್ನು ಹೇಳಲಾಗಿದೆ ಎಂದು ರಾಜ್ಯ ಬಿಜೆಪಿ ಮುಖ್ಯಸ್ಥ ತಮಿಳಿಸಾಯಿ ಸೌಂದರ್‌ರಾಜನ್‌ ಆರೋಪಿಸಿದ್ದಾರೆ. ಇದಕ್ಕೆ ದನಿಗೂಡಿಸಿರುವ ಕೇಂದ್ರ ಸಚಿವ ಪೋನ್‌ ರಾಧಾಕೃಷ್ಣನ್‌ ಕೂಡಾ ಜಿಎಸ್‌ಟಿ ಕುರಿತ ಸುಳ್ಳನ್ನು ಚಿತ್ರ ನಿರ್ಮಾಪಕರು ತೆಗೆದು ಹಾಕಬೇಕು ಎಂದು ಆಗ್ರಹಿಸಿದರು.

ಆದರೆ ಚಿತ್ರತಂಡ ಮಾತ್ರ ನಮಗೆ ಸೆನ್ಸಾರ್ ಬೋರ್ಡ್‌ನಿಂದ ಸರ್ಟಿಫಿಕೇಟ್‌ ಸಿಕ್ಕಿದೆ, ಆದ್ದರಿಂದ ಮತ್ತೆ ಚಿತ್ರವನ್ನು ಕತ್ತರಿ ಪ್ರಯೋಗಕ್ಕೆ ಒಳಪಡಿಸಲ್ಲ ಎಂದು ಪಟ್ಟು ಹಿಡಿದಿದೆ.

Rahul Gandhi Says 'Mr. Modi, Cinema is a deep expression of Tamil culture and language. Don't try to demon-etise Tamil pride by interfering in Mersal'.