ಸ್ಮೃತಿ ಇರಾನಿಗೆ 'ಬಾಯ್' ಎಂದ ಕನ್ಹಯ್ಯ

ಹೊಸದಿಲ್ಲಿ: ಮಾನವ ಸಂಪನ್ಮೂಲ ಸಚಿವಾಲಯದಿಂದ ಸ್ಮೃತಿ ಇರಾನಿ ಅವರನ್ನು ತೆರವುಗೊಳಿಸಿರುವ ಕ್ರಮವನ್ನು ಸ್ವಾಗತಿಸಿರುವ ಜವಾಹರ್ ಲಾಲ್ ನೆಹರೂ ವಿಶ್ವವಿದ್ಯಾಲಯದ ವಿದ್ಯಾರ್ಥಿ ಸಂಘಟನೆಯ ಅಧ್ಯಕ್ಷ ಕನ್ಹಯ್ಯ ಕುಮಾರ್ ಇರಾನಿ ಅವರಿಗೆ 'ಬಾಯ್' ಎಂದು ಹೇಳಿದ್ದಾರೆ.

ಆದರೆ ಹೈದರಾಬಾದ್‌ ವಿವಿಯಲ್ಲಿ ನಡೆದ ದಲಿತ ವಿದ್ಯಾರ್ಥಿ ರೋಹಿತ್ ವೇಮುಲ ಅವರ ಆತ್ಮಹತ್ಯೆಗೆ ಇದು ಶಿಕ್ಷೆಯಲ್ಲ ಎಂದು ಹೇಳಿದ್ದಾರೆ. ಇರಾನಿ ಅವರನ್ನು ಜವಳಿ ಸಚಿವಾಲಯಕ್ಕೆ ವರ್ಗಾಯಿಸಲಾಗಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕನ್ಹಯ್ಯ ಹೀಗೆ ಪ್ರತಿಕ್ರಿಯಿಸಿದ್ದಾರೆ. ರೋಹಿತ್ ಅವರ ಸಾವಿಗೆ ನ್ಯಾಯ ಬೇಕೆಂದು ಕಾಯುತ್ತಿದ್ದು, ಸಂಪುಟ ಪುನರ್‌ ರಚನೆ ಕಾರಣರಾದವರಿಗೆ ಶಿಕ್ಷೆ ಅಲ್ಲ ಎಂದು ಅವರು ಹೇಳಿದ್ದಾರೆ.

ಕಿರುಕುಳ ನೀಡಿ ವೇಮುಲ ಅವರನ್ನು ಆತ್ಮಹತ್ಯೆ ಮಾಡುವಂತೆ ಪ್ರೇರೇಪಿಸಿದ ಮತ್ತೊಬ್ಬ ಸಚಿವ ಬಂಡಾರು ದತ್ತಾತ್ರೇಯ ಅವರನ್ನು ಜೈಲಿಗೆ ಹಾಕಬೇಕು ಎಂದು ಕನ್ಹಯ್ಯ ಆಗ್ರಹಿಸಿದರು.

ಜನವರಿ 14ರಂದು ಹೈದರಾಬಾದ್ ವಿವಿ ಹಾಸ್ಟೆಲ್‌ನಲ್ಲಿ ವೇಮುಲ ಆತ್ಮಹತ್ಯೆ ಮಾಡಿಕೊಂಡಿದ್ದು, ಸಚಿವರಾದ ಇರಾನಿ ಮತ್ತು ಬಮಡಾರು ಇದಕ್ಕೆ ಕಾರಣ ಎಂದು ವ್ಯಾಪಕ ಪ್ರತಿಭಟನೆ ವ್ಯಕ್ತವಾಗಿತ್ತು.

ಜವಾಹರ್ ಲಾಲ್ ನೆಹರೂ ವಿವಿ ಆವರಣದಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಉಗ್ರ ಅಫ್ಘಲ್ ಗುರು ಪರ ಘೋಷಣೆ ಕೂಗಿರುವ ಆರೋಪದಡಿ ಕನ್ಹಯ್ಯ ಅವರನ್ನು ಬಂಧಿಸಲಾಗಿತ್ತು. ಇದು ಕೂಡ ವ್ಯಾಪಕ ಪ್ರತಿಭಟನೆಗೆ ಕಾರಣವಾಗಿತ್ತು.