ಬೋಧ್‌ಗಯಾ ಸ್ಫೋಟ: ಐವರು ಉಗ್ರರಿಗೆ ಜೀವಾವಧಿ

ಪಟನಾ: ಬಿಹಾರದಲ್ಲಿರುವ ಪ್ರಖ್ಯಾತ ಬೌದ್ಧ ಕ್ಷೇತ್ರ ಬೋಧ್‌ ಗಯಾದಲ್ಲಿ ನಡೆದ ಸರಣಿ ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಂಡಿಯನ್‌ ಮುಜಾಹಿದ್ದೀನ್‌(ಐಎಂ) ಸಂಘಟನೆಯ ಐವರು ಉಗ್ರರಿಗೆ ಭಯೋತ್ಪಾದನಾ ನಿಗ್ರಹ ದಳದ ವಿಶೇಷ ನ್ಯಾಯಾಲಯ ಶುಕ್ರವಾರ ಜೀವಾವಧಿ ಶಿಕ್ಷೆ ವಿಧಿಸಿ ತೀರ್ಪು ನೀಡಿದೆ.

2013ರ ಜಲೈ 7ರಂದು ನಡೆದ ಸರಣಿ ಸ್ಫೋಟದಲ್ಲಿ ಬೌದ್ಧ ಸನ್ಯಾಸಿಗಳೂ ಸೇರಿದಂತೆ ಹಲವರು ಗಾಯಗೊಂಡಿದ್ದರು.

ನ್ಯಾಯಾಧೀಶರಾದ ಮನೋಜ್‌ ಕುಮಾರ್‌ ಸಿನ್ಹಾ ಅವರು ಐವರು ಅಪರಾಧಿಗಳಾದ ಇಮ್ತಾಜ್‌ ಅನ್ಸಾರಿ, ಹೈದರ್‌ ಅಲಿ, ಮುಜಿಬ್‌ ಉಲ್ಲಾಹ್‌, ಒಮೈರ್‌ ಸಿದ್ದಿಕಿ, ಅಜರುದ್ದೀನ್‌ ಖುರೇಷಿಗೆ ಜೀವಾವಧಿ ಶಿಕ್ಷೆ ಜತೆಗೆ ತಲಾ 50 ಸಾವಿರ ದಂಡ ವಿಧಿಸಿ ತೀರ್ಪು ನೀಡಿದರು.

ಪ್ರಕರಣದ ಆರನೇ ಆರೋಪಿ ಮತ್ತು ಬಾಲಾಪರಾಧಿ ಟೌಫಿನ್‌ ಅಹ್ಮದ್‌ನನ್ನು ತಪ್ಪಿತಸ್ಥನೆಂದು ಪರಿಗಣಿಸಿದ ಬಾಲಾಪರಾಧಿ ನ್ಯಾಯಾ ಮಂಡಳಿಯು ಕಳೆದ ಅಕ್ಟೋಬರ್‌ನಲ್ಲೇ ತೀರ್ಪು ಪ್ರಕಟಿಸಿತ್ತು. ಬಾಲಾಪರಾಧಿಯನ್ನು ಮೂರು ತಿಂಗಳ ರಿಮ್ಯಾಂಡ್‌ ಹೋಂಗೆ ಕಳುಹಿಸಲಾಗಿದೆ.

ಭಾರತೀಯ ದಂಡ ಸಂಹಿತೆ ಹಾಗೂ ಕಾನೂನು ಬಾಹಿರ ಚಟುವಟಿಕೆಗಳ(ತಡೆ) ಕಾಯದೆ ಹಾಗೂ ಸ್ಫೋಟಕಗಳ ಅಧಿನಿಯಮದ ವಿವಿಧ ಸೆಕ್ಷನ್‌ಗಳ ಅನ್ವಯ ಶಿಕ್ಷೆ ವಿಧಿಸಲಾಗಿದೆ.