ಅಮೆರಿಕಾಕ್ಕೆ ಪ್ರಯಾಣ ಬೆಳೆಸುತ್ತಿದೆ ಅಂಧ ಬೀದಿ ನಾಯಿ

ಮುಂಬಯಿ: ವಾಣಿಜ್ಯ ನಗರಿಯ ಬೀದಿಯಲ್ಲಿ ದಿಕ್ಕು ಕಾಣದೆ ಅಲೆದಾಡುತ್ತಿದ್ದ ಕಣ್ಣು ಕಾಣದ ಆ ನಾಯಿ ಬದುಕುವುದೇ ಕಷ್ಟವಾಗಿತ್ತು. ಮತ್ತೀಗ ಶಾಶ್ವತ ಆಸರೆಯನ್ನು ಪಡೆದುಕೊಂಡಿದೆ. ಅದು ಕೂಡ ದೂರದ ಅಮೆರಿಕಾದಲ್ಲಿ.

ಅದರ ಹೆಸರು ಮೆಹರ್, ಘಾಟ್ಕೋಪರ್ ರಸ್ತೆ ಬದಿಯಲ್ಲಿ ಮಲಗಿದ್ದ ಮರಿಯನ್ನು ನೋಡಿದ ಪ್ರಾಣಿ ಹಕ್ಕು ಕಾರ್ಯಕರ್ತೆ ವಿನಿತಾ ಕಲ್‌ಗುಟ್ಕರ್ ಹತ್ತಿರ ಹೋಗಿ ನೋಡಿದಾಗ ತಲೆ ಎತ್ತದೆ ಕುಳಿತಿತ್ತು. ಎತ್ತಿ ನೋಡಿದಾಗ ಕುರುಡ ನಾಯಿ ಎಂಬುದು ತಿಳಿಯಿತು. ತಕ್ಷಣ ಅವರವಳನ್ನು ಪ್ರಾಣಿಗಳ ದತ್ತು ಕೇಂದ್ರಕ್ಕೆ ತೆಗೆದುಕೊಂಡು ಹೋದರು. ನಗರದಲ್ಲಿ ಯಾರಾದರು ದತ್ತು ಪಡೆಯುತ್ತಾರಾ ಎಂದು ನಿರೀಕ್ಷಿಸಿದರು. ಆದರೆ ಯಾರೂ ಮುಂದಾಗಲಿಲ್ಲ.


ಕೇವಲ ವಾಸನೆಯಿಂದಲೇ ನಾಯಿ ಎಲ್ಲವನ್ನು ನಿಭಾಯಿಸುವ ಚಾಕಚಕ್ಯತೆ ತೋರುತ್ತದೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ವೀಡಿಯೋ ಸಮೇತ ಪ್ರಕಟಿಸಿದರೂ ಯಾರು ಸಹ ಅದಕ್ಕೆ ಆಶ್ರಯ ನೀಡುವ ಔದಾರ್ಯ ತೋರಲಿಲ್ಲ. ಕೊನೆಗೂ ಅಮೆರಕಾದ ದಂಪತಿಗೆ ಮೆಹೆರ್ ಇಷ್ಟವಾದಳು.

ಉತ್ತರ ವರ್ಜಿನಿಯಾದ ಪೀಟ್ ಮತ್ತು ಜಿಲ್ ಪೆಟ್ರಿಲ್ಲಿ ಅವರು ಆಕೆಗೆ ತಮ್ಮ ಪರಿವಾರದಲ್ಲಿ ಆಶ್ರಯ ನೀಡುತ್ತಿದ್ದು, ಗುರುವಾರ ಮೆಹೆರ್ ವಿಮಾನದ ಮೂಲಕ ಅಮೆರಿಕಾಕ್ಕೆ ಹಾರುತ್ತಿದ್ದಾಳೆ, ಶಾಶ್ವತ ಮನೆ ಸಿಕ್ಕಿದ ಖುಷಿಯೊಂದಿಗೆ...