71ನೇ ಗಣರಾಜ್ಯೋತ್ಸವಕ್ಕೆ ಬ್ರೆಜಿಲ್‌ ಅಧ್ಯಕ್ಷ 'ಜೇರ್‌ ಮೆಸ್ಸಿಯಾಸ್‌ ಬೊಲ್ಸೊನಾರೊ' ಮುಖ್ಯ ಅತಿಥಿ

ಹೊಸದಿಲ್ಲಿ: ಈ ಬಾರಿಯ ಗಣರಾಜ್ಯೋತ್ಸವ ಪರೇಡ್‌ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಬ್ರೆಜಿಲ್‌ ಅಧ್ಯಕ್ಷ ಜೇರ್‌ ಮೆಸ್ಸಿಯಾಸ್‌ ಬೊಲ್ಸೊನಾರೊ ಅತಿಥಿಯಾಗಿ ಭಾಗವಹಿಸಲಿದ್ದಾರೆ ಎಂದು ಕೇಂದ್ರ ಸರಕಾರ ಮಂಗಳವಾರ ಅಧಿಕೃತವಾಗಿ ಘೋಷಿಸಿದೆ.

ಬೊಲ್ಸೊನಾರೊ ಅವರು ನಾಲ್ಕು ದಿನಗಳ ಪ್ರವಾಸಕ್ಕಾಗಿ ಜ.24ರಂದು ಭಾರತಕ್ಕೆ ಆಗಮಿಸಲಿದ್ದಾರೆ. ಅವರು ತಮ್ಮೊಂದಿಗೆ ಸಂಪುಟದ ಏಳು ಸಚಿವರನ್ನು ಕರೆತರುತ್ತಿದ್ದಾರೆ. ಬ್ರೆಜಿಲ್‌ನ ಯಶಸ್ವಿ ಉದ್ಯಮಿಗಳ ನಿಯೋಗವೂ ಅವರೊಂದಿಗೆ ಆಗಮಿಸಲಿದೆ. ತಂಡ ಮಂಗಳವಾರ ಪ್ರವಾಸ ಆರಂಭಿಸಿದೆ. ಭಾರತ-ಬ್ರೆಜಿಲ್‌ ನಡುವೆ 15 ಒಪ್ಪಂದಗಳು ಏರ್ಪಡುವ ಸಾಧ್ಯತೆ ಇದೆ.

ಪ್ರಧಾನಿ ನರೇಂದ್ರ ಮೋದಿ ಅವರ ಆಹ್ವಾನ ಮನ್ನಿಸಿ ಗಣರಾಜ್ಯೋತ್ಸವಕ್ಕೆ ಅತಿಥಿಯಾಗಲು ಬ್ರೆಜಿಲ್‌ ಅಧ್ಯಕ್ಷ ಬರುತ್ತಿದ್ದಾರೆ. ಇದು ಅವರ ಚೊಚ್ಚಲ ಭಾರತ ಭೇಟಿಯಾಗಿದೆ. ಈ ಮೂಲಕ ಉಭಯ ರಾಷ್ಟ್ರಗಳ ನಡುವಿನ ಸಂಬಂಧ ಮತ್ತಷ್ಟು ಸುಧಾರಣೆ ಕಂಡು ಬ್ರಿಕ್ಸ್‌ ಒಕ್ಕೂಟಕ್ಕೆ ಮತ್ತಷ್ಟು ಬಲ ಬರಲಿದೆ ಎಂಬ ಆಶಯವಿದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಪ್ರಕಟಣೆಯಲ್ಲಿತಿಳಿಸಿದೆ. 1996 ಹಾಗೂ 2004ರ ಗಣರಾಜ್ಯೋತ್ಸವ ಪರೇಡ್‌ ಕಾರ್ಯಕ್ರಮದಲ್ಲಿಅಂದಿನ ಬ್ರೆಜಿಲ್‌ ಅಧ್ಯಕ್ಷರು ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ್ದಾರೆ.

2018ರ ಅಕ್ಟೋಬರ್‌ನಲ್ಲಿನಡೆದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಭರ್ಜರಿ ಜಯಭೇರಿ ಮೂಲಕ ಬೊಲ್ಸೊನಾರೊ ಬ್ರೆಜಿಲ್‌ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. 2016ರಲ್ಲಿಗೋವಾದಲ್ಲಿನಡೆದ 8ನೇ ಬ್ರಿಕ್ಸ್‌ ಶೃಂಗಕ್ಕೆ ಅಂದಿನ ಬ್ರೆಜಿಲ್‌ ಅಧ್ಯಕ್ಷ ಮಿಶೆಲ್‌ ತೆಮರ್‌ ಆಗಮಿಸಿದ್ದರು. ಬಳಿಕ ಕಳೆದ ನವೆಂಬರ್‌ನಲ್ಲಿ11ನೇ ಬ್ರಿಕ್ಸ್‌ ಶೃಂಗಸಭೆಯಲ್ಲಿಭಾಗವಹಿಸಲು ಪ್ರಧಾನಿ ಮೋದಿ ಅವರು ಬ್ರೆಜಿಲ್‌ಗೆ ಭೇಟಿ ನೀಡಿದ್ದರು.

ಬೊಲ್ಸೊನಾರೊ ಕಾರ್ಯಕ್ರಮ ಪಟ್ಟಿ

• - ಖಾಸಗಿ ವಿಮಾನದಲ್ಲಿಶುಕ್ರವಾರ ದಿಲ್ಲಿಗೆ ಆಗಮನ
• - ಶನಿವಾರ ರಾಷ್ಟ್ರಪತಿ ಭವನಕ್ಕೆ ಭೇಟಿ, ರಾಷ್ಟ್ರಪತಿ ಕೋವಿಂದ್‌, ಉಪರಾಷ್ಟ್ರಪತಿ ವೆಂಕಯ್ಯ ನಾಯ್ಡು, ವಿದೇಶಾಂಗ ಸಚಿವ ಜೈಶಂಕರ್‌ ಅವರೊಂದಿಗೆ ಚರ್ಚೆ
• - ಭಾನುವಾರ ಗಣರಾಜ್ಯೋತ್ಸವ ಪರೇಡ್‌ ಕಾರ್ಯಕ್ರಮದಲ್ಲಿಪ್ರಧಾನಿ ಮೋದಿ ಅವರೊಂದಿಗೆ ಭಾಗಿ
• - ಸೋಮವಾರ ಇಂಡಿಯಾ-ಬ್ರೆಜಿಲ್‌ ಬ್ಯುಸಿನೆಸ್‌ ಫೋರಂನಲ್ಲಿಭಾಗಿ, ಭಾರತೀಯ ಉದ್ಯಮಿಗಳೊಂದಿಗೆ ಚರ್ಚೆ