ಮದುವೆಯನ್ನೇ ಮುರಿಯಿತು ವರನ ಡ್ಯಾನ್ಸ್‌!

ಷಹಜಹಾನ್ಪುರ್: ಇತ್ತೀಚಿನ ಮದುವೆ ಸಮಾರಂಭಗಳಲ್ಲಿ ನಾಗಿನ್‌ ಡ್ಯಾನ್ಸ್‌ ಅಂದರೆ ಹಾವಿನಂತೆ ನರ್ತಿಸುವುದು ಟ್ರೆಂಡ್‌ ಆಗಿದೆ. ಆದರೆ ಇದೇ ಡ್ಯಾನ್ಸ್‌ ಒಂದು ಮದುವೆ ರದ್ದಾಗಲು ಕಾರಣವಾಯ್ತು ಎಂದರೆ ನೀವು ನಂಬಲೇಬೇಕು.

ವರ ಕಂಠಪೂರ್ತಿ ಕುಡಿದು, ಡಿಜೆ ಪ್ಲೇ ಮಾಡುತ್ತಿದ್ದ ಸಂಗೀತಕ್ಕೆ ನಾಗಿನ್‌ ಡ್ಯಾನ್ಸ್‌ ಮಾಡಲು ಶುರು ಮಾಡಿದ್ದಾನೆ. ಭಾವಿ ಪತಿಯ ಡ್ಯಾನ್ಸ್‌ ಹಾಗೂ ವಿಚಿತ್ರ ವರ್ತನೆಯನ್ನು ಕಂಡ ವಧು, 'ಈತ ನನಗೆ ಸರಿಯಾದ ಜೋಡಿಯಲ್ಲ,' ಎಂದು ನಿರ್ಧರಿಸಿ, ಮದುವೆಯನ್ನೇ ರದ್ದುಗೊಳಿಸಿದ್ದಾಳೆ. ಇನ್ನೇನು ಮದುವೆ ಮಹೂರ್ತ ಹತ್ತಿರ ಬರುತ್ತಿದೆ ಎನ್ನುವಷ್ಟರಲ್ಲಿ ಕುಡುಕ ವರನ ಡ್ಯಾನ್ಸ್‌ನಿಂದ ಮದುವೆಯೇ ಕ್ಯಾನ್ಸಲ್ ಆಗಿದೆ.

ಅನುಭವ್‌ ಮಿಶ್ರಾ ಜತೆ 23 ವರ್ಷದ ಪ್ರಿಯಾಂಕಾ ತ್ರಿಪಾಟಿ ಮದುವೆ ನಿಶ್ಚಯವಾಗಿತ್ತು. ಒಂದೇ ಸಮುದಾಯಕ್ಕೆ ಸೇರಿದ ಉಭಯ ಕಟುಂಬಗಳು ಒಬ್ಬರನ್ನೊಬ್ಬರು ಚೆನ್ನಾಗಿಯೇ ಅರಿತುಕೊಂಡಿದ್ದವು. ಮದುವೆಗೂ ಸಂಭ್ರಮದ ತಯಾರಿ ನಡೆಸಿ, ಉಡುಗೊರೆಗಳನ್ನೂ ಪರಸ್ಪರ ಹಂಚಿಕೊಂಡಿದ್ದರು. ಮದುವೆ ನಡೆದೇ ಹೋಯಿತು ಎನ್ನುವಷ್ಟರಲ್ಲಿ ಅನುಭವ್‌ ಡ್ಯಾನ್ಸ್‌ ಎಲ್ಲವನ್ನೂ ಬಡುಮೇಲು ಮಾಡಿದೆ.

ವಧುವಿನ ಮನವೊಲಿಸಲು ವರನ ಕಡೆಯವರು ಯತ್ನಿಸಿದರೂ, ಫಲ ನೀಡಲಿಲ್ಲ. ಮಾರನೇ ದಿನ ಪ್ರಿಯಾಂಕಾ ಆಪ್ತ ಸಂಬಂಧಿಯೊಡನೆ ಸಪ್ತಪದಿ ತುಳಿದಳು.