ಮುಂಬಯಿ-ನಾಗ್ಪುರ ಹೈವೇಯಲ್ಲಿ 50 ಕಾರು ಚಾರ್ಜಿಂಗ್ ಸ್ಟೇಷನ್‌ಗಳು

ಮುಂಬಯಿ: ಎಲೆಕ್ಟ್ರಿಕ್‌ ಕಾರು ಚಾಲಕರಿಗೆ ಇದೊಂದು ಸಂತಸದ ಸುದ್ದಿ. ಮುಂಬಯಿ-ನಾಗ್ಪುರ ಹೆದ್ದಾರಿಯ 820 ಕಿ.ಮೀ ವ್ಯಾಪ್ತಿಯಲ್ಲಿ 35 ಕಿ.ಮೀಗೊಂದು ಕಾರು ಚಾರ್ಜಿಂಗ್ ಸ್ಟೇಷನ್‌ ಸೌಲಭ್ಯ ದೊರೆಯಲಿದೆ.

ಮಹಾರಾಷ್ಟ್ರ ವಿದ್ಯುತ್‌ ವಿತರಣಾ ಕಂಪೆನಿ ಈ ಯೋಜನೆ ಕೈಗೆತ್ತಿಕೊಂಡಿದೆ. 820 ಕಿ.ಮೀ ಹೆದ್ದಾರಿ ವ್ಯಾಪ್ತಿಯಲ್ಲಿ 50 ಎಲೆಕ್ಟ್ರಿಕ್‌ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಕಲ್ಪಿಸಲಿದೆ. ಇದರಲ್ಲಿ ಇಪ್ಪತ್ತು ಸ್ಟೇಷನ್‌ಗಳು ನಾಸಿಕ್‌, ಔರಂಗಬಾದ್‌, ಜಲ್ಗಾಂವ್‌, ಅಮರಾವತಿಗಳಲ್ಲಿ ಸ್ಥಾಪನೆಯಾಗಲಿವೆ. ರಾಜ್ಯ ಸರಕಾರ ಮತ್ತು ಕೇಂದ್ರದ ಭಾರಿ ಕೈಗಾರಿಕಾ ಸಚಿವಾಲಯ ಈ ಯೋಜನೆಗೆ ಹಣ ವೆಚ್ಚ ಮಾಡಲಿವೆ.

ಮಹಾರಾಷ್ಟ್ರ ವಿದ್ಯುತ್‌ ವಿತರಣಾ ಕಂಪೆನಿ 2020ರ ವೇಳೆಗೆ ದೇಶಾದ್ಯಂತ ಇಂಥ 500 ಸ್ಟೇಷನ್‌ಗಳನ್ನು ಸ್ಥಾಪಿಸಲಿದೆ. ಈ ಮೂಲಕ ಎಲೆಕ್ಟ್ರಿಕ್‌ ವಾಹನಗಳ ಸಂಚಾರವನ್ನು ಸರಕಾರ ಉತ್ತೇಜಿಸುತ್ತಿದೆ.

ಪೂರ್ಣವಾಗಿ ಚಾರ್ಜ್‌ ಆದ ಕಾರು 120 ಕಿ.ಮೀ ಓಡುತ್ತದೆ. ಎಲೆಕ್ಟ್ರಿಕ್‌ ವಾಹನಗಳ ಓಡಾಟಕ್ಕೆ ಸೂಕ್ತ ಸೌಲಭ್ಯ ಕಲ್ಪಿಸುವ ಮೂಲಕ ಪೆಟ್ರೋಲ್‌ ಮತ್ತು ಡಿಸೇಲ್‌ ವಾಹನಗಳ ಬಳಕೆ ನಿಯಂತ್ರಣಕ್ಕೆ ತರಲು ಚಿಂತನೆ ನಡೆಸುತ್ತಿರುವುದಾಗಿ ವಿದ್ಯುತ್‌ ವಿತರಣಾ ಕಂಪೆನಿ ಹೇಳಿದೆ.