ಬಾಲ್ಯ ವಿವಾಹ ಮಾನ್ಯ ಮಾಡಿದ ಬಾಂಬೆ ಹೈಕೋರ್ಟ್‌

ಮುಂಬಯಿ: ಅಪರೂಪದ ಪ್ರಕರಣವೊಂದರಲ್ಲಿ ಬಾಂಬೆ ಹೈಕೋರ್ಟ್‌ 14 ವರ್ಷದ ಬಾಲಕಿ ಜತೆಗಿನ 56 ವರ್ಷದ ವಕೀಲನ ವಿವಾಹವನ್ನು ಪರಸ್ಪರ ಸಮ್ಮತಿ ಮೇರೆಗೆ ಮಾನ್ಯ ಮಾಡಿ ತೀರ್ಪು ನೀಡಿದೆ.

ಅಪ್ರಾಪ್ತ ವಯಸ್ಸಿನ ಬಾಲಕಿಯನ್ನು ಮದುವೆಯಾಗಿದ್ದಕ್ಕಾಗಿ ತಮ್ಮ ವಿರುದ್ಧ ದಾಖಲಾಗಿದ್ದ ಅತ್ಯಾಚಾರ ಪ್ರಕರಣದ ವಜಾ ಕೋರಿ ವಕೀಲ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ರಂಜಿತ್‌ ಮೋರೆ ಮತ್ತು ಭಾರತಿ ದಂಗ್ರೆ ಒಳಗೊಂಡ ವಿಭಾಗೀಯ ಪೀಠ, ಪ್ರಕರಣ ಇತ್ಯರ್ಥಗೊಳಿಸಿ ತೀರ್ಪು ನೀಡಿದೆ.

ಸೆರೆವಾಸ: 2014ರಲ್ಲಿ 14 ವರ್ಷ ವಯಸ್ಸಿನ ಸಂಬಂಧಿ ಬಾಲಕಿಯನ್ನು 56 ವರ್ಷದ ವಕೀಲ ಮದುವೆಯಾಗಿದ್ದರು. ಬಳಿಕ ಬಾಲಕಿ, ವಕೀಲನ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದರು. ಅತ್ಯಾಚಾರ ಆರೋಪದಡಿ ಬಂಧಿತನಾಗಿದ್ದ ವಕೀಲ 10 ತಿಂಗಳ ಸೆರೆವಾಸ ಅನುಭವಿಸಿ ಜಾಮೀನಿನ ಮೇಲೆ ಬಿಡುಗಡೆಗೊಂಡಿದ್ದ. ಏತನ್ಮಧ್ಯೆ, ಬಾಲಕಿಗೆ 18 ವರ್ಷ ತುಂಬಿ ಆಕೆ ಹಾಗೂ ವಕೀಲನ ನಡುವಿನ ವೈಷಮ್ಯ ಬಗೆಹರಿದು ಕೂಡಿ ಬಾಳುವ ಒಡಂಬಡಿಕೆ ಏರ್ಪಟ್ಟಿತ್ತು. ಈ ಸಂಗತಿಯನ್ನು ಖುದ್ದು ಆ ಮಹಿಳೆ ಕೋರ್ಟ್‌ಗೆ ಅಫಿಡವಿಟ್‌ ಸಲ್ಲಿಸುವ ಮೂಲಕ ಸ್ಪಷ್ಟಪಡಿಸಿದ್ದರು. ಇದನ್ನು ಪರಿಗಣಿಸಿದ ಕೋರ್ಟ್‌ ತಥಸ್ತು ಎಂದಿದೆ.