ಹೇಳಿಕೆಯಿಂದ ದೂರವಿರಬೇಕಾಗಿತ್ತು: ಸತ್ಯಪಾಲ್‌ ಮಲಿಕ್‌

ಶ್ರೀನಗರ: ಉಗ್ರರು ಮುಗ್ಧರನ್ನು ಕೊಲ್ಲುವ ಬದಲು ಭ್ರಷ್ಟರನ್ನು ಗುರಿಯಾಗಿಸಿಕೊಳ್ಳಬೇಕು ಎಂದು ಹೇಳಿಕೆ ವಿವಾದ ಮೈಮೇಲೆ ಎಳೆದುಕೊಂಡಿದ್ದ ಜಮ್ಮು-ಕಾಶ್ಮೀರ ರಾಜ್ಯಪಾಲ ಸತ್ಯಪಾಲ್‌ ಮಲಿಕ್‌ ಅವರು, ಆಕ್ರೋಶದಿಂದ ಈ ಮಾತು ಹೊರಬಂದಿರುವುದಾಗಿ ಹೇಳಿದ್ದಾರೆ. ಅಲ್ಲದೇ ಇಂತಹ ಹೇಳಿಕೆಯಿಂದ ದೂರವಿರಬೇಕಾಗಿತ್ತು ಎಂದಿದ್ದಾರೆ.
''ರಾಜ್ಯದಲ್ಲಿನ ಭ್ರಷ್ಟಾಚಾರ ನೋಡಿ ನನ್ನ ರಕ್ತ ಕುದಿಯುತ್ತಿದೆ. ಅಷ್ಟರಮಟ್ಟಿಗೆ ವ್ಯವಸ್ಥೆ ಹದಗೆಟ್ಟಿದೆ. ಅನೇಕ ಅಧಿಕಾರಿಗಳು ಹಾಗೂ ರಾಜಕಾರಣಿಗಳು ಭ್ರಷ್ಟಾಚಾರದಲ್ಲಿ ತೊಡಗಿದ್ದು, ನಾನು ತನಿಖೆಗೆ ಆದೇಶಿಸಿದ ಪ್ರಕರಣಗಳಲ್ಲಿ ಮೂವರು ಮಾಜಿ ಸಚಿವರುಗಳ ಹೆಸರಗಳೂ ಇವೆ. ಈ ಆಕ್ರೋಶದಲ್ಲಿ ಉಗ್ರರು ಮುಗ್ಧರ ಬದಲಿಗೆ ಭ್ರಷ್ಟರನ್ನು ಗುರಿಯಾಗಿಸಿಕೊಳ್ಳಬೇಕು ಎಂದು ಹೇಳಿದೆ. ಆದರೆ ಸಾಂವಿಧಾನಿಕ ಹುದ್ದೆಯಲ್ಲಿದ್ದುಕೊಂಡು ನಾನು ಹೀಗೆ ಹೇಳಬಾರದಿತ್ತು,'' ಎಂದು ಅವರು ಹೇಳಿದ್ದಾರೆ.