ರಕ್ತದ ಮಡುವಿನಲ್ಲಿದ್ದ ಚಾಲಕನಿಂದ ಪ್ರಯಾಣಿಕರ ರಕ್ಷಣೆ

ವಿಲ್ಲುಪುರಮ್: ಅಪಘಾತವೊಂದರಲ್ಲಿ ರಾಜ್ಯ ಎಕ್ಸ್‌ಪ್ರೆಸ್ ಸಾರಿಗೆ ನಿಗಮದ ಬಸ್ ಚಾಲಕನೊಬ್ಬನಿಗೆ ಗಂಭೀರ ಗಾಯಗಳಾಗಿ, ರಕ್ತದ ಮಡುವಿನಲ್ಲಿದ್ದರೂ, ಪ್ರಯಾಣಿಕರನ್ನು ಉಳಿಸಿ ಕರ್ತವ್ಯ ಪ್ರಜ್ಞೆ ಮೆರೆದ ಘಟನೆ ಇಲ್ಲಿಗೆ ಸಮೀಪದಲ್ಲಿ ನಡೆದಿದೆ.

ತಂಜೋರಿನಿಂದ ಚೆನ್ನೈಗೆ ತೆರಳುತ್ತಿದ್ದ ಬಸ್‌ವೊಂದಕ್ಕೆ ಲಾರಿಯೊಂದು ಡಿಕ್ಕಿ ಹೊಡೆದ ಪರಿಣಾಮ ಜಿಲ್ಲೆಯ ವಿಕಿರವಂಡಿ ಗ್ರಾಮದ ಸಮೀಪ ಅಪಘಾತ ಸಂಭವಿಸಿತ್ತು. ರಾಷ್ಟ್ರೀಯ ಹೆದ್ದಾರಿಯಲ್ಲಿ ನಡೆದ ಈ ಅವಘಡದಿಂದ ಲಾರಿಯಲ್ಲಿ ಇದ್ದ ಕಬ್ಬಿಣದ ಸಲಾಕೆಗಳು ಬಸ್‌ನೊಳಗೆ ಮುಂಚಾಚಿ, ಪ್ರಯಾಣಿಕರ ಜೀವಕ್ಕೇ ಕುಂದು ತರುವುದಿತ್ತು. ಬಸ್ಸಿನ ಮುಂದಿನ ಗಾಜು ಪುಡಿ ಪುಡಿಯಾಗಿತ್ತು. ಚಾಲಕನಿಗೆ ಗಂಭೀರ ಗಾಯಗಳಾಗಿದ್ದವು. ಆದರೂ, ಸಮಯ ಪ್ರಜ್ಞೆ ಮೆರೆದ ಆತ ನಿಧಾನವಾಗಿ ಬಸ್ಸನ್ನು ಸುರಕ್ಷಿತ ಸ್ಥಳಕ್ಕೆ ಚಲಿಸಿ, ಪ್ರಯಾಣಿಕರಿಗೆ ಇಳಿಯಲು ಅನುವು ಮಾಡಿಕೊಟ್ಟಿದ್ದಾನೆ.

ಬಸ್‌ನಿಂದ ಇಳಿದ ಪ್ರಯಾಣಿಕರು ಚಾಲಕನನ್ನು ನೋಡಿದರೆ, ತಲೆಗೆ ಗಂಭೀರ ಗಾಯಗಳಾಗಿ ರಕ್ತದ ಮಡುವಿನಲ್ಲಿ ಬಿದ್ದಿದ್ದ. ಕಬ್ಬಿಣದ ಸಲಾಕೆಗಳು ಆತನಿಗೆ ತಾಗುವ ಸಾಧ್ಯತೆಯೂ ಇತ್ತು.

ತನ್ನ ಪ್ರಾಣವೇ ಅಪಾಯದಲ್ಲಿದ್ದರೂ, ಅಪಾಯದಲ್ಲಿದ್ದ ಪ್ರಯಾಣಿಕರನ್ನು ರಕ್ಷಿಸಲು ಚಾಲಕ ಮುಂದಾಗಿದ್ದು, ಎಲ್ಲರ ಪ್ರಶಂಸೆಗೆ ಕಾರಣವಾಗಿದೆ. ತಕ್ಷಣವೇ ಆತನನ್ನು ಸಮೀಪದ ಆಸ್ಪತ್ರೆಗೆ ಸಾಗಿಸಲಾಗಿದೆ.