ನೂತನ ಇವಿಎಂ ಖರೀದಿಗೆ 3,174 ಕೋಟಿ ಬಿಡುಗಡೆ

ಹೊಸದಿಲ್ಲಿ: ಮುಂಬರುವ ಚುನಾವಣೆಯಲ್ಲಿ ನೂತನ ತಂತ್ರಜ್ಞಾನ ಒಳಗೊಂಡ ಎಲೆಕ್ಟ್ರಾನಿಕ್‌ ಮತ ಯಂತ್ರ (ಇವಿಎಂ)ಗಳ ಜತೆಗೆ ಮತ ಪರಿಶೀಲನಾ ವ್ಯವಸ್ಥೆಯನ್ನು ಅಳವಡಿಸುವ ಕುರಿತು ಈ ಹಿಂದೆ ಚುನಾವಣಾ ಆಯೋಗದ ಸಲ್ಲಿಸಿದ್ದ ಪ್ರಸ್ತಾವನೆಗೆ ಕೇಂದ್ರ ಸಚಿವ ಸಂಪುಟ ಸಮ್ಮತಿ ಸೂಚಿಸಿದೆ.

ಇವಿಎಂ ಯಂತ್ರಗಳ ಕುರಿತು ಪ್ರತೀ ಬಾರಿ ಚುನಾವಣೆಯಲ್ಲಿ ಕೇಳಿ ಬರುವ ಆರೋಪಗಳಿಗೆ ಅಂತ್ಯ ಹಾಡಲು ಮುಂದಾಗಿರುವ ಆಯೋಗ ಇವಿಎಂಗಳ ಜತೆಗೆ ಮತ ತಾಳೆ ಮಾಡಿಕೊಳ್ಳುವ ವಿವಿಪ್ಯಾಟ್‌ (VVPAT–voter verifiable paper audit trail) ಬಳಕೆ ಮಾಡಲು ನೂತನ ಪ್ರಸ್ತಾವನೆ ಸಲ್ಲಿಸಿತ್ತು.

ದೇಶದ ಎಲ್ಲ ಮತ ಕೇಂದ್ರಗಳಿಗೆ 16 ಲಕ್ಷ ವಿವಿಪ್ಯಾಟ್‌ ಯಂತ್ರಗಳ ಅವಶ್ಯಕತೆ ಇದ್ದು, ಇದಕ್ಕೆ ಒಟ್ಟು 3,174 ಕೋಟಿ ವ್ಯಯವಾಗಲಿದೆ ಎಂದು ಚುನಾವಣಾ ಆಯೋಗ ಪ್ರಸ್ತಾವನೆಯಲ್ಲಿ ಹೇಳಿತ್ತು. ಬುಧವಾರದಂದು ಈ ಪ್ರಸ್ತಾವನೆಗೆ ಕೇಂದ್ರ ಸಚಿವ ಸಂಪುಟ ಒಪ್ಪಿಗೆ ನೀಡಿದ್ದು, ಮುಂಬರುವ ಚುನಾವಣೆಯಲ್ಲಿ ಇವಿಎಂ ಜತೆಗೆ ವಿವಿಪ್ಯಾಟ್‌ ಬಳಕೆಯಾಗಲಿದೆ.

ವಿವಿಪ್ಯಾಟ್‌ ಬಳಿಕೆ ಕುರಿತು 2014ರಿಂದ ಈ ವರೆಗೆ ಚುನಾವಣಾ ಆಯೋಗ ಒಟ್ಟ 11 ಬಾರಿ ಕೇಂದ್ರ ಸರಕಾರಕ್ಕೆ ಮನವಿ ಮಾಡಿಕೊಂಡಿತ್ತು. ಆದರೆ ಈ ಬಾರಿ ಸಚಿವ ಸಂಪುಟ ಸಭೆ ಈ ಮನವಿಯನ್ನು ಪುರಸ್ಕರಿಸಿದೆ.

16 ಲಕ್ಷ ವಿವಿಪ್ಯಾಟ್‌ ನಿರ್ಮಿಸಲು ಇಸಿಐಎಲ್‌ ಮತ್ತು ಬಿಇಎಲ್‌ ಸಂಸ್ಥೆಗಳಿಗೆ 30 ತಿಂಗಳ ಅಗತ್ಯವಿದೆ. ಅಲ್ಲದೇ ಪಂಚ ರಾಜ್ಯ ಚುನಾವಣೆ ಬಳಿಕ ಬಿಎಸ್‌ಪಿ, ಆಪ್‌, ಹಾಗೂ ಕಾಂಗ್ರೆಸ್‌ ಪಕ್ಷ ಚುನಾವಣಾ ಆಯೋಗಕ್ಕೆ ವಿವಿಪ್ಯಾಟ್‌ ವ್ಯವಸ್ಥೆಯನ್ನು ಅಳವಡಿಸುವಂತೆ ಮನವಿ ಮಾಡಿದ್ದವು.