ಹಾರ್ಟ್ ಫೇಲ್ ಆದ ಉದ್ಯಮಿಗೆ 90 ಲಕ್ಷ ವೆಚ್ಚದ ಕೃತಕ ಹೃದಯ ಸಾಧನ

ಮುಂಬಯಿ: ಹೃದಯ ವೈಫಲ್ಯಕ್ಕೆ ಒಳಗಾಗಿ ಕಳೆದ ಆರು ತಿಂಗಳಿಂದ ಹಾಸಿಗೆ ಹಿಡಿದಿದ್ದ ಮುಂಬೈ ಮೂಲದ ಉದ್ಯಮಿಯೊಬ್ಬರು 90 ಲಕ್ಷ ರೂಪಾಯಿ ವೆಚ್ಚದಲ್ಲಿ ಕೃತಕ ಹೃದಯ ಸಾಧನ ಅಳವಡಿಸಿಕೊಂಡಿಸಿದ್ದಾರೆ. ಮುಂಬಯಿಯಲ್ಲಿ ಕೃತಕ ಹೃದಯ ಬಡಿತ ಯಂತ್ರ ಅಳವಡಿಸಿಕೊಂಡವರಲ್ಲೇ ಈ ಉದ್ಯಮಿ ಮೊದಲಿಗರು.

ಈ ಕೃತಕ ಹೃದಯ ಬಡಿತ ಯಂತ್ರವು (ಲೆಫ್ಟ್ ವೆಂಟ್ರಿಕ್ಯುಲಾರ್ ಅಸಿಸ್ಟ್ ಡಿವೈಸ್ - LVAD), ಕಾರ್ಯವೈಫಲ್ಯಗೊಂಡ ಹೃದಯವನ್ನು ಪುನಃ ಕಾರ್ಯಾಚರಿಸುವಂತೆ ಮಾಡುತ್ತದೆ. ಇದು ಹೃದಯ ಕಸಿಗಿಂತ ವಿಭಿನ್ನ. ಈ ದುಬಾರಿ ಸಾಧನವನ್ನು ಹೃದಯದ ಕೆಳಭಾಗದಲ್ಲಿ ಅಳವಡಿಸಲಾಗುತ್ತದೆ ಮತ್ತು ಅದರ ಬಾಹ್ಯ ಭಾಗಗಳನ್ನು ಹೊಂದಿರುವ ಪುಟ್ಟ ಚೀಲವೊಂದನ್ನು ರೋಗಿಯ ಭುಜಕ್ಕೆ ಕಟ್ಟಲಾಗುತ್ತದೆ.

'ಹೃದಯಾಘಾತಕ್ಕೆ ಉತ್ತಮ ಚಿಕಿತ್ಸೆ ಎಂದು ಪರಿಗಣಿಸುವ ಹೃದಯ ಕಸಿ ಚಿಕಿತ್ಸೆಗೆ ತಗಲುವ ವೆಚ್ಚ ಸುಮಾರು ಮೂರು ಪಟ್ಟು ಅಗ್ಗವಾಗಿದ್ದರೂ, ಉದ್ಯಮಿ ದೋಶಿ ಅವರಿಗೆ ಶ್ವಾಸಕೋಶ ಕ್ಷಯರೋಗವೂ ಇದ್ದುದರಿಂದ ಇದೊಂದು ಜಟಿಲವಾದ ಕೇಸು. ಈ ಹಿನ್ನೆಲೆಯಲ್ಲಿ ಹೆಚ್ಚು ವೆಚ್ಚದ ಕ್ಲಿಷ್ಟಕರ ಆಯ್ಕೆಯನ್ನು ಆಯ್ದುಕೊಳ್ಳಬೇಕಾಯಿತು. ಅವರ ಶ್ವಾಸಕೋಶದ ಒತ್ತಡ ಕೂಡಾ ಅಧಿಕವಾಗಿದೆ' ಎಂದು ಹೃದಯ ಶಸ್ತ್ರಚಿಕಿತ್ಸಕ ಡಾ.ಅನ್ವಯ್ ಮುಲೇ ಹೇಳಿದ್ದಾರೆ.

ಐದು ವರ್ಷಗಳ ಹಿಂದೆ ಹೃದಯಾಘಾತಕ್ಕೆ ಒಳಗಾಗಿದ್ದ ದೋಶಿ ಅವರ ಆರೋಗ್ಯದಲ್ಲಿ ಗುರುವಾರ ಸಾಕಷ್ಟು ಏರುಪೇರು ಕಂಡುಬಂದಿತ್ತು. ಆದರೆ, ಸ್ಪಲ್ಪ ಸಮಯದಲ್ಲೇ ಚೇತರಿಸಿಕೊಂಡಿದ್ದಾರೆ. 'ನಾನು 30 ಕಿಲೋ ತೂಕವನ್ನು ಕಳೆದುಕೊಂಡಿದ್ದೇನೆ. ಸರಿಯಾಗಿ ನಿಲ್ಲಲೂ ಸಾಧ್ಯವಾಗುತ್ತಿಲ್ಲ' ಎಂದು ದೋಶಿ ಹೇಳಿಕೊಂಡಿದ್ದಾರೆ.

'ಭಾರತದಲ್ಲಿ ಹೃದಯಾಘಾತಕ್ಕೆ ಚಿಕಿತ್ಸೆ ನೀಡಲು ಮತ್ತೊಂದು ಪರ್ಯಾಯ ಮಾರ್ಗವಿದೆ ಎಂಬುದು ದೋಶಿ ಅವರು ಯಶಸ್ವಿ ಶಸ್ತ್ರ ಚಿಕಿತ್ಸೆಯಿಂದ ಸಾಬೀತಾಗಿದೆ' ಎಂದು ಎಂದು ಶಸ್ತ್ರಚಿಕಿತ್ಸಕ ಡಾ.ಮುಲೇ ಹೇಳಿದ್ದು, 'LVAD ಎಂಬುದು ಕೃತಕ ಹೃದಯ ಅಲ್ಲ, ಬದಲಾಗಿ ಇರುವ ಹೃದಯವೇ ಚೆನ್ನಾಗಿ ಕಾರ್ಯ ನಿರ್ವಹಿಸುವಂತೆ ಮಾಡಬಲ್ಲ ಸಾಧನ' ಎಂದು ಸ್ಪಷ್ಟಪಡಿಸಿದ್ದಾರೆ.