ಕುದುರೆ ಸಾರೋಟಿನಲ್ಲಿ ವಿವಾಹ ಮಂಟಪಕ್ಕೆ ಬಂದ ವಧು

ಅಲ್ವಾರ್‌: ತಲತಲಾಂತರದಿಂದ ನಡೆದುಕೊಂಡು ಬಂದ ಸಂಪ್ರದಾಯಗಳಿಗೆ ಬ್ರೇಕ್ ಹಾಕಿ ಮಹಿಳಾ ಸಬಲೀಕರಣದ ಬಗ್ಗೆ ಬಲವಾದ ಸಂದೇಶ ರವಾನಿಸುವ ಉದ್ದೇಶದಿಂದ ಬೇಹ್ರೂರ್ ಪಟ್ಟಣದ ವಧು ಸಾರೋಟದಲ್ಲಿ ಮದುವೆ ಸಮಾರಂಭಕ್ಕೆ ಆಗಮಿಸಿದ್ದರು.

ವಧುವಿನ ಅಲಂಕಾರದ ಉಡುಪಿನಲ್ಲಿಇಂಗ್ಲಿಷ್ ಸಾಹಿತ್ಯ ವಿಭಾಗದ ವಿದ್ಯಾರ್ಥಿ ಜಿಯಾ ಶರ್ಮಾ (25) ಅವರು ಕುದುರೆಯನ್ನೇರಿ ತಮ್ಮ ಮದುವೆ ಮೆರವಣಿಗೆಯಲ್ಲಿ ಪಾಲ್ಗೊಂಡರು. ವರನ ಕಡೆಯವರು ವಧುವಿಗೆ ಆತ್ಮೀಯ ಸ್ವಾಗತ ಕೋರಿದರು. ಈ ವಿಶೇಷವಾದ ಮದುವೆ ಮೆರವಣಿಗೆಯಲ್ಲಿ ವಧುವಿನ ಸ್ನೇಹಿತೆಯರು ನೃತ್ಯ ಮಾಡುತ್ತ ಸಂಭ್ರಮಿಸಿದರು.

ರಸ್ತೆಯ ಎರಡು ಬದಿ ಹಾಗೂ ಮನೆಯ ಮಹಡಿಯ ಮೇಲೆ ನಿಂತು ಜನರು ಈ ವಿಶೇಷ ಮದುವೆ ಮೆರವಣಿಗೆಯ ದೃಶ್ಯಗಳನ್ನು ಕಣ್ತುಂಬಿಕೊಂಡರು.

ತನ್ನ ಕುಟುಂಬ ಯಾವುದೇ ತರಹದ ವರದಕ್ಷಿಣೆ ನೀಡದೇ ವಿವಾಹ ಸಮಾರಂಭ ನಡೆಸಿಕೊಟ್ಟಿದೆ ಎಂದು ಜಿಯಾ ಶರ್ಮಾ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.

'ಇಂತಹ ವಿವಾಹಗಳು ಸಮಾಜಕ್ಕೆ ಉತ್ತಮ ಸಂದೇಶ ರವಾನಿಸುತ್ತವೆ. ರಾಜಸ್ತಾನದ ಜನತೆ ಹೆಣ್ಣು ಮಗುವನ್ನು ಸ್ವೀಕರಿಸಲು ಹಿಂದೇಟು ಹಾಕುತ್ತಿದ್ದಾರೆ. ಈ ರೀತಿಯ ಸಾಮಾಜಿಕ ಸಂದೇಶ ನೀಡುವ ವಿವಾಹ ಸಮಾರಂಭಗಳಿಂದ ಗಂಡು ಮತ್ತು ಹೆಣ್ಣಿನ ನಡುವೆ ಯಾವುದೇ ವ್ಯತ್ಯಾಸ ಇಲ್ಲ ಎನ್ನುವುದನ್ನು ಮನವರಿಕೆ ಮಾಡಿಕೊಡುತ್ತದೆ' ಎಂದು ವರನ ತಂದೆ ಗಿರಾಜ್ ಶರ್ಮಾ ಅಭಿಪ್ರಾಯಪಟ್ಟಿದ್ದಾರೆ.