ಕೌಟುಂಬಿಕ ದೌರ್ಜನ್ಯ: ಮೈದುನರಿಗೂ ತಟ್ಟಲಿದೆ ಬಿಸಿ

ಹೊಸದಿಲ್ಲಿ: ಕೌಟುಂಬಿಕ ದೌರ್ಜನ್ಯ ಕಾಯಿದೆ ಪ್ರಕಾರ, ಸಂಕಷ್ಟಕ್ಕೊಳಗಾದ ಮಹಿಳೆಗೆ ಕೇವಲ ಗಂಡನಷ್ಟೇ ಅಲ್ಲ, ಅವನ ಸೋದರರೂ ನಿರ್ವಹಣಾ ವೆಚ್ಚ ನೀಡುವಂತೆ ಆದೇಶಿಸಲು ಅವಕಾಶವಿದೆ ಎಂದು ಸುಪ್ರೀಂ ಕೋರ್ಟ್‌ ಹೇಳಿದೆ.

ವೈವಾಹಿಕ ದೌರ್ಜನ್ಯ ಪ್ರಕರಣಗಳಲ್ಲಿ , ಕೌಟುಂಬಿಕ ಸಂಬಂಧದಲ್ಲಿರುವ ಎಲ್ಲ ವಯಸ್ಕ ಪುರುಷರನ್ನೂ ಸೇರಿಸಿಕೊಳ್ಳಲು ಅವಕಾಶವಿದೆ ಎಂದು ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್‌ ಅವರ ನೇತೃತ್ವದ ಪೀಠ ಅಭಿಪ್ರಾಯಪಟ್ಟಿದೆ. ಕಾಯಿದೆಯ ಸೆಕ್ಷನ್‌ 2 (ಕ್ಯೂ)ನಲ್ಲಿ ಕೌಟುಂಬಿಕ ದೌರ್ಜನ್ಯ ಪ್ರಕರಣದಲ್ಲಿ ಎಲ್ಲ ಪುರುಷ ಸದಸ್ಯರನ್ನು ಸೇರಿಸಿಕೊಳ್ಳಬೇಕೆಂಬ ಸೂಚನೆ ಇದೆ. ಮಹಿಳೆ ತನ್ನ ದೂರಿನಲ್ಲಿ ಹೆಸರಿಸುವ ಕೌಟುಂಬಿಕ ಸಂಬಂಧದ ಪ್ರತಿ ವ್ಯಕ್ತಿಯನ್ನೂ ಸೇರಿಸಬಹುದು ಎಂದು ಹೇಳಲಾಗಿದೆ.

ಸೆಕ್ಷನ್‌ 2(ಎಫ್‌) ಪ್ರಕಾರ, 'ಕೌಟುಂಬಿಕ ಸಂಬಂಧ'ದ ವ್ಯಾಪ್ತಿ ತುಂಬ ವಿಸ್ತಾರವಾಗಿದೆ. ಜತೆಯಾಗಿ ಬಾಳುತ್ತಿರುವ ಇಬ್ಬರು ಅಥವಾ ಯಾವುದೋ ಒಂದು ಕಾಲಘಟ್ಟದಲ್ಲಿ ಒಂದೇ ಮನೆಯಲ್ಲಿ ವಾಸಿಸುತ್ತಿದ್ದ ರಕ್ತ ಸಂಬಂಧಿಗಳು, ವಿವಾಹಿತರು, ದತ್ತು ಸ್ವೀಕರಿಸಲ್ಪಟ್ಟವರು ಅವಿಭಕ್ತ ಕುಟುಂಬಗಳಲ್ಲಿ ಜತೆಯಾಗಿ ಬಾಳುತ್ತಿರುವವರು ಎಲ್ಲರೂ ಬರುತ್ತಾರೆ. ಹೀಗಾಗಿ, ಒಬ್ಬ ವಿವಾಹಿತ ಮಹಿಳೆ ಕೌಟುಂಬಿಕ ದೌರ್ಜನ್ಯ ದಾಖಲಿಸಿ ಗಂಡ, ಮೈದುನರ ಮೇಲೆ ದೂರು ನೀಡಿ ವಿಚ್ಛೇದನೆ ಪಡೆದಲ್ಲಿ, ಗಂಡ ಮಾತ್ರವಲ್ಲ ಮೈದುನನೂ ಕುಟುಂಬ ನಿರ್ವಹಣಾ ವೆಚ್ಚ ಕೊಡಬೇಕಾದೀತು ಎಂದು ಕೋರ್ಟ್‌ ಹೇಳಿದೆ.

ಪಂಜಾಬ್‌ ಮತ್ತು ಹರಿಯಾಣ ಹೈಕೋರ್ಟ್‌ ಇತ್ತೀಚೆಗೆ ಪ್ರಕರಣವೊಂದರ ತೀರ್ಪಿನಲ್ಲಿ, ಮೃತ ಸಹೋದರನ ಪತ್ನಿಗೆ ತಿಂಗಳಿಗೆ 4000, ಮಗನಿಗೆ 2000 ರೂ. ನಿರ್ವಹಣಾ ವೆಚ್ಚ ನೀಡಬೇಕೆಂದು ವ್ಯಕ್ತಿಯೊಬ್ಬರಿಗೆ ಆದೇಶಿಸಿತ್ತು. ಇದನ್ನು ಪ್ರಶ್ನಿಸಿ ಆತ ಸುಪ್ರೀಂ ಕೋರ್ಟ್‌ ಮೆಟ್ಟಿಲೇರಿದ್ದ. ಸುಪ್ರೀಂ ಕೋರ್ಟ್‌ ಕೆಳ ನ್ಯಾಯಾಲಯದ ತೀರ್ಪನ್ನು ಎತ್ತಿ ಹಿಡಿದಿದೆ.