ಅದ್ದೂರಿಯಾಗಿ ನಡೆಯಿತು ಹಿಂದೂ ಸಂಪ್ರದಾಯದಂತೆ ಮಂಗಳಮುಖಿ ಮದುವೆ !

ಭುವನೇಶ್ವರ್‌: ಈಗಾಗಲೇ ದೇಶದಲ್ಲಿ ಯಾರಿಗೂ ತಿಳಿಯದಂತೆ ಯುವಕರೊಂದಿಗೆ ಗುಟ್ಟಾಗಿ ಮಂಗಳಮುಖಿಯರು ಮದುವೆಯಾಗಿರುವ ಅನೇಕ ಘಟನೆಗಳು ನಡೆದು ಹೋಗಿವೆ. ತಮ್ಮ ಸುಮುದಾಯವನ್ನೇ ಕೀಳುಮಟ್ಟದಲ್ಲಿ ಕಾಣುವ ಈ ಕಾಲಘಟ್ಟದಲ್ಲಿ, ಒಡಿಶಾದ ಭುವನೇಶ್ವರದಲ್ಲಿ ಮಂಗಳಮುಖಿಯೊಬ್ಬರು ಹಿಂದೂ ಪದ್ದತಿಯಂತೆ ಮದುವೆಯಾಗಿ ಸುದ್ದಿಯಾಗಿದ್ದಾರೆ.

ಶುಕ್ರವಾರದಂದು ಮಂಗಳಮುಖಿ ಮೇಘನಾ ಹಾಗೂ ಬಸುದೇವ್‌ ಭುವನೇಶ್ವರದ ದೇವಾಲಯದಲ್ಲಿ ಹಿಂದೂ ಸಂಪ್ರದಾಯದಂತೆ ಮದುವೆಯಾಗಿದ್ದಾರೆ. ಇವರ ಮದುವೆಗೆ ಭುವನೇಶ್ವರದ ಪಾಲಿಕೆಯ ಮೇಯರ್‌ ಅನಂತ್‌ ನಾರಾಯಣ್‌ ಜೇನಾ ಕೂಡಾ ಆಗಮಿಸಿ ನವ ಜೋಡಿಗಳನ್ನು ಹರಸಿದ್ದಾರೆ.

ಬಳಿಕ ಎಎನ್‌ಐ ಜತೆ ಮಾತನಾಡಿರುವ ಮೇಘನಾ, " ಈ ಸಮಾಜದಲ್ಲಿ ಮಂಗಳಮುಖಿಯರನ್ನು ಕಂಡರೆ ವಿಚಿತ್ರ ಮನೋಭಾವ ಹೊಂದಿದ್ದಾರೆ, ಅಲ್ಲದೇ ನಮಗೆ ಮದುವೆ ಹಾಗೂ ತಾಯ್ತನದ ಶಕ್ತಿಯಿಲ್ಲ ಎಂಬ ಅಭಿಪ್ರಾಯ ಹೊಂದಿದ್ದಾರೆ. ಈ ಎಲ್ಲಾ ತಪ್ಪು ಕಲ್ಪನೆಯನ್ನು ನಾನು ಸುಳ್ಳು ಮಾಡುತ್ತೇನೆ, ತನ್ನನ್ನು ಮದುವೆಯಾಗುವಂತಹ ದೃಢ ನಿರ್ಧಾರ ತೆಗೆದುಕೊಂಡಿರುವ ಬಸುದೇವ್‌ ಹಾಗೂ ಕುಟುಂಬದವರಿಗೆ ಕೃತಜ್ಞತೆ ಸಲ್ಲಿಸುತ್ತೇವೆ ಎಂದಿದ್ದಾರೆ.

ಬಸುದೇವ್‌ಗೆ ಈ ಮೊದಲೇ ಮದುವೆಯಾಗಿದ್ದು ಕೌಟುಂಬಿಕ ಕಲಹದಿಂದ ವಿಚ್ಛೇದನ ಪಡೆದಿದ್ದರು, "ಬಸುದೇವ್‌ ಕುಟುಂಬಸ್ಥರೇ ತನ್ನನ್ನು ನೋಡಿ ಮದುವೆ ಪ್ರಸ್ತಾಪ ನಡೆಸಿದ್ದಾರೆ, ಹಾಗಾಗಿ ಇದೊಂದು ಪೂರ್ವ ನಿಶ್ಚಿತ ಮದುವೆ " ಎಂದು ಮೇಘನಾ ತಿಳಿಸಿದ್ದಾರೆ.