ಆಧಾರ್‌ಗೆ ಶಾಸನಬದ್ಧ ಸ್ಥಾನಮಾನ

ಹೊಸದಿಲ್ಲಿ: ಸಬ್ಸಿಡಿ ಲಾಭವನ್ನು ನೇರವಾಗಿ ಅಗತ್ಯ ಇರುವವರಿಗೆ ತಲುಪಿಸುವ ನಿಟ್ಟಿನಲ್ಲಿ ಆಧಾರ್‌ ಕಾರ್ಡ್‌ಗೆ ಶಾಸನಬದ್ಧ ಸ್ಥಾನಮಾನ ನೀಡಲು ಸರಕಾರ ನಿರ್ಧರಿಸಿದೆ.

'ಸರಕಾರದ ಎಲ್ಲ ಯೋಜನೆಗಳ ಫಲಾನುಭವಿಗಳು ಅದರ ಲಾಭ ಪಡೆಯಲು ಆಧಾರ್‌ ಕಡ್ಡಾಯವಾಗಲಿದ್ದು, ಈ ನಿಟ್ಟಿನಲ್ಲಿ ಕಾನೂನು ಜಾರಿಗೂ ಸರಕಾರ ಚಿಂತಿಸಿದೆ,'ಎಂದು ವಿತ್ತ ಸಚಿವ ಅರುಣ್‌ ಜೇಟ್ಲಿ ತಿಳಿಸಿದ್ದಾರೆ.

ಆಧಾರ್‌ ವೇದಿಕೆ ಮೂಲಕ ಸಬ್ಸಿಡಿ ಅಥವಾ ಎಲ್ಲ ಸೇವೆಗಳಿಗೆ ಏಕೀಕೃತ ನಿಧಿಯಿಂದ ಹಣ ಹಂಚಿಕೆ ಆಗಬೇಕು ಎಂಬ ಸಲಹೆಯೂ ಇದೆ

ಈವರೆಗೆ 98 ಕೋಟಿ ಆಧಾರ್‌ ಸಂಖ್ಯೆಗಳನ್ನು ನೀಡಲಾಗಿದ್ದು, ಪ್ರತಿ ದಿನ ಅಂದಾಜು 26 ಲಕ್ಷ ಬಯೋಮೆಟ್ರಿಕ್‌ ಹಾಗೂ 1.5 ಲಕ್ಷ ಇ-ಕೆವೈಸಿ ವಹಿವಾಟು ನಡೆಯುತ್ತಿದೆ.

16.5 ಕೋಟಿ ಡಿಬಿಟಿಎಲ್‌ (ಎಲ್‌ಪಿಜಿ ಸಬ್ಸಿಡಿಯ ನೇರ ನಗದು ವರ್ಗಾವಣೆ) ಖಾತೆ ಪೈಕಿ ಈಗಾಗಲೇ 11.19 ಕೋಟಿ ಡಿಬಿಟಿಎಲ್‌ ಖಾತೆಗಳಿಗೆ ಆಧಾರ್‌ ಸಂಖ್ಯೆ ಜೋಡಣೆ ಆಗಿದೆ. ರಾಷ್ಟ್ರೀಯ ಗುರುತಿನ ಪ್ರಾಧಿಕಾರ ವಿಧೇಯಕ 2010, ರಾಜ್ಯಸಭೆಯ ಅನುಮೋದನೆ ಪಡೆಯಬೇಕಿದೆ.