ಸಂಪುಟ ಪುನಾರಚನೆ ? ಸೆಲ್ಫ್‌ ಅಪ್ರೈಸಲ್‌ಗೆ ಪ್ರಧಾನಿ ಸೂಚನೆ

ಹೊಸದಿಲ್ಲಿ: ಕೇಂದ್ರ ಸಂಪುಟ ಪುನಾರಚನೆ ಮಾತು ಕೇಳಿ ಬಂದಿರುವ ಮಧ್ಯೆ, ಜೂನ್‌ 30ರಂದು ನಿಗದಿ ಆಗಿರುವ ಸಭೆಯಲ್ಲಿ 'ಸ್ವ ಮೌಲ್ಯ ನಿರ್ಣಯ'ದ ವರದಿ ಸಲ್ಲಿಸುವಂತೆ ಎಲ್ಲ ಸಚಿವರಿಗೆ ಪ್ರಧಾನಿ ನರೇಂದ್ರ ಮೋದಿ ಸೂಚಿಸಿದ್ದಾರೆ.

'ಬಿಜೆಪಿ ಸರಕಾರ ತನ್ನ ಎರಡನೇ ಬಜೆಟ್‌ ಮಂಡಿಸಿದ ನಂತರದಿಂದೀಚೆಗೆ ಮಾಡಿರುವ ಸಾಧನೆ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿಗೆ ಸಚಿವರು ವರದಿ ಸಲ್ಲಿಸಬೇಕಿದೆ. ಮುಂಗಾರು ಅಧಿವೇಶನ ಆರಂಭಕ್ಕೂ ಮುನ್ನ ಸಚಿವ ಸಂಪುಟ ಪುನಾರಚನೆ ಆಗಬಹುದು ಎಂಬ ಮಾತು ಕೇಳಿ ಬಂದಿರುವ ನಡುವೆ ಈ ಸಭೆ ಕರೆಯಲಾಗಿದೆ,' ಎಂದು ಉನ್ನತ ಮೂಲಗಳು ತಿಳಿಸಿವೆ.

'ಜೂನ್‌ 30ರ ಸಭೆ ನಂತರ ಸಚಿವರ ಸಾಧನೆ ವರದಿಯನ್ನು ಪರಿಗಣಿಸಿ ಸಂಪುಟ ಪುನಾರಚನೆ ಪ್ರಕ್ರಿಯೆ ನಡೆಯಬಹುದು,'ಎಂದು ಮೂಲಗಳು ತಿಳಿಸಿವೆ.

ಸಂಪುಟ ಸಚಿವರ ಸಾಧನೆಯನ್ನು ಪ್ರಧಾನಿ ಕಾಲಕಾಲಕ್ಕೆ ಪರಿಶೀಲನೆ ನಡೆಸುತ್ತಿದ್ದು, ಉತ್ತರ ಪ್ರದೇಶ ಹಾಗೂ ಪಂಜಾಬ್‌ ವಿಧಾನಸಭೆ ಚುನಾವಣೆಗೆ ಮುನ್ನ ಸರಕಾರದ ಪ್ರಮುಖ ಯೋಜನೆಗಳು ತ್ವರಿತಗತಿಯಲ್ಲಿ ಅನುಷ್ಠಾನಗೊಳಿಸುವುದು ಸರಕಾರದ ಉದ್ದೇಶ.

'ಅತ್ಯತ್ತಮ ಶ್ರೇಯಾಂಕಕ್ಕಾಗಿ ಸಚಿವರು ಹಾಗೂ ಇಲಾಖೆಗಳ ನಡುವೆ ಬಿರುಸಿನ ಪೈಪೋಟಿ ಏರ್ಪಟ್ಟಿದೆ,' ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.