ಸೊಳ್ಳೆಬತ್ತಿಯ ಕಿಡಿಯಿಂದ ಬೆಂಕಿ: ಮಹಿಳೆ ಬಲಿ

ತಿರುಚ್ಚಿ: ರಾತ್ರಿ ಮಲಗುವಾಗ ಹಚ್ಚಿಟ್ಟ ಸೊಳ್ಳೆ ಬತ್ತಿಯಿಂದ ಬೆಂಕಿ ತಗುಲಿ ಮಹಿಳೆಯೊಬ್ಬರು ಮೃತಪಟ್ಟ ಘಟನೆ ತಮಿಳುನಾಡಿನ ತಿರುವೆರುಂಬೂರ್‌ನಲ್ಲಿ ನಡೆದಿದೆ.

ಮೃತಪಟ್ಟ ಮಹಿಳೆಯನ್ನು ಸರಸ್ವತಿ (75) ಎಂದು ಗುರುತಿಸಲಾಗಿದೆ. ಆಕೆ ಕಿಡ್ನಿ ಕಾಯಿಲೆಯಿಂದ ಬಳಲುತ್ತಿದ್ದು, ಕೆಲವು ವಾರಗಳಿಂದ ಮನೆಯಲ್ಲಿ ಒಬ್ಬರೇ ವಾಸಿಸುತ್ತಿದ್ದರು. ಅವರು ಹೊದ್ದುಕೊಂಡಿದ್ದ ಹೊದಿಕೆಗೆ ಸೊಳ್ಳೆ ಬತ್ತಿ ತಗುಲಿ ಬೆಂಕಿ ಹತ್ತಿಕೊಂಡಿದೆ.

ಭಾನುವಾರ ರಾತ್ರಿ 11 ಗಂಟೆ ಸುಮಾರಿಗೆ ಮನೆಯಿಂದ ಭಾರೀ ಹೊಗೆ ಬರುತ್ತಿರುವುದನ್ನು ಗಮನಿಸಿ ಸ್ಥಳೀಯ ನಿವಾಸಿಗಳು ಧಾವಿಸಿ ಬಂದರು. ಆದರೆ ಅಷ್ಟು ಹೊತ್ತಿಗಾಗಲೇ ಸರಸ್ವತಿ ಅವರು ಶೇ 90ರಷ್ಟು ಗಾಯಗಳಿಂದ ಸುಟ್ಟುಹೋಗಿದ್ದರು.

ಮಂಚದ ಕೆಳಗೆ ಇರಿಸಿದ್ದ ಸೊಳ್ಳೆ ಬತ್ತಿಗೆ ಹೊದಿಕೆ ತಾಗಿ ಬೆಂಕಿ ಹೊತ್ತಿಕೊಂಡಿದೆ ಎಂದು ಪ್ರಾಥಮಿಕ ತನಿಖೆಗಳಿಂದ ಗೊತ್ತಾಗಿದೆ. ಮನೆಯ ಒಳಗಿನಿಂದ ಬಾಗಿಲಿಗೆ ಲಾಕ್ ಮಾಡಿದ್ದ ಕಾರಣ ನೆರೆಮನೆಯವರು ಬಾಗಿಲು ಒಡೆದು ಒಳಬರಬೇಕಾಯಿತು.

ತಿರುವೆರುಂಬೂರ್ ಠಾಣೆಯಲ್ಲಿ ಕೇಸು ದಾಖಲಾಗಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ.