‘ಬ್ರಹ್ಮೋಸ್‌’ ಈಗ 40 ಸಾವಿರ ಕೋಟಿ ರೂ. ಯೋಜನೆ

ಹೊಸದಿಲ್ಲಿ: ಪರಮಾಣು ಸಿಡಿತಲೆ ಹೊತ್ತು ಶಬ್ದಕ್ಕಿಂತ ಹೆಚ್ಚು ವೇಗವಾಗಿ ಸಾಗಬಲ್ಲ ಕ್ಷಿಪಣಿ ನಿರ್ಮಿಸುವ ಉದ್ದೇಶದಿಂದ 1998ರಲ್ಲಿ ರಷ್ಯಾದೊಂದಿಗೆ ಜಂಟಿ ಸಹಯೋಗದಲ್ಲಿ ಭಾರತ ಆರಂಭಿಸಿದ 'ಬ್ರಹ್ಮೋಸ್‌' ಯೋಜನೆಯ ವ್ಯವಹಾರ ಮೊತ್ತ ಈಗ 40 ಸಾವಿರ ಕೋಟಿ ರೂ. ಆಗಿದೆ.

''ಆರಂಭದಲ್ಲಿ ನಾವು ಕೇವಲ 1300 ಕೋಟಿ ರೂ. ಹೂಡಿಕೆ ಮಾಡಿದ್ದೆವು. ಆದರೆ ಯೋಜನೆ ಅಡಿಯಲ್ಲಿ ನಡೆಯುತ್ತಿರುವ ವಹಿವಾಟು ಮತ್ತು ವ್ಯಾಪಾರ ಈಗ 40 ಸಾವಿರ ಕೋಟಿ ರೂ. ಮೊತ್ತ ದಾಟಿದೆ,'' ಎಂದು ಬ್ರಹ್ಮೋಸ್‌ ಏರೋಸ್ಪೇಸ್‌ ಸಿಇಒ ಸುಧೀರ್‌ ಮಿಶ್ರಾ ತಿಳಿಸಿದ್ದಾರೆ. ಸರಕಾರಕ್ಕೆ ಆಸ್ತಿ, ದೇಶಕ್ಕೆ ಉತ್ತಮ ಪರಿಸರವನ್ನು ಯೋಜನೆ ಮೂಲಕ ಸೃಷ್ಟಿಸಲಾಗಿದೆ. ಇದುವರೆಗೂ ನೇರ ಹಾಗೂ ಪರೋಕ್ಷ ತೆರಿಗೆ ರೂಪದಲ್ಲಿ 4 ಸಾವಿರ ಕೋಟಿ ರೂ. ಸರಕಾರಕ್ಕೆ ಪಾವತಿಸಿದ್ದೇವೆ ಎಂದು ಮಿಶ್ರಾ ಹೇಳಿದ್ದಾರೆ.

ಸುಮಾರು 200 ಕೈಗಾರಿಕೆಗಳು ನಮ್ಮ ಯೋಜನೆಯ ಭಾಗವಾಗಿವೆ. 20 ಸಾವಿರ ಉದ್ಯೋಗ ಸೃಷ್ಟಿಯಾಗಿದೆ. ಇತರ ಕ್ಷೇತ್ರಗಳಲ್ಲಿಯೂ ಭಾರತ , ರಷ್ಯಾ ನಡುವೆ ಜಂಟಿ ಸಹಯೋಗದ ಯೋಜನೆಗಳು ಜಾರಿಗೆ ಬರಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

100 ಬಾಲಾಕೋಟ್‌ ಬಾಂಬ್‌ ಖರೀದಿ
ಫೆ. 26ರಂದು ಬಾಲಾಕೋಟ್‌ನಲ್ಲಿನ ಉಗ್ರರ ತಾಣಗಳ ಮೇಲೆ ದಾಳಿಗೆ ಭಾರತೀಯ ವಾಯುಪಡೆ ಬಳಸಿದ್ದ ಸ್ಪೈಸ್‌ ಬಾಂಬ್‌ಗಳನ್ನು ಮತ್ತಷ್ಟು ಖರೀದಿಸಲು ಭಾರತ ಮುಂದಾಗಿದೆ. ಇಸ್ರೇಲ್‌ ನಿರ್ಮಿತ ಸ್ಪೈಸ್‌ ಬಾಂಬ್‌ಗಳನ್ನು ಪೂರೈಕೆ ಮಾಡುವ ಕುರಿತು ಭಾರತೀಯ ವಾಯುಪಡೆ 300 ಕೋಟಿ ರೂ. ಮೊತ್ತದ ಒಪ್ಪಂದವನ್ನು ಮಾಡಿಕೊಂಡಿದೆ. ಬಾಲಾಕೋಟ್‌ ದಾಳಿಗೆ ಬಳಸಿದ್ದ ಬಾಂಬ್‌ಗಳ ಉನ್ನತೀಕರಿಸಲಾದ ಆವೃತ್ತಿ ಇದಾಗಿದ್ದು, ಸ್ಪೈಸ್‌-2000 ಎಂದು ಹೆಸರಿಸಲಾಗಿದೆ. 60 ಕಿ.ಮೀ. ದೂರದವರೆಗೆ ದಾಳಿ ನಡೆಸುವ ಸಾಮರ್ಥ್ಯ‌ ಸ್ಪೈಸ್‌ಗಿದೆ.