ಲಡಾಕ್‌ ಅಭಿವೃದ್ಧಿ ಮಂಡಳಿ ಚುನಾವಣೆಯಲ್ಲಿ ಬಿಜೆಪಿಗೆ ಭರ್ಜರಿ ಜಯ

ಜಮ್ಮು: ಕೇಂದ್ರಾಡಳಿತ ಪ್ರದೇಶವಾಗಿ ಲಡಾಕ್‌ ರಚನೆಯಾದ ನಂತರ ಇದೇ ಮೊದಲ ಬಾರಿಗೆ ನಡೆದ ಲಡಾಕ್‌ ಸ್ವಾಯತ್ತ ಗುಡ್ಡಗಾಡು ಅಭಿವೃದ್ಧಿ ಮಂಡಳಿ (ಎಲ್‌ಎಎಚ್‌ಡಿಸಿ) ಚುನಾವಣೆಯಲ್ಲಿ ಬಿಜೆಪಿ ಒಟ್ಟು 12 ಕ್ಷೇತ್ರಗಳಲ್ಲಿ ಜಯ ಗಳಿಸಿದೆ.

26 ಕ್ಷೇತ್ರಗಳಿಗೆ ನಡೆದ ಚುನಾವಣೆಯಲ್ಲಿ ಬಿಜೆಪಿ ಅತಿ ಹೆಚ್ಚು ಕ್ಷೇತ್ರಗಳನ್ನು ಬಾಚಿರುವುದು ದೊಡ್ಡ ಸಾಧನೆಯೇ ಸರಿ ಎಂದು ಸ್ಥಳೀಯ ಪತ್ರಿಕೆಗಳು ವರದಿ ಮಾಡಿವೆ. ಎರಡನೇ ಸ್ಥಾನದಲ್ಲಿ ಕಾಂಗ್ರೆಸ್‌ ಇದ್ದು 6 ಸ್ಥಾನಗಳನ್ನು ಜಯಿಸಿದೆ. ಉಳಿದಂತೆ ಪಕ್ಷೇತರ ಅಭ್ಯರ್ಥಿಗಳ ಪೈಕಿ ಇಬ್ಬರು ವಿಜಯಮಾಲೆ ತೊಟ್ಟಿದ್ದಾರೆ. ಎಲ್ಲ 26 ಕ್ಷೇತ್ರಗಳಲ್ಲೂ ಬಿಜೆಪಿ ಮತ್ತು ಕಾಂಗ್ರೆಸ್‌ ಅಭ್ಯರ್ಥಿಗಳನ್ನು ನಿಲ್ಲಿಸಿದ್ದವು. ಆಮ್‌ ಆದ್ಮಿ ಪಕ್ಷ ಕೂಡ 19 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿತ್ತು.

ಇನ್ನು 4 ನಾಮ ನಿರ್ದೇಶಿತರು

ಲಡಾಕ್‌ ಪ್ರಾಂತ್ಯದ ಅಭಿವೃದ್ಧಿ ಕಾಮಗಾರಿಗಳ ನಿಗಾದಲ್ಲಿಪ್ರ ಮುಖ ಪಾತ್ರ ವಹಿಸುವ ಈ ಮಂಡಳಿಯಲ್ಲಿ ಒಟ್ಟು 30 ಸದಸ್ಯರು ಇರುತ್ತಾರೆ. ಆ ಪೈಕಿ 26 ಚುನಾಯಿತರಾಗಿದ್ದು, ಉಳಿದ ನಾಲ್ವರು ನಾಮ ನಿರ್ದೇಶಿತರಾಗಿದ್ದಾರೆ. ಸ್ಥಳೀಯ ರಾಜಕೀಯ ಮುಖಂಡರು, ಧಾರ್ಮಿಕ ಸಂಘಟನೆಗಳ ಸದಸ್ಯರು ಸೇರಿದಂತೆ ಲೇಹ್‌ನಲ್ಲಿ ಪ್ರಭಾವಿಗಳಾಗಿರುವ ಲಡಾಕ್‌ ಬೌದ್ಧ ಸಂಘಟನೆಯ ಸದಸ್ಯರಿಗೂ ನೂತನ ಮಂಡಳಿಯಲ್ಲಿ ಸ್ಥಾನ ದೊರೆಯಲಿದೆ.

ಲಡಾಕ್‌ ಮಾದರಿಯಲ್ಲಿಯೇ ಈಗಾಗಲೇ ಕಾರ್ಗಿಲ್‌ ಜಿಲ್ಲೆಯಲ್ಲಿ ಪ್ರತ್ಯೇಕ ಅಭಿವೃದ್ಧಿ ಮಂಡಳಿ ಇದ್ದು 2018ರಲ್ಲೇ ರಚನೆಯಾಗಿದೆ. ಶಾಸನಬದ್ಧ ಅಧಿಕಾರ ಹೊಂದುವ ಈ ಮಂಡಳಿಗಳ ಕಾರ್ಯಾವಧಿ ಐದು ವರ್ಷಗಳದ್ದಾಗಿರುತ್ತದೆ.