ವೀಡಿಯೋ ವೈರಲ್: ಸಂಸದರ ಪಾದ ತೊಳೆದು ಅದೇ ನೀರು ಸೇವಿಸಿದ ಕಾರ್ಯಕರ್ತ

ಹೊಸದಿಲ್ಲಿ: ಬಿಜೆಪಿ ಕಾರ್ಯಕರ್ತರೊಬ್ಬರು ಸಂಸದ ನಿಶಿಕಾಂತ್ ದುಬೆ ಅವರ ಪಾದನ್ನು ತೊಳೆದು ಅದೇ ನೀರನ್ನು ಸೇವಿಸಿದ ಘಟನೆಗೆ ಸಂಬಂಧಿಸಿದ ವೀಡಿಯೋ ವೈರಲ್ ಆಗಿದೆ. ಈ ವೀಡಿಯೋವನ್ನು ಎಎನ್‌ಐ ಸುದ್ದಿ ಸಂಸ್ಥೆ ಬಿಡುಗಡೆ ಮಾಡಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಗೊಡ್ಡ ಕ್ಷೇತ್ರದ ಬಿಜೆಪಿ ಸಂಸದರ ಪಾದಪೂಜೆ ಮಾಡಿದ ಕಾರ್ಯಕರ್ತರೊಬ್ಬರು ಬಳಿಕ ಅದೇ ನೀರನ್ನು ಕುಡಿದು ತಲೆ ಮೇಲೆ ಸಿಂಪಡಿಸಿಕೊಂಡಿದ್ದಾರೆ. ಕಾಝಿಯಾ ಸೇತುವೆಗೆ ಶಂಕುಸ್ಠಾಪನೆ ಮಾಡಲು ಸಂಸದರು ಆಗಮಿಸಿದ್ದಾಗ ಈ ಘಟನೆ ನಡೆದಿದೆ.

"ಈ ಸಂದರ್ಭದಲ್ಲಿ ಕಾರ್ಯಕರ್ತ ಮಾತನಾಡುತ್ತಾ, ಇಂದು ನೀವು ನಮಗೆ ಸೇತುವೆ ನೀಡುತ್ತಿದ್ದೀರಿ, ನಾನು ನಿಮ್ಮ ಪಾದವನ್ನು ತೊಳೆದು ಆ ನೀರನ್ನು ಕುಡಿಯುತ್ತೇನೆ" ಎಂದು ಹೇಳಿ ಬಳಿಕ ಅದರಂತೆಯೇ ಮಾಡಿದ್ದಾರೆ. ಒಂದು ನಿಮಿಷ ಕಾಲಾವಧಿಯ ವೀಡಿಯೋದಲ್ಲಿ ಕಾರ್ಯಕರ್ತ ಪಾದ ತೊಳೆಯುವುದನ್ನು ತೋರಿಸಲಾಗಿದೆ. ದುಬೆ ಸಹ ಇದಕ್ಕೆ ಸಂಬಂಧಿಸಿದ ಫೋಟೋವನ್ನು ಫೇಸ್‌ಬುಕ್‌ನಲ್ಲಿ ಹಂಚಿಕೊಂಡಿದ್ದು "ಭಗವಾನ್ ಕೃಷ್ಣ ಪಾದವನ್ನು ತೊಳೆದ" ಎಂದು ಬರೆದುಕೊಂಡಿದ್ದಾರೆ.

ಸಾಮಾಜಿಕ ಮಾಧ್ಯಮಗಳಲ್ಲಿ ಈ ಘಟನೆ ಸಾಕಷ್ಟು ಟ್ರೋಲ್‌ಗೆ ಒಳಗಾಗುತ್ತಿದ್ದು ಈ ಬಗ್ಗೆ ಪ್ರತಿಕ್ರಿಯಿಸಿರುವ ಸಂಸದ ದುಬೆ, "ಬಿಜೆಪಿ ಕಾರ್ಯಕರ್ತ ಪವನ್ ಶಾ ಜಿ ನಮ್ಮ ಪಾದವನ್ನು ತೊಳೆಯುವ ಮೂಲಕ ವಾಗ್ದಾವನ್ನು ಪೂರೈಸಿದ್ದಾರೆ. ನನಗೂ ಅಂತಹ ಅವಕಾಶ ಸಿಕ್ಕಿದರೆ ಪವನ್ ಜಿ ಅವರಿಗೆ ನಾನೂ ಸಹ ಹಾಗೆಯೇ ಮಾಡುತ್ತೇನೆ" ಎಂದಿದ್ದಾರೆ.


"ತಮ್ಮ ಪ್ರೀತಿಪಾತ್ರರ ಬಗ್ಗೆ ಆ ರೀತಿ ಮಾಡಿರುವುದರಲ್ಲಿ ಯಾವುದೇ ವಿಶೇಷವಿಲ್ಲ. ಕಾರ್ಯಕರ್ತರೊಬ್ಬರು ಸಂತೋಷದಿಂದ ಪಾದ ತೊಳೆದರೆ ಅದರಲ್ಲಿ ಶಾಕಿಂಗ್ ವಿಚಾರ ಏನಿದೆ? ಎಲ್ಲರ ಮುಂದೆಯೇ ಅವರು ಆ ರೀತಿ ಮಾಡಿ ಗೌರವ ಸೂಚಿಸಿದ್ದಾರೆ. ಪಾದ ತೊಳೆಯುವುದು ಜಾರ್ಖಂಡ್‌ನಲ್ಲಿ ಸಾಮಾನ್ಯ ಸಂಗತಿ. ಇದಕ್ಕೆ ಯಾಕೆ ರಾಜಕೀಯ ಬಣ್ಣ ನೀಡುತ್ತೀರಿ. ಅತಿಥಿಗಳ ಪಾದ ತೊಳೆಯುವುದು ತಪ್ಪು ಎಂದಾದರೆ ನಿಮ್ಮ ಪೂರ್ವಿಕರನ್ನು ಕೇಳಿ. ಮಹಾಭಾರತದಲ್ಲಿ ಕೃಷ್ಣ ಭಗವಾನನು ಪಾದ ತೊಳೆಯಲಿಲ್ಲವೇ? ನಿಮ್ಮ ಈ ಕ್ಷುಲ್ಲಕ ಮನಸ್ಥಿತಿಗೆ ನಾಚಿಕೆಯಾಗಬೇಕು" ಎಂದಿದ್ದಾರೆ.