ದೇಶದ ಕ್ಯಾನ್ಸರ್ ಪ್ರಕರಣ ಈ ವರ್ಷ 13.9 ಲಕ್ಷ, ಮುಂದಿನ 5 ವರ್ಷದಲ್ಲಿ 15.7ಲಕ್ಷಕ್ಕೆ ಏರಿಕೆ ಸಾಧ್ಯತೆ!

ಹೊಸದಿಲ್ಲಿ: ಭಾರತದಲ್ಲಿ ಪ್ರಸ್ತುತ 13.9 ಲಕ್ಷ ಮಂದಿಯಲ್ಲಿ ಕ್ಯಾನ್ಸರ್ ರೋಗವಿದ್ದು, ಮುಂದಿನ 5 ವರ್ಷದಲ್ಲಿ ಅಂದರೆ 2025ನೇ ಇಸವಿಗೆ 15.7ಲಕ್ಷಕ್ಕೆ ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ಐಸಿಎಂಆರ್ ಹಾಗೂ ಬೆಂಗಳೂರು ಮೂಲದ ರಾಷ್ಟ್ರೀಯ ರೋಗ ಸೂಚನಾ ವಿಜ್ಞಾನ ಮತ್ತು ಸಂಶೋಧನಾ ಕೇಂದ್ರ ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.

ಬಿಡುಗಡೆಗೊಂಡ ವರದಿ ಪ್ರಕಾರ ಕ್ಯಾನ್ಸರ್‌ ಪ್ರಕರಣಗಳನ್ನು ದಾಖಲಿಸಿಕೊಳ್ಳುವ 28 ಕೇಂದ್ರಗಳಿಂದ ಮಾಹಿತಿ ಸಂಗ್ರಹಿಸಿ ರಾಷ್ಟ್ರೀಯ ಕ್ಯಾನ್ಸರ್‌ ರೆಜಿಸ್ಟ್ರಿ ಪ್ರೋಗ್ರಾಮ್‌ ವರದಿ ಒಪ್ಪಿಸಲಾಗಿದೆ. ಇದರ ಜತೆಗೆ 58 ಆಸ್ಪತ್ರೆ ಆಧಾರಿತ ನೋಂದಣಿಗಳಿಂದ ಕೂಡ ಮಾಹಿತಿ ಸಂಗ್ರಹ ಮಾಡಲಾಗಿದೆ. ಕಳೆದ 4 ವರ್ಷಕ್ಕೆ ಹೋಲಿಸಿದರೆ 10% ರೋಗಿಗಳ ಪ್ರಮಾಣ ಹೆಚ್ಚಿದೆ.

ತಂಬಾಕು ಸೇವನೆಯಿಂದ ಬಂದ ಪ್ರಕರಣಗಳೇ ಹೆಚ್ಚು:
ಒಟ್ಟು ಪ್ರಕರಣಗಳ ಪೈಕಿ ತಂಬಾಕು ಸೇವನೆಗೆ ಸಂಬಂಧಿಸಿದಂತೆ 3.7 ಲಕ್ಷ ಕ್ಯಾನ್ಸರ್‌ ಪ್ರಕರಣಗಳು 2020ರಲ್ಲಿ ದಾಖಲಾಗಲಿವೆ. ಅಂದರೆ ಶೇ 27.1ರಷ್ಟು ತಂಬಾಕು ಸೇವೆಯಿಂದ ಉಂಟಾದ ಕ್ಯಾನ್ಸರ್‌ ಪ್ರಕರಣಗಳಾಗಿವೆ. ಇನ್ನು ಒಟ್ಟು ಕ್ಯಾನ್ಸರ್‌ ಪ್ರಕರಣಗಳ ಪೈಕಿ ಶೇ 14.8 ರಷ್ಟು ಅಂದರೆ ಸುಮಾರು 2 ಲಕ್ಷ ಪ್ರಕರಣಗಳು ಮಹಿಳೆಯರ ಸ್ತನ ಕ್ಯಾನ್ಸರ್‌ ಆಗಿದೆ. ಶೇ 5.4 ಅಂದರೆ 0.75 ಲಕ್ಷ ಪ್ರಕರಣಗಳು ಗರ್ಭಕಂಠ (ಸೆರ್ವಿಕ್ಸ್‌) ಕ್ಯಾನ್ಸರ್‌ ಆಗಿದೆ. ಮಿಕ್ಕಂತೆ ಪುರುಷ ಮತ್ತು ಮಹಿಳೆ ಇಬ್ಬರಲ್ಲಿಯೂ ಕಾಣಿಸಿಕೊಳ್ಳುವ ಜಠರ ಕ್ಯಾನ್ಸರ್ 2.7 ಲಕ್ಷ (ಶೇ.19.7ರಷ್ಟು)ದಷ್ಟು ಇದೆ. ತಲೆ ಮತ್ತು ಕುತ್ತಿಗೆ, ಹೊಟ್ಟೆ, ಸ್ತನ ಮತ್ತು ಗರ್ಭಕೋಶದ ಕ್ಯಾನ್ಸರ್ ಹೆಚ್ಚಿನ ಪ್ರಮಾಣದಲ್ಲಿದೆ.

ಪುರುಷರಿಗೆ ಕಾಡುವ ಶ್ವಾಸಕೋಶ ಕ್ಯಾನ್ಸರ್‌ನ ಪ್ರಮುಖ ಸೂಚನೆಗಳು

ದೇಶದಲ್ಲಿ ಅತೀ ಹೆಚ್ಚು ಕ್ಯಾನ್ಸರ್‌ ರೋಗಿಗಳಿರುವುದು ಎಲ್ಲಿ?
ಭಾರತದಲ್ಲಿ ಅತಿ ಹೆಚ್ಚು ಕ್ಯಾನ್ಸರ್‌ ಪ್ರಕರಣಗಳನ್ನು ಹೊಂದಿರುವುದು ಮಿಜೊರಾಂನ ಐಜೋಲ್‌ ಜಿಲ್ಲೆ ಇಲ್ಲಿ ಕ್ಯಾನ್ಸರ್‌ ಪ್ರಕರಣಗಳ ಪ್ರಮಾಣ 1,00,000 ಪುರುಷರ ಪೈಕಿ 269.4 ಪ್ರಕರಣಗಳು ಬೆಳಕಿಗೆ ಬಂದಿದೆ. ಇನ್ನು ಮಹಾರಾಷ್ಟ್ರದ ಉಸ್ಮಾನಾಬಾದ್‌ ಮತ್ತು ಬೀಡ್‌ ಜಿಲ್ಲೆಗಳಲ್ಲಿ 39.5 ಪ್ರಕರಣ ಬೆಳಕಿಗೆ ಬಂದಿದೆ.

ಶ್ವಾಸಕೋಶದ ಕ್ಯಾನ್ಸರ್ ಕಂಡು ಬರಲು ಕಾರಣಗಳೇನು ?

ಅರುಣಾಚಲ ಪ್ರದೇಶದ ಪಾಪುಂಪಾರೆ ಜಿಲ್ಲೆಯಲ್ಲಿ ಪ್ರತಿ 1,00,000 ಮಹಿಳೆಯರ ಪೈಕಿ 219.8 ಕ್ಯಾನ್ಸರ್‌ ಪ್ರಕರಣಗಳಿಂದ ಹಿಡಿದು ಉಸ್ಮಾನಾಬಾದ್ ಮತ್ತು ಬೀಡ್‌ ಜಿಲ್ಲೆಗಳಲ್ಲಿ 49.4 ಪ್ರಕರಣಗಳು ದಾಖಲಾಗಿರುವುದಾಗಿ ವರದಿಯಿಂದ ಬಹಿರಂಗವಾಗಿದೆ. ದೇಶದ ಈಶಾನ್ಯ ಪ್ರದೇಶದಲ್ಲಿ ತಂಬಾಕು ಬಳಕೆಯಿಂದ ಹೆಚ್ಚಿನ ಪ್ರಮಾಣದಲ್ಲಿದದ್ದು ಕ್ಯಾನ್ಸರ್‌ ರೋಗ ಬರುತ್ತಿದೆ. ಪುರುಷರಲ್ಲಿ ಶ್ವಾಸಕೋಶ, ಬಾಯಿ, ಜಠರ ಹಾಗೂ ಅನ್ನನಾಳದ ಕ್ಯಾನ್ಸರ್‌ ಸಾಮಾನ್ಯವಾಗಿ ಕಾಣಿಸಿಕೊಳ್ಳುತ್ತಿದೆ. ಮಹಿಳೆಯರಲ್ಲಿ ಸ್ತನ ಹಾಗೂ ಗರ್ಭಕೋಶ ಕ್ಯಾನ್ಸರ್‌ ಹೆಚ್ಚಾಗಿದೆ. ಶಸ್ತ್ರಚಿಕಿತ್ಸೆ, ಕೀಮೊಥೆರಪಿ ಹಾಗೂ ರೇಡಿಯೇಷನ್‌ ಥೆರಪಿಗಳ ಮೂಲಕ ಸ್ತನ ಕ್ಯಾನ್ಸರ್‌, ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ಗಳಿಗೆ ಚಿಕಿತ್ಸೆ ಕೊಡಲಾಗುತ್ತಿದೆ. ಗರ್ಭಕೋಶ ಕ್ಯಾನ್ಸರ್‌ಗೆ ರೇಡಿಯೊಥೆರಪಿ ಹಾಗೂ ಕೀಮೊಥೆರಪಿ ಚಿಕಿತ್ಸೆ ನಡೆಸಲಾಗುತ್ತಿದೆ.