ಶಿಶುಗಳ ಜೀವ ಉಳಿಸುವ ಬ್ರೇಸ್‌ಲೆಟ್‌

ಬೆಂಗಳೂರು: ನಗರದ ಯುವಕ ರತುಲ್‌ ನರೇನ್‌ ಅಭಿವೃದ್ಧಿಪಡಿಸಿರುವ ಪುಟ್ಟ ಸಾಧನವೊಂದು ಹೆಪೋಥರ್ಮಿಯಾದಿಂದ ಬಳಲುತ್ತಿರುವ ಕಡಿಮೆ ತೂಕದ ನವಜಾತ ಶಿಶುಗಳ ಜೀವ ರಕ್ಷಣೆಯಲ್ಲಿ ಮಹತ್ವದ ಪಾತ್ರ ವಹಿಸಿದೆ. ಅಮೆರಿಕದ ಸ್ಟ್ಯಾನ್‌ಫೋರ್ಡ್‌ ಯೂನಿವರ್ಸಿಟಿಯಲ್ಲಿ ವ್ಯಾಸಂಗ ಮಾಡಿರುವ ನರೇನ್‌ 'ಬೆಂಪು' ಹೆಸರಿನಲ್ಲಿ 8 ಗ್ರಾಂ ತೂಕದ ಬ್ರೇಸ್‌ಲೆಟ್‌ ಮಾದರಿಯ ಸಾಧನ ಅಭಿವೃದ್ಧಿಪಡಿಸಿದ್ದು ಇದು ದೂರದ ಪಪುವಾ ನ್ಯೂ ಗಿನಿಯಾ ಸೇರಿದಂತೆ ಅನೇಕ ದೇಶಗಳಲ್ಲಿ ಸಾವಿರಾರು ಕಂದಮ್ಮಗಳ ಜೀವ ಉಳಿಸುತ್ತಿದೆ.

ಅತಿಯಾದ ಶೀತ ವಾತಾವರಣದಲ್ಲಿ ನವಜಾತ ಶಿಶುಗಳ ದೇಹದಲ್ಲಿ ದಿಢೀರ್‌ ಕುಸಿತ ಉಂಟಾಗುವುದು ಸಾಮಾನ್ಯ. ಅದರಲ್ಲೂ ಕಡಿಮೆ ತೂಕದ ಕಂದಮ್ಮಗಳಲ್ಲಿ ಇದು ಹೆಚ್ಚು. ಇದಕ್ಕೆ ವೈದ್ಯಕೀಯ ಪರಿಭಾಷೆಯಲ್ಲಿ ಹೈಪೋಥರ್ಮಿಯಾ ಎನ್ನಲಾಗುತ್ತದೆ. ಪಪುವಾ ನ್ಯೂ ಗಿನಿಯಾದಲ್ಲಿ ಕಡಿಮೆ ತೂಕದ ನವಜಾತ ಶಿಶುಗಳಲ್ಲಿ ಉಷ್ಣಾಂಶ ಕುಸಿಯುವುದು ಸಾಮಾನ್ಯವಾಗಿದ್ದು, 'ಬೆಂಪು' ಸಾಧನ ಹೆಚ್ಚಾಗಿ ಬಳಸಲಾಗುತ್ತಿದೆ ಎಂದು ಯೂನಿಸೆಫ್‌ ಸಂಸ್ಥೆ ತಿಳಿಸಿದೆ. ಇದುವರೆಗೂ 2.5 ಕೆ.ಜಿ.ಗೂ ಕಡಿಮೆ ತೂಕದ 1,300 ಶಿಶುಗಳ ಆರೈಕೆಯಲ್ಲಿ ಇದನ್ನು ಬಳಸಲಾಗಿದೆ ಎನ್ನುತ್ತಾರೆ ಪಪುವಾ ನ್ಯೂಗಿನಿಯಾದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಡಾ.ಘನಶ್ಯಾಮ್‌.

ಅಲರ್ಟ್‌ ಮಾಡುತ್ತೆ: ಬ್ರೇಸ್‌ಲೆಟ್‌ ರೀತಿಯ ಈ ಸಾಧನವನ್ನು ಕಂದಮ್ಮಗಳ ಕೈಗೆ ಕಟ್ಟಲಾಗುತ್ತದೆ. ಶಿಶುವಿನ ದೇಹದ ಉಷ್ಣಾಂಶ ಸರಾಸರಿ ಸಾಮಾನ್ಯ ಮಟ್ಟಕ್ಕಿಂತಲೂ ಕಡಿಮೆ ಪ್ರಮಾಣಕ್ಕೆ ಕುಸಿದಾಗ ತಕ್ಷಣವೇ ಪುಟಾಣಿ ಲೈಟ್‌ ಕಿತ್ತಳೆ ವರ್ಣದೊಂದಿಗೆ ಬೆಳಗಿ ಅಲಾರಾಂನೊಂದಿಗೆ ಎಚ್ಚರಿಸುತ್ತದೆ. ತುರ್ತು ವೈದ್ಯಕೀಯ ಆರೈಕೆಗೆ ಇದು ನೆರವಾಗಲಿದೆ ಎನ್ನುತಾರೆ ಡಾ.ಘನಶ್ಯಾಮ್‌.