ಮುಂಬೈ: ಮೂರು ಅಂತಸ್ತಿನ ಕಟ್ಟಡ ಕುಸಿತ, 14 ಸಾವು

ಮುಂಬೈ: ಕಳೆದ ಮೂರು ದಿನಗಳಿಂದ ಸುರಿದ ಭಾರಿ ಮಳೆಯಿಂದಾಗಿ ಮುಂಬೈನಲ್ಲಿ ಮೂರು ಅಂತಸ್ತಿನ ಕಟ್ಟಡ ಕುಸಿದು 14 ಮಂದಿ ಮೃತಪಟ್ಟಿದ್ದು, ಹಲವರು ಅವಶೇಷಗಳಡಿ ಸಿಲುಕಿರುವ ಶಂಕೆ ಇದೆ.

ಗುರುವಾರ ಬೆಳಗ್ಗೆ ಪಕ್ಮೋಡಿಯ ಭೀಂಡಿ ಬಜಾರ್‌ ಸಮೀಪದ ಜೆಜೆ ಆಸ್ಪತ್ರೆ ಸಮೀಪ ಮೂರು ಅಂತಸ್ತಿನ ಕಟ್ಟಡವೊಂದು ಕುಸಿದು ಬಿದ್ದಿದೆ.

ಈ ಕಟ್ಟಡದಲ್ಲಿ ಸುಮಾರು 9 ಕುಟುಂಬಗಳು ವಾಸಿಸುತ್ತಿದ್ದವು. ಕಟ್ಟಡದ ಮೊದಲ ಮಹಡಿಯಲ್ಲಿ ಟ್ಯುಲಿಪ್‌ ಎಂಬ ನರ್ಸರಿ ಶಾಲೆ ಕೂಡ ಇತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಕಟ್ಟಡವು ಸುಮಾರು 80 ರಿಂದ 100 ವರ್ಷ ಹಳೆಯದ್ದಾಗಿರಬಹುದು ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಕಟ್ಟಡದ ಅವಶೇಷಗಳಡಿ ಹಲವಾರು ಮಂದಿ ಸಿಲುಕಿರುವ ಶಂಕೆ ಇದ್ದು, ಈಗಾಗಲೇ ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಸಿಬ್ಬಂದಿ ರಕ್ಷಣಾ ಹಾಗೂ ಪರಿಹಾರ ಕಾರ್ಯಾಚರಣೆಯಲ್ಲಿ ತೊಡಗಿದ್ದಾರೆ.

ಮೂರು ಅಂತಸ್ತಿನ ಕಟ್ಟಡ ಎರಡು ಭಾಗಗಳು ಕುಸಿದು ಬಿದ್ದಿದೆ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಕಳೆದ 1 ತಿಂಗಳಿನಲ್ಲಿ ಸಂಭವಿಸಿದ ಮೂರನೇ ಕಟ್ಟಡ ಕುಸಿತದ ಪ್ರಕರಣ ಇದಾಗಿದೆ.

ಘಾಟ್ಕೋಪರ್‌ನಲ್ಲಿ ಮೂರು ಅಂತಸ್ತಿನ ಸಿದ್ದಿ ಸಾಯಿ ಕಟ್ಟಡ ಕುಸಿದು ಬಿದ್ದು ಹದಿನೇಳು ಮಂದಿ ಮೃತಪಟ್ಟಿದ್ದರು.

Building collapse in Mumbai